VOV4.Jarai -  Hơdôm hrơi rơgao, tơring čar Daklak hmâo dong laih rơbêh kơ 17 rơbâo čô mơnuih mơng hơdôm tơring čar gah kual Dơnung dêh čar pơwot glăi plơi pô, khom dô̆ čơlah tui tơlơi pơkă pơgang pơgăn klin Covid-19. Hrom hăng anun lĕ hơdôm rơbăn čô mơnuih glăi pơ̆ kual Tŏng Krah dêh čar, nao pơ̆ kual Pơngŏ ataih yaih, ăt găn tơring čar Daklak. Hơdôm grŭp gơnong bruă, khul mơnuih gum hrom tơring čar hmâo gum pơčruh gơnam ƀong huă, djru asơi huă kơ mơnuih ƀơi jơlan glăi plơi hăng mơnuih dô̆ čơlah hơđong pran jua pơgang pơgăn klin. Bruă mă anai hmâo djru laih kơ bruă glăi plơi dô̆ bưp tơnap, glêh glar.

Ƀơi jơlan mơng ƀôn prong Hồ Chí Minh glăi plơi pơ̆ Quảng Nam, amai Đỗ Thị Thanh Châu dưi djru pran wot gơnam tam hăng pran jua. Lom pơdơi tơkai ƀơi anih djru asơi huă hăng ia mơñum gah anăp Sang hră gưl 2 Trần Phú, să Hòa Phú, plơi prong Buôn Ma Thuột, tơring čar Daklak, ñu ol kơdol pran jua biă:

“Hmâo asơi, ia, ia tơsâu rơmô djop djel. Mơguah ăt hmâo mơn hơdôm mơnuih brơi prăk kơ čơđai. Kâo ƀuh mơ-ak pran jua biă. Tal blung a nao lĕ rơngôt biă, samơ̆ tơbiă laih ƀuh tơlơi kiăng khăp lu biă anun djru pran jua mơng pô lĕ mơ-ak biă hăng hơdor na nao tơlơi kiăng khăp mơng abih bang ƀing adơi ayong adơi amai gum djru”.

Hơdôm mơnuih gum djru tơnă hơbai ƀơi hơdôm anih tơnă hơbai gum djru

Hơdôm hrơi rơgao, Khul ia jrao kyâu bơrơkal mriah tơring čar Daklak gum hrom hăng hơdôm grŭp gum djru hmâo tơnă hơbai ha rơbâo anung asơi huă rim hrơi djru mơnuih mơng hơdôm bôh tơring čar gah Dơnung dêh čar pơwot glăi. Hơdôm anung asơi, anung bur ƀudah ƀañ mi hmâo ƀơ ƀiă ngă plai ƀiă tơlơi glêh glar mơng mơnuih ƀôn sang pơwot glăi plơi. Yă Trần Thị Phương Thu, Kơ-iăng Khua Khul ia jrao kyâu bơrơkal mriah tơring čar Daklak brơi thâo: rim hrơi hmâo mơng 5.000-6.000 anung asơi dưi hmâo hơdôm grŭp mơnuih gum djru, anih tơnă hơbai gum djru hmâo ba nao laih pơ̆ hơdôm anih anom djru gum ƀơi jơlan mrô 14 (gah să Hoà Phú, plơi prong Buôn Ma Thuột). Khul hmâo pơphun pơpha hrơi mông hăng anih anom tŭ mă kiăng plai ƀiă bruă mơnuih ƀôn sang tum pơƀut lu mơnuih ƀơi sa anih anom.

“Ră anai, ƀơi hơdôm anih dô̆ gak wai lăng klin ƀơi anih mut gah plơi prong Buôn Ma Thuột, tơring čar hmâo črâo ba kơnong kơ lăi pơthâo hăng pơpha glông kơ hơdôm bôh tơring glông čơkă mơnuih glăi pơ̆ tơring glông, pơphun test tañ hăng ruah mă brơi dô̆ čơlah. Ƀơi anăp tơlơi anun, Khul ia jrao kyâu bơrơkal mriah tơring čar hmâo črâo ba laih kơ hơdôm bôh tơring glông, plơi prong djru dong kơ mơnuih glăi plơi gah gơnam ƀong huă hăng ia mơñum. Hrom hăng anun pơdŏng jơlan gah pơsur, pơtrut hơdôm anih tơnă hơbai kiăng djru bruă pơgang, pơgăn klin ƀơi tơring čar”.

Hơdôm anung asơi dưi anung kơđiăng brơi kơ hơdôm anih anom gum djru

Ƀu djơ̆ kơnong kơ ƀơi plơi prong Buôn Ma Thuột ôh mơ̆, hơdôm hrơi rơgao ƀơi hơdôm bôh tơring glông amăng tơring čar Daklak rôk tui jơlan mrô 14, lu anom bruă gum hrom, mơnuih gum djru hăng hơdôm khul grŭp plơi pla ăt gum hrom pơphun mơn lu anih anom djru gum kiăng djru brơi kơ mơnuih glăi plơi găn nao.

Hrom hăng bruă gum djru mơnuih ƀơi jơlan, hơdôm hrơi rơgao, hơdôm grŭp hăng mơnuih ƀôn sang ƀơi Daklak ăt hmâo pơphun laih hơdôm anih tơnă hơbai brơi đôč kiăng djru hơdôm mơnuih khom dô̆ čơlah hơbit. Yă Hoàng Thị Thu Hương, Khua Khul pơlir hơbit đah kơmơi să Xuân Phú, tơring glông Ea Kar gơgrong “anih tơnă hơbai brơi đôč” ƀơi anai, brơi thâo, ră anai anih tơnă hơbai hmâo rơbêh kơ 100 čô mơnuih gum hrom, rim hrơi hmâo mơng 5 truh 10 čô adơi amai pơplih nao rai tơnă hơbai. Truh ră anai ƀing gơñu hmâo djru laih rơbêh kơ 10.000 anung asơi brơi đôč djru mơnuih glăi plơi nao dô̆ pơ̆ anih čơlah.

“Mơng bôh nik mơnuih ƀôn sang kah hăng abih bang nao mă bruă ataih glăi tơnap tap soh hăng hơdôm grŭp hyu pơsur mơnuih ƀôn sang djă pioh mơng hrơi hmâo klin ngă truh kơ ră anai. Pran jua mơng adơi amai hur har biă, đa lĕ lu adơi amai ƀing gơmơi ƀu kiăng pơsur ôh, sit hlơi hmao wăn lĕ nao gum djru kah hăng bruă mơng sang anô̆ pô. Blung a ƀing gơmơi pơsur hơdôm bôh sang anô̆ hmâo ană bă, hmâo mơnuih dô̆ čơlah ƀơi plơi pla nao gum hrom tơnă hơbai, kiăng thâo ƀing gơmơi tơnă hơbai pơhlôm, jơman, hơdjă mơn”.

Djru brơi đô̆č asơi huă kơ mơnuih pơwot glăi plơi hơđong pran jua dô̆ čơlah

Tui hăng ơi Đào Đức Hoàn, Khua Jơnum min mơnuih ƀôn sang să Xuân Phú, hơdôm hrơi rơgao hmâo rơbêh kơ 100 čô mơnuih glăi mơng hơdôm bôh tơring čar Dơnung dêh čar glăi plơi, glăk dô̆ čơlah hơbit ƀơi hơdôm sang rông hơdôm bôh plơi. Kiăng neh wa hơđong pran jua dô̆ čơlah, gong gai plơi pla hăng hơdôm grŭp hmâo pơsur anom bơwih ƀong, hơdôm mơnuih gum djru gum hơgôp kơ “sang apui tơnă brơi đô̆č”, djru hơdôm kual dô̆ čơlah hơbit.

“Mơnuih ƀôn sang glăi tal blung a bưp lu tơlơi tơnap biă. Samơ̆ tơdơi kơ dua hrơi gơñu ƀuh bruă djru mơng hơdôm grŭp ăt kah hăng pran jua mơng plơi pla kơ bruă pơgang, pơgăn klin lĕ gơñu hơđong pran jua laih, ngă tui klă hơdôm tơlơi pơkă kơ pơgang pơgăn klin ruă Covid-19. Truh mông anai să Xuân Phú hmâo čơkă laih rơbêh kơ 1.000 čô mơnuih amăng hơdôm tal glăi dô̆ čơlah ƀơi să. Abih bang ƀu hmâo gum hơgôp hơget ôh kơ hơdôm mông ƀong huă ƀơi kual dô̆ čơlah. Ră anai bruă pơgang pơgăn klin ruă mơng să ƀing gơmơi bưp lu tơlơi gêh gal biă yua kơ mơnuih ƀôn sang gum tơngan hrom kiăng djru brơi hơdôm mơnuih nao mă bruă pơwot glăi”.

Hơdôm anung asơi, čơlŭ bur ƀudah ƀañ mi, get ia mơñum dưi brơi tơl tơngan mơnuih ƀơi jơlan pơwot glăi hăng hơdôm mơnuih khom dô̆ čơlah pơdah pran jua kiăng khăp sit nik mơng mơnuih ƀôn sang Daklak hăng hơdôm mơnuih tơnap tap. Bruă mă khăp kiăng mơng mơnuih ƀôn sang Daklak hmâo djru laih kơ bruă pơwot glăi plơi pla dô̆ tơnap tap đô̆č./.

            VOV Tây Nguyên: Pô čih – Siu H’ Prăk: Pô pơblang