VOV4.Jarai - Tal klin Covid-19 anai, Daklak lĕ anih ngă đing nao ƀơi kual Dăp Kơdư hăng sa dua čô mơnuih ƀă kơman yua kơ lar tưp mơng anih anom pơkon glăi pơ̆ tơring čar. Hrom hăng pơplih dlêh tơnap ƀơi ƀôn prong Hồ Chí Minh anun ƀu djơ̆ kơnong kơ Daklak ôh mơ̆ hơdôm anih anom jê̆ giăm (amăng anun hmâo tơring čar Gialai) ăt khut khăt mơn amăng bruă pơgang pơgăn klin.

Tơring glông Čư̆ Pưh, tơring čar Gialai lĕ anih anom jê̆ giăm hăng anih dô̆ mơng mơnuih ruă mrô 7186 mơng tơring čar Daklak. Lom anun mơtăm, tơring čar Gialai pơdŏng anih gak wai klin ƀơi glông jơlan mrô 14, anih anom Cầu 110 giăm hăng tơring čar Daklak. Khul bơdjơ̆ nao gơnong bruă hmâo: Tơhan wai lăng bruă nao rai ƀơi jơlan nao rai, pel ep bruă nao rai, bruă ia jrao... hmâo pơgăn laih rơdêh, pơkă lăng ayuh pơ-iă drơi jăn, lăi pơthâo tơlơi suaih pral mơnuih găn rai ƀơi anai. Tui hăng pô mơgăt rơdêh Dương Quốc Hiệu, ƀơi tơring kual Đak Đoa, tơring glông Đak Đoa, phrâo mơng ƀôn prong Hồ Chí Minh glăi pơ̆ Gialai, bruă ngă tui tơlơi lăi pơthâo tơlơi suaih pral ăt kah hăng hơdôm bruă pơgang pơgăn klin mơng khul apăn bruă ngă ñu hăng lu mơnuih mơgăt rơdêh ƀuh hơđong pran jua hloh.

 “Rai pơ̆ anai dưi hmâo ƀing mă bruă gah ia jrao pel ĕp kiăng glăi pơ̆ plơi pla pơhlôm drơi pô kâo ƀuh ƀing adơi ayong mă bruă klă biă. Kâo tơbiă ƀơi jơlan glông ƀuh bruă pơgang pơgăn klin mơng ƀing adơi ayong mơgăt rơdêh đuăi jơlan ataih pơhlôm biă. Tơlơi ƀong huă lĕ adơi ayong mơgăt rơdêh ngă juăt hăng mơnuih ƀơi plơi pla, pơhlôm khop ƀơi rơdêh kiăng pơhlôm brơi kơ ană bơnai, hăng abih bang mơnuih amăng sang anô̆ pơ̆ sang”.

Guang dar sang sĭ mơdrô Ba Khía să Ea Wy, tơring glông Ea Hleo, tơring čar Daklak

Ayong Ksor Mướt, mơnuih mă bruă ia jrao ƀơi anih dô̆ gak wai lăng pơ̆ Cầu 110 – Jơlan mrô 14 găn tơring čar Gialai brơi thâo, rơngiao kơ bruă khom gôm adung mơbah, pơkă lăng pơ-iă drơi jăn hăng pơdjai kơman, abih bang djop mơnuih leng kơ lăi pơthâo tơlơi suaih pral tơpă, djop tum. Biă ñu  lĕ anih anom pơphun hyu, anih anom nao, tơlơi suaih pral hăng tơlơi ruă pơkon bơdjơ̆ nao. Khă hmâo rơngiă ƀiă mông, samơ̆ hlơi hlơi leng kơ ngă tui tơpă hơdôm tơlơi pơkă, pơtô brơi mơng khul gơgrong bruă.

 “Tơdah pơ-iă drơi jăn, ƀudah hmâo đing đăo thơ khom dô̆ čơlah, bơ̆ tơdah pơkă lăng ƀuh ƀu hmâo hơget lĕ rơkâo mơnuih ƀôn sang lăi pơthâo tơlơi suaih pral giong lĕ nao. Să hơpă, plơi hơpă lĕ lăi pơthâo bruă ia jrao ƀơi anun, bơ̆ hơdôm mơnuih hyu ataih glăi ƀudah mơng ƀôn prong Hồ Chí Minh glăi khom lăi pơthâo tơlơi suaih pral”.

Pơdŏng anih gak wai lăng klin ƀơi kơplah wah guai Daklak - Gialai

Truh ră anai, abih bang hơdôm mơnuih bơdjơ̆ nao mơnuih ruă mrô 7186 ƀơi Daklak leng kơ pơčrang lăng tal sa ƀu ƀuh ƀă kơman Sars-CoV-2 ôh, khă hnun hai khom dô̆ čơlah, lăng tui mơn. Bơ̆ hăng hơdôm bôh tơring čar amăng kual Dăp Kơdư, biă ñu lĕ jơlan mrô 14 (jơlan Hồ Chí Minh) hmâo pơdơi dŭ pơgiăng tuai. Sa dua čô mơnuih ƀu ngă tui hmâo khul gơgrong bruă pơsir tơpă. Gong gai hăng gơnong bruă pơgang klin hơdôm bôh anih anom amăng kual gum hrom kơjăp na nao kiăng pok pơhai ha amăng plĕ, khŏp, kiăng bruă pơgang pơgăn klin Covid-19 ba glăi bôh tơhnal klă hloh./.

Siu H’ Prăk: Pô pơblang