VOV4.Jarai - Ƀrô djơ̆ tal hơdor glăi 39 thun hrơi pioh kơ nai pơtô čơđai sang hră Việt Nam 20/11, mơguah lơ 19/11, Gơnong bruă pơtô pơhrăm tơring čar Daklak pơphun ƀơk hră pơ-anăn nai pơtô čơđai mơbruă hăng bơni hơdôm gru ba jơlan hlâo, nai pơtô mơbruă amăng thun hrăm 2020-2021. Thun hrăm 2020-2021, khă bơdjơ̆ nao mơng klin Covid-19 samơ̆ Gơnong bruă pơtô pơhrăm tơring čar hmâo laih hơdôm bôh tơhnal klă.

Anô̆ klă bruă pơtô pơhrăm dưi djă pioh hăng pơđĭ dlông; hmâo 41 čô čơđai hmâo mă pri čơđai hrăm rơgơi lŏn ia ta, Daklak ba jơlan hlâo hơdôm tơring čar kual kơtuai ia rơsĭ Dơnung Tŏng Krah hăng Dăp Kơdư. Ƀrô djơ̆ tal anai, tŭ mă tơlơi dưi jao mơng Khua mir sir dêh čar, Khua tơring čar Daklak hmâo ƀơk laih hră pơ-anăn Nai pơtô mơbruă kơ nai Nguyễn Ngọc Thái – nai pơtô Sang hră gưl 3 chuyên Nguyễn Du, plơi prong Buôn Ma Thuột, tơring čar Daklak; ƀơk miđai mă bruă dăp tal 3, Khăn gru mơng Kơnuk kơna, hră bơni mơng Khua dêh čar, Khăn gru bơkơtưn mơng Ding jum pơtô pơhrăm kơ hơdôm mơnuih khul grŭp hmâo bôh than prong amăng bruă pơtô pơhrăm./.   

Siu H’ Prăk: Pô pơblang