VOV4.Jarai - Kơnuk kơna hơmâo pơtrun tơlơi pơsit mrô 63/NQ-CP kơ hơdôm bruă jao, hơdră bruă akŏ phun kiăng pơtrut pơđĭ kyar bơwih ƀong huă, djru čan prăk tuh pơ alin bruă amăng dêh čar hăng sĭ gơnam pơ tač rơngiao hơđong kjăp amăng hơdôm blan rơnuč thun 2021 hăng akŏ thun 2022. Mơmŏt lơ 12/7, tui tơlơi pơhing mơng Khul sang bruă prăk Việt Nam (VNBA) brơi thâo hơmâo 16 boh sang bruă prăk sĭ mơdrô hơmâo tŭ ư hrŏ trun kmlai prăk čan djru brơi anom bơwih ƀong sĭ mơdrô găn rơgao tơnap tap mơng klin Covid-19. Hơdôm anom bơwih ƀong sĭ mơdrô amăng tơring čar Daklak đing nao biă mă kơ bruă anai, yua anai lĕ tơlơi gal kiăng ƀing gơñu găn rơgao tơnap tap, hơkrŭ glăi bơwih ƀong huă, sĭ mơdrô.

Tui hăng mrô jŭ yap mơng Sang bruă prăk Kơnuk kơna tơring čar Daklak: Truh lơ 31/5/2021, hơdôm anom bruă čan prăk amăng tơring čar hơmâo abih bang mrô hnưh đom yua bơbeč mơng klin Covid-19 lĕ 15.436 klai prăk. Ră anai, hơdôm anom bruă brơi čan prăk hơmâo hrŏ trun kmlai aset ƀiă brơi kơ 7.892 čô mơnuih čan prăk hăng abih tih hnưh đom lĕ 6.401 klai prăk, mrô kmlai hrŏ trun lĕ 8 klai 814 klăk prăk. Bruă hơdôm sang bruă prak  hrŏ trun kmlai hăng hơdôm anom bơwih ƀong sĭ mơdrô, djru brơi ƀing gơñu plai ƀiă tơnap tap. Samơ̆ anai lĕ mrô pơhrŏ trun dŏ aset đôč.

Mơnuih ƀơi Daklak čang rơmang sang bruă prăk phrŏ trun kmlai tui tơlơi črâo trun mơng Kơnuk kơna hăng Sang bruă prăk dêh čar Việt Nam kiăng găn rơgao tơnap tap ră anai

Khua sa boh kông ti bơwih ƀong sĭ mơdrô kơphê ƀơi tơring glông Krông Pač, tơring čar Daklak brơi thâo: Ră anai kông ti glăk đom hnưh giăm 50 klai prăk. Thun 2020 kông ti hơmâo sang bruă prăk pơhrŏ trun kmlai. Samơ̆ thun 2021 anai, kmlai ăt dŏ hơđong mơ̆n.

Ơi Nguyễn Hưũ Hoàng Dương, Khua kông ti sĭ mơdrô gơnam pơ tač rơngiao Hoàng Dương Ban Mê brơi thâo: Ră anai kông ti glăk đom hnưh sang bruă prăk 8 klai 700 klăk prăk, hăng kmlai duh 9,9% amăng ha thun. Dua thun giăm anai bruă bơwih ƀong sĭ mơdrô mơng kông ti gun hĭ yua klin Covid-19. Gơnam tam tơnap ba sĭ mơdrô, lơ̆m anun nua blơi gơnam tam pioh pơkra pơjing đĭ kơtang, kmlai duh sang bruă prăk ăt ƀu hrŏ trun lơi.

“Ră anai anom bơwih ƀong sĭ mơdrô aka ƀu ƀuh mrô prăk čan mơng sang bruă prăk kiăng kơ djru brơi anom bơwih ƀong sĭ mơdrô. Amăng hrơi blan hơmâo klin, dua thun laih rơgao anom bơwih ƀong sĭ mơdrô tơnap tap biă mă. Gơnam tam ƀu dưi ba hyu sĭ mơdrô pơ tơring čar pơkŏn yua anun ngă tơnap tap. Čang rơmang sang bruă prăk ngă gêh gal brơi anom bơwih ƀong sĭ mơdrô dưi găn rơgao tơnap amăng thun blan hơmâo klin ră anai. Čang rơmang sang bruă prăk amra hrŏ trun kmlai brơi kông ti, kiăng kông ty dưi tla hnưh hăng klmai aset ƀiă kah mơng dưi gă rơgao tơnap tap”.

Agribank kơdư Daklak lĕ sang bruă prăk glăk pok pơhai pơhrŏ kmlai hăng brơi anom bơwih ƀong sĭ mơdrô čan prăk yua bơbeč mơng klin Covid-19

Ơi Nguyễn Văn Sanh , Khua anom bơwih ƀong sĭ mơdrô gah ngă hmua Thanh Bình, să Dur Kmăl, tơring glông Krông Ana brơi thâo; Bơyan puih phang laih rơgao, Anom bơwih ƀong hrŏm gah ngă hmua Thanh Bình hơmâo gum hrŏm hăng Anom bruă kơsem min hăng pơđĭ kyar pơjeh phun pla Việt Nam pơtô brơi boh thâo amăng bruă ngă hmua pơdai pioh sĭ mơdrô hăng pơjeh pơdai Đài thơm 8 tui VietGAP brơi kơ ding kơna mơng anom bruă. Bruă anai hwomâo pok rai jơlan bơwih ƀong hle, bruă uă pơdai sir, hiam hloh. Kơnong ơi Sanh hơmâo gơgrong hăng lŏn sang hăng kông ngăn amăng sang anŏ kiăng kơ čan 3 klai 400 klăk prăk tuh pơ alin bơwih ƀong sĭ mơdrô. Truh ră anai, ơi Sanh ăt kah hăng ƀing ding kơna amăng grup bơwih ƀong hrŏm aka ƀu hơmâo sang bruă prăk pơhrŏ brơi kmlai.

“Ră anai glăk kơƀah prăk pioh bơwih ƀong huă, biă mă ñu rơnoh prăk pơgăn hŭi ia dăo, khŏt ia, pơkra minh kiăng lu prăk mơn. Kơ bruă ngă hrŏm hơmâo sa, dua ding kơna, hrŏm hăng khua grup gơgrong hăng kông ngăn amăng sang anŏ kiăng kơ čan prăk sang bruă prăk pioh duh prăk apui lơtrik hăng pơkra ming anŏ răm rai, laih dong prăk apah mơnuih mă bruă. Truh ră anai aka ƀu hơmâo sang bruă prăk djru brơi, pơhrŏ trun kmlai. Čang rơmang, amăng hrơi hơmâo klin anai sang bruă prăk amra pơhrŏ trun kmlai”.

Tơlơi lăi pơthâo kơ bruă 16 boh sang bruă prăk sĭ mơdrô, Khul sang bruă prăk Việt Nam (VNBA) tŭ ư hrŏ trun kmlai brơi čan djru brơi hơdôm anom bơwih ƀong sĭ mơdrô găn rơgao tơnap tap amăng hrơi blan hơmâo klin Covid-19. Anai lĕ tơlơi mơ̆ anom bơwih ƀong sĭ mơdrô dŏ tơguăn.

Siu Đoan: Pơblang