VOV4.Jarai - Ƀơi anăp tơlơi klin ruă Covid-19 glăk ngă tơnap tap, hơdôm rơtuh čô čơđai gưl dlông hrăm bruă ia jrao ƀơi Daklak hmâo rơkâo gum djru pơgang pơgăn klin, djru pran hrom hăng khul mă bruă ia jrao ƀơi anih klin ngă.

Giăm hmâo 2 blan rơgao, čơđai gưl dlông Trần Ngọc Hải hăng grŭp čơđai gưl dlông gum djru mơng Anom pơtô bruă pơkra jrao, Sang hră đại học Tây Nguyên gum hrom djru bruă pơgang pơgăn klin ƀơi Anom ia jrao plơi prong Buôn Ma Thuột, tơring čar Daklak. Rim hrơi mă bruă mơng grŭp pơphun mơng 7 mông 30 mơnit mơguah hăng sui truh 11 mông mlăm, hmâo hrơi đa khom dưh truh kơ 4 mông hrơi tơdơi kah mơng pơđut. Bruă mă mơng gơñu lĕ pơpha djuai, mă ia adung pơčrang lăng hăng pơmut amăng măi. Trần Ngọc Hải lăi pơthâo, hmư̆ hing Gơnong bruă ia jrao iâu pơhrui čơđai gưl dlông gum djru gum hrom pơgang pơgăn klin Covid-19, ñu hmâo rơkâo gum hrom hăng hmâo 2 wot nao pơ̆ anih klin ngă kơtang.

“Kâo rơkâo gum hrom pơgang pơgăn klin hmâo 2 tal, tal hlâo kâo nao pơ̆ Bình Dương, tơdơi kơ anun kâo glăi hăng rơkâo nao pơ̆ plơi prong Buôn Ma Thuột. Kâo ƀuh sa čô čơđai gưl dlông lĕ kâo khom rơkâo nao pơgang pơgăn klin kiăng lŏn ia tañ abih klin hloh, hăng pô dưi tuh rơyuh pran jua hlăk ai pô hơdôm hơpă kơ lŏn ia lĕ pô tuh rơyuh”.

Hrom hăng hơdôm khul pơkon, ƀing čơđai gưl dlông hrăm bruă ia jrao ƀơi Daklak glăk hrơi mlăm gum djru klă bruă pơgang pơgăn klin

Ăt kah hăng Trần Ngọc Hải, mơng blan 6 truh ră anai hmâo laih hơdôm rơtuh čô čơđai gưl dlông hrăm bruă ia jrao ƀơi tơring čar Daklak hmâo rơkâo gum hrom djru bruă pơgang, pơgăn klin. Hrom hăng gum djru brơi tơring čar Bình Dương, čơđai gưl dlông gơgrong pô rơkâo nao gum djru dưi pơpha djru gum ƀơi Anom ia jrao plơi prong Buôn Ma Thuột, Anom wai lăng tơlơi duam ruă tơring čar, kơtưn djru bruă pel ĕp klin ruă, pơmut mrô amăng măi, pơčrang lăng kơman Covid-19, djru pơčrang lăng tañ kơ mơnuih ƀôn sang amăng hơdôm kual guang dar,... Yak rơgao hơdôm tơlơi glêh tơnap mơng bruă mă hăng tơlơi bơngot amra lar tưp hyu klin, ƀing čơđai gưl dlông leng kơ ƀuh mơ-ak hăng ư-ang yua kơ drơi pô hmâo djru hrom laih bruă pơgang, pơgăn klin Covid-19. Anai ăt lĕ tơhnal kiăng rim čơđai sang hră gưl dlông dưi mă yua bôh thâo mơng pô hmâo hrăm pioh mă bruă pơkom pioh lu tơlơi găn rơgao amăng bruă mă tơdơi anai. Čơđai sang hră gưl dlông Nguyễn Thị Thanh Nga, gah Anom hrăm pơkra ia jrao, Sang hră đại học Tây Nguyên ruai glăi:

“Dong mơng hrơi lom Gơnong bruă ia jrao hăng sang hră iâu pơthưr hơdôm khul gum hrom pơgang pơgăn klin lĕ kâo hmâo rơkâo gum hrom kiăng djru ƀing adơi ayong gah gơnong bruă ia jrao, yap truh ră anai hmâo 4 blan laih. Kâo ăt kiăng djru hrom mơn pran pô pioh djru plơi prong pơtrut kơdun hĭ klin ruă anun kâo čang rơmang Daklak ăt kah hăng Buôn Ma Thuột tañ pơtrut kơdun hĭ klin ruă”.

Ƀing čơđai hrăm gưl dlông gah bruă ia jrao dưi iâu nao gum Anom ia jrao plơi prong Buôn Ma Thuột

Hăng pran jua hur har hlăk ai, ƀing čơđai gưl dlông rŏng gơgrong pô hyu gum djru leng kơ mă bruă tơpă hăng hmâo tơlơi gơgrong. Tơlơi hur har mơng gơñu dưi hmâo mơnuih ƀôn sang čih pioh hăng pơsit yôm. Yă Nguyễn Thị Thanh Hương, Khua ƀôn Alê A, phường Ea Tam, plơi prong Buôn Ma Thuột brơi thâo:

“Amăng hơdôm hrơi rơgao ƀuôn kâo hmâo ƀing adơi ayong čơđai gưl dlông Sang hră đại học Tây Nguyên rai gum hrom klă biă, hur har pran jua biă, bơwih brơi djop bruă hăng ngă abih pran gơgrong mơng pô. Lăi hrom tơlơi gum hrom kơplah wah plơi pla hăng ƀing čơđai gưl glông ăt klă mơn. Hlâo kơ čơđai gưl dlông rai lĕ kâo ăt lăi pơthâo mơn hăng ƀing gơñu kiăng djop mơnuih thâo anih anom pô test ƀơi hơpă. Ƀing čơđai rŏng nao mă hăng lăi hrom lĕ klă biă, hur har pran jua biă hăng mơnuih ƀôn sang”.

Grŭp čơđai gưl dlông Sang hră đại học Tây Nguyên nao gum djru kơ tơring čar Bình Dương pơgang pơgăn klin

Khă bŏng glăi hăng lu tơhnal amra truh samơ̆ ƀing čơđai gưl dlông hrăm gah bruă ia jrao ƀơi Daklak ăt hrơi mlăm gum hrom mơn hăng ƀing mă bruă ia jrao ƀơi anih pơgang, pơgăn klin. Gơñu kơnong kơ čang rơmang hăng pran jua gum hơgôp mơng pô amra djru ngă kơdun hĭ klin ruă kiăng drơi pô ăt kah hăng ƀing ơi nai ia jrao glăk mă bruă tañ dưi pơwot glăi hăng sang anô̆; hơdôm kual mơtah, kual pơhlôm amra ƀơ ƀrư̆ dưi lu tui hăng tơlơi hơdip mơda amra tañ pơwot glăi kah hăng hlâo adih. Lom mơ̆ klin ruă dô̆ mơn lĕ pran jua hăng bruă gơgrong, ƀing čơđai gưl dlông hrăm gah bruă ia jrao ăt amra ba jơlan hlâo nao gum hrom mơn kiăng djru bruă pơgang pơgăn klin. Čơđai Nguyễn Đức Duy, Hrăm gah bruă pơkra ia jrao, Sang hră đại học Tây Nguyên pơsit pran jua:

“Amăng hơdôm hrơi pơ̆ anăp mơ̆ klin ruă dô̆ ngă tơnap mơn thơ kâo ăt amra gum hrom mơn. Lom gum hrom kâo ăt čang rơmang mơn pô amra gum hơgôp sa črăn pran jua pô kiăng djru tơlơi klin ruă tañ rơgao hĭ pioh ƀing ta dưi pơwot glăi tơlơi hơdip hơđong"”

Mơng hrơi klin Covid-19 ngă tal 4 truh ră anai, tơring čar Daklak hmâo iâu pơhrui giăm truh 800 wot čô čơđai gưl dlông, mơnuih apăn bruă hăng mơnuih mă bruă mơng hơdôm bôh sang hră đại học amăng tơring čar kiăng djru hơdôm khul phun pơgang pơgăn klin. Hăng pran hlăk ai, pran jua ba jơlan hlâo, yak rơgao hơdôm tơlơi tơnap, glêh tơnap hăng huĭ rơhyư̆t, ƀing čơđai gưl dlông hrăm gah bruă ia jrao hmâo mă yua klă hơdôm bôh thâo gah gơnong bruă dưi pơtô pơhrăm, gum hrom mơnuih apăn bruă, mơnuih mă bruă ia jrao ngă tui bruă jao, djru pran hrom pơtrut kơdun klin Covid-19 kiăng tañ ngă brơi tơlơi hơdip pơwot glăi kah hăng hlâo adih./.

H’ Xíu: Čih – Siu H’ Prăk: Pơblang