VOV4.Jarai - Yang hrơi dong lơ 9/8, tơring čar Daklak hơmâo pơphun ba mơn glăi hăng mrô 478 čô mơng ƀôn prong Hồ Chí Minh glăi pơ plơi pla. Anai lĕ ƀing mơnuih blung a arăng ba glăi pơ Daklak mơng kual hơmâo klin.

Grup hyu mă bruă djru ba mơnuih glăi pơ plơi pla

478 čô mơnuih glăi tal anai lĕ: Ƀing tha rơma, ƀing čơđai, đah kơmơi pi kian, đah kơmơi glăk ƀă ană anet pơ gŭ 36 blan; ƀing mơnuih nao khăm pơjrao tơlơi ruă, ƀing nao čuă sang anŏ ruă kă, mơnuih hyu mă bruă aka ƀu dưi glăi; lĕ ƀing mơnuih hơmâo hơdră djru rĭm blan;  ƀing mơnuih amăng sang anŏ hăng čơđai pơ gŭ 10 thun, tha rơma, đah kơmơi pi kian, mơnuih ruă kă… anai lĕ ƀing kiăng glăi pơ plơi pla.

Rơdêh Phương Trang arăng djru prăk kiăng kơ pơgiăng glăi mơnuih tal anai

Mơnuih ƀon sang arăng čơkă glăi hơmâo hră pơčrang lăng huăi ƀă klin Covid-19. Tơdơi kơ glăi pơ plơi pla, mơnuih plơi pla pơpă amra ba nao pơčlah pơƀut amăng tơring glông anun 14 hrơi laih dong pơčlah dong pơ sang 7 hrơi. 22 boh rơdêh  nao pơgiăng mơnuih glăi lĕ rơdêh Phương Trang, rơdêh anai arăng amra djru brơi prăk kak.

Siu Đoan: Pơblang