VOV4.Jarai - Ngă tui tơlơi git gai mơng Sang bruă prăk Kơnuk kơna tŏ tui pok pơhai hơdôm hơdră djru, pơsir hĭ tơnap tap brơi mơnuih čan prăk bơbeč nao kơtang mơng klin Covid-19, mơng lơ 16/6/2021, Agribank đĭ dua wŏt rơnoh prăk čan mă kmlai ƀiă brơi ƀing mơnuih bơbeč nao kơtang mơng klin Covid-19 hăng rơnoh prăk 200.000 klai prăk kiăng kơ djru brơi hơdôm anom bruă, mơnuih ƀon sang pơsir hĭ tơnap tap, hơđong bơwih ƀong sĭ mơdrô, pơhlôm tơlơi hơdip mơda.

Đang kơphê phrâo pla glăi prong 1 ektar mơng ayong Lê Đức Anh (grup 5 kông ti kơphê Đ’Rao, tơring glông Čư̆ M’gar, Daklak) glăk yak nao thun tal 8, anai lĕ thun blan kơphê hiam mơboh lu. Hơdôm phun kơphê than pum pam mơboh lu. Ayong Đức Anh brơi thâo: hlâo anun ñu rŭ hĭ abih phun kơphê tha, laih anun lŏn hmua pơdơi amăng 2 thun tui tơlơi pơkă kah mơng pla glăi hle, tơdơi kơ pla glăi. Yua ruah pơjeh hiam, ngă tui djơ̆ tơlơi črâo ba amăng bruă pla pơjing yua anun kơphê bluh đĭ hiam. Huăi kar hăng lu anih pơkŏn, kơphê juăt djai yua kơ hlăt mŏt pơčrăm tơdơi kơ pla sa, dua thun.

Pla glăi kơphê tơdơi kơ hơdôm thun brơi lŏn pơdơi pla phun ƀiă hrơi kiăng kơ lŏn rŭ hiam glăi kah mơng pla glăi phun kơphê brơi mơboh lu. Lơ̆m aka ƀu pla glăi, kơphê tha pĕ pơhrui kơnong mơng 7-8 tơ̆n đôč. Lơ̆m pla glăi truh thun mơboh lu pĕ pơhrui mơng 15-17 tơ̆n, đa bơyan pơhrui lu ƀiă. Đang kơphê sang anŏ gơmơi 1 ektar, pĕ pơhrui 17 tơ̆n.

Mơnuih apăn bruă mơng Agribank Daklak djru mơnuih ƀon sang ngă hră pơ-ar čan prăk yua bơbeč mơng klin Covid-19

Ơi Nguyễn Hưũ Thọ, khua kông ti kơphê Đ’Rao brơi thâo: kông ti hơmâo 488 ektar đang kơphê, mơng thun 2010 truh ră anai hơmâo pla glăi 298 ektar, truh pơ rơbêh 60% đang kơphê. Mrô prăk tuh pơ alin lĕ rơbêh 33 klai prăk. Abih bang lêng mơng Sang bruă prăk ngă hmua hăng pơđĭ kyar ƀon lan anom bruă pơdong ƀơi Čư̆ M’gar brơi čan mă kmlai ƀiă. Mơng akŏ thun 2020 truh ră anai, yua nua kơphê trun kông ti bưp tơnap tap. Laih dong rơbêh 65% amăng mrô 435 čô kông nhơn mă bruă amăng kông ti lĕ mơnuih djuai ania ƀiă, tơlơi hơdip tơnap tap biă mă; lu mơnuih lêng kơ čan prăk pioh tuh pơ aliun bơwih ƀong huă hăng yua rĭm hrơi. Hăng rơnoh prăk đom rơbêh 41 klai prăk tui ră anai mơng kông ti, abih bang lêng čan mơng sang bruă prăk ngă hmua hăng pơđĭ kyar ƀon lan tơring glông. Mơng hrơi klin Covid-19 hơđuh đĭ, kông ti hơmâo sang bruă prăk brơi tla hnưh sui thun ƀiă dong hăng mă kmlai ƀiă. Tơlơi anai djru brơi kông ti, mơnuih mă bruă plai ƀiă tơnap tap.

“Sang bruă prăk ngă hmua djru brơi kông ti lơ̆m hrŏ trun kmlai, hrŏ trun abih bang kmlai djop rơnoh prăk čan. Mơng 9,5 truh 9 % ră anai trun dŏ 8,5, 7,5 hăng 6,5 yua anun plai ƀiă ngă tơnap tap duh kmlai mơng kông ti amăng 6 blan akŏ thun 2021. Mơng thun 2020 sang bruă prăk hơmâo sem lăng hăng pơhrŏ trun truh abih thun 2021. Bruă hrŏ trun kmlai anai ăt djru brơi kông ti dưi pơsir hĭ hơdôm bruă tơnap tap amăng thun blan laih rơgao”.

Djru brơi sang hră pơtô čơđai čan prăk

Ơi Lê Hồng Phong lĕ mơnuih tuh pơ alin man pơdong Sang hră pơtô čơđai anet Phong Lan, ƀơi tơring kual Quảng Phú, tơring čar Čư̆ M’gar găn rơgao rơbêh 10 thun anai. Mơng hrơi klin Covid-19 hơđuh đĭ, đa sang hră khŏm brơi čơđai pơdơi hơdôm blan. Ră anai rĭm hrơi kơnong brơi hrăm 70 čô čơđai đôč, dưm dưm 1/4 pơhmu hăng hlâo anun. 13 čô nai pơtô pơtô pơplih nao rai. Sang hră akŏ pơdong mă, yua anun tơdah nai pơtô ƀu hơmâo pơtô amra ƀu hơmâo prăk apah. Ơi Phong brơi thâo: Ñu ăt hơmâo sang bruă prăk djru brơi čan prăk mă kmlai ƀiă mơn.

“Sang bruă prăk iâu hăng tơña bruă mă bưp tơnap tap hiưm pă ñu ?hăng črâo brơi bruă ngă hră pơ-ar. Sang bruă prăk ăt ngă gêh gal amăng bruă čan prăk mă kmlai ƀiă. Tui tơlơi sit nik ră anai kâo kiăng sang bruă prăk brơi čan mă kmlai ƀiă dong amăng tal hơđuh đĭ klin anai, hăng brơi tla hnưh sui thun ƀiă dong. Dua dong lĕ tơdah brơi čan sang bruă amra čan wŏt prăk pioh apah brơi nai pơtô, djru brơi ƀing nai pơtô amăng hrơi blan hơmâo klin anai”.

Ngă tui tơlơi git gai mơng Kơnuk kơna, sang bruă prăk dêh čar Việt Nam - Agribank kual Kơdư Daklak glăk djru brơi mơnuih ƀon sang čan prăk mă kmlai ƀiă yua bơbeč mơng klin Covid-19

Ơi Nguyễn Quang Vinh - Kơ-iăng khua sang bruă prăk ngă hmua hăng pơđĭ kyar ƀon lan kual Kơdư Daklak brơi thâo.

Amăng 2 thun klin hơđuh đĭ laih rơgao anom bruă Agribank kual kơdư Daklak hơmâo djru brơi mơnuih ƀon sang sang pơsir hĭ tơnap tap hăng hơkrŭ glăi bơwih ƀong huă sĭ mơdrô anun lĕ: pơplih thun blan tla hnưh, hrŏ trun kmlai hăng mrô mơnuih, anom bruă čan lĕ 2.277, hăng hnưh đom lĕ 451 klai prăk. Brơi čan mă kmlai ƀiă 735 klai prăk, hăng rơnoh prăk hmâo jao lĕ 337 klai prăk, amăng anun hơmâo 19 boh anom bruă hơmâo jao prăk lĕ 144 klai prăk. hrŏ trun kmlai brơi ƀing mơnuih, anom bruă čan hlâo anun hăng kmlai mơng 1 truh pơ 3% tui hluai mơnuih. Mơng hrơi hơđuh đĭ klin Agribank kual kơdư Daklak hơmâo pơgiong hră pơ-ar brơi 31.500 čô mơnuih, anom bruă brơi čan 16.320 klai prăk. Agribank kual kơdư Daklak hơmâo pơgôp djru djop anom bruă găn rơgao tơnap tap kiăng hơđong bơwih ƀong huă sĭ mơdrô.

Siu Đoan: Pơblang