VOV4.Jarai - Kiăng kơ pơtrut pơsur ƀing čơđai mơnuih djuai ania ƀiă gir kơtir hrăm hră, tlam lơ 12/11, Khul pơlir hơbit hlăk ai Việt Nam tơring čar Daklak gum hrŏm hăng Khul čơđai hrăm hră gưl prong Việt Nam tơring čar pơphun mông bưp ƀô̆ mơta, pơpŭ ƀing čơđai sang hră gưl prong mơnuih djuai ania ƀiă tal 23, amăng thun 2021. Yua kơ klin dŏ ngă tơnap tap yua anun mông pơbưp anai pơphun lăng nao rai mơng ataih hăng 15 anih lăng nao rai ƀơi hơdôm tơring glông, plơi prong amăng tơring čar.

65 čô čơđai djuai ania ƀiă tơring čar Daklak hrăm hră rơgơi amăng thun hrăm 2020-2021 hơmâo arăng pơpŭ

Tơring čar Daklak ră anai hơmâo giăm 9.800 čô čơđai glăk kiăo tui hrăm ƀơi hơdôm sang hră cao đẳng, đại học amăng đơ đam dêh čar; amăng anun hơmâo rơbêh 2.000 čô čơđai djuai ania ƀiă. Amăng mrô anai hơmâo lu čơđai ba gru hrăm hră thâo rơgơi, gir mut hrŏm amăng djop bruă gum djru mơnuih mơnam. Amăng mông pơbưp anai, ƀing čơđai hơmâo pơlăi nao rai tơlơi thâo thăi amăng hrăm hră, pran gir un găn rơgao tơnap tap hăng pioh hrơi mông kiăng kơ mut hrŏm amăng bruă gum djru mơnuih. Tal anai, khul pơphun ăt pơpŭ brơi 65 čô čơđai djuai anai ƀiă amăng tơring čar Daklak gir kơtir amăng hrăm hră hăng jing ƀing čơđai hrăm hră rơgơi hloh amăng thun hrăm 2020-2021.

Siu Đoan: Pơblang