VOV4.Jarai - Daklak amra pơphun plĕ hră glăi ƀơi 3 ƀut plơi pla kiăng kơ ruah khua khul pơ ala mơnuih ƀon sang gưl să, anai lĕ tơlơi lăi pơthâo mơng jơnum min plĕ hră tơring čar Daklak ba tơbiă amăng jơnum lok 5 mơng Jơnum min plĕ hră tơring čar phrâo anai. Tui anun ƀơi 3 ƀut plơi pla, lĕ 3 nih pơphun plĕ hră; ƀut plơi 9, 10, 11 să Čư̆ San, tơring glông M’Drăk amra pơphun glăi hrơi plĕ hră amăng hrơi tơjuh, (lơ 6/6/2021) kiăng kơ ruah khua khul pơ ala mơnuih ƀon sang gưl să.

Ƀing khua mua pơčrông sai hlâo kơ ba tơbiă tơlơi pơsit

Ba truh tơlơi anai lĕ, yua amăng lơ 23/5 mrô mơnuih nao plĕ hră ƀơi anai aka truh 50% tui hăng mrô mơnuih hơmâo čih anăn nao plĕ hră. Amăng jơnum phrâo anai, Jơnum min plĕ hră tơring čar Daklak ăt hluai tui tơlơi pơsit lăi pơthâo mrô hră plĕ hăng mrô mơnuih tơbiă anăn lĕ 75 čô ruah ngă khua Khul pơ ala mơnuih ƀon sang tơring čar Daklak tal X, rơwang thun 2021-2026 ƀơi 20 anih pơphun plĕ hră ruah khua Khul pơ ala mơnuih ƀon sang tơring čar.

Siu Đoan: Pơblang