VOV4.Jarai - Bơyan kơphê thun 2021-2022 prap truh hrơi pĕ pơhrui yơh, Daklak kiăng hơdôm rơtuh rơbâo čô mơnuih pĕ kơphê. Samơ̆, amăng hrơi blan klin Covid-19 dŏ ngă tơnap tap yua anun bruă ĕp mơnuih pĕ kơphê, pơhlôm pơgang klin, lĕ bruă bơngŏt mơng mơnuih ngă hmua hăng gong gai tơring čar Daklak. Tui lăi pơthâo mơng Gơnong bruă ngă hmua - pơđĭ kyar ƀon lan tơring čar Daklak, bơyan kơphê thun 2021-2022, Daklak hơmâo rơbêh 209 rơbâo ektar, hăng dưi pơhrui glăi 500 rơbâo tơ̆n.

Kiăng pơhlôm kơ bruă pĕ pơhrui bơyan pơ anăp anai, hơdôm tơring glông kiăng gơgrong amăng bruă ĕp mơnuih pĕ pơhrui kơphê brơi lăp djơ̆ hăng tơlơi sit nik mơng klin kman glăk lar hyu ră anai. Jơnum min mơnuih ƀon sang tơring čar jao gơnong bruă ngă hmua hăng pơđĭ kyar ƀon lan git gai, gum hrŏm hăng djop gơnong bruă, anom bruă kiăo tui lăng tơlơi pơhing, pơphun črâo ba Jơnum min mơnuih ƀon sang hơdôm tơring glông, plơi prong pơjing akŏ bruă pĕ pơhrui kơphê brơi tŭ yua hăng rơnuk rơnua.

Siu Đoan: Pơblang