VOV4.Jarai -  Tơdơi kơ ƀôn prong Hồ Chí Minh hăng hơdôm bôh tơring čar kual Dơnung dêh čar phru tơlơi dô̆ čơlah, mơng lơ 2 truh kơ mơguah lơ 4/10, tơring čar Daklak hmâo tŭ mă giăm truh 7.000 čô mơnuih mă bruă pơwot glăi mơng hơdôm bôh tơring čar gah Dơnung dêh čar. Lom pok pơhai pơčrang lăng test tañ kơ mrô mơnuih anun hmâo čih pioh 14 čô mơnuih ƀă kơman.

Amăng mrô giăm truh 7.000 čô mơnuih mă bruă ƀơi hơdôm bôh tơring čar gah Dơnung dêh čar glăi mă pô pơ̆ Daklak, truh lơ 4/10, Gơnong bruă ia jrao Daklak hmâo pok pơhai ngă tui khul pơphun mă ia adung pơčrang lăng test tañ brơi rơbêh kơ 6.000 čô mơnuih. Rơgao kơ anun hmâo čih pioh 14 čô mơnuih ƀă kơman klin, dưm dưm hăng 0,2%. Hơdôm čơđeh ia adung anai hmâo mơ-ĭt laih kơ Anom wai lăng tơlơi duam ruă tơring čar hăng Anom kơsem min klin ruă Tây Nguyên kiăng pơčrang lăng pơsit Realtime RT-PCR. Rơgao kơ ruah pơpha mơnuih mă bruă, amăng mrô rơbêh kơ 7.000 čô mơnuih glăi pơ̆ tơring čar hmâo giăm truh 60% mrô mơnuih hmâo tlâ̆o vaccine pơgang Covid-19 ară tal sa; mơnuih hmâo tlâ̆o ară tal 2 hmâo mrô rơbêh kơ 9%; hăng 764 čô mơnuih F0 hmâo pơjrao suaih tơlơi ruă Covid-19, dưm dưm hăng rơbêh kơ 11%./.

Siu H’ Prăk: Pô pơblang