VOV4.Jarai - Lơ 5/1, Khul apăn bruă Ping gah tơring čar Daklak pơphun Jơnum lăng nao rai mơng ataih kiăng kơ pơsit tong glăi hơdôm hră pơtrun mơng Gơnong glông hăng Ping gah tơring čar kơ ƀing khua mua pơprong amăng tơring čar. Tui ơi Phạm Minh Tấn, Kơ-iăng khua apăn bruă Ping gah tơring čar Daklak, ƀơi anăp kơ tơlơi tơnap tap mơng klin Covid-19, Ping gah tơring čar, Khul pơ ala mơnuih ƀon sang tơring čar, Jơnum min mơnuih ƀon sang tơring čar hơmâo pơsit hơdôm tơlơi tơnap tap, tơlơi lông amra bưp hăng hmao tlôn hơmâo hră pơtrun, pơplih, pơhrua, lu hră pơ-ar kiăng khua mua git gai ngă tui ha amăng plĕ kiăng kơ pơgang klin Covid-19 rah, tŏ tui pơđĭ kyar bơwih ƀong huă mơnuih mơnam rah.

Ƀing khua pơ ala mơnuih ƀon sang nao jơnum gơgrong ngă tui tơlơi pơsit ƀơi anih lăng nao rai pơ tơring čar Daklak

Pơđut thun 2021, rơnoh pơđĭ kyar bơwih ƀong huă 5,1%, GDP rĭm akŏ mơnuih dưm dưm 50 klăk sa cô mơnuih. Rơnoh sĭ mơdrô pơ tač rơngiao rơbêh 1.100 klăk đôlar Mi. Amăng mông jơnum anai, ƀing khua mua pơprong amăng tơring čar Daklak amra hrăm, pơtô pơblang, pơsit tong 12 hră pơtrun mơng gơnong glông hăng tơring čar bơdjơ̆ nao hơdôm bruă: kơtưn amăng git gai bruă pơgang klin Covid-19 pơ anăp anai; bruă pơsir tơlơi ngă soh amăng Ping gah; tơlơi klah čun mơng Ding jum kơđi čar amăng pơsur pơhlôm brơi mơnuih apăn bruă hur har pran jua, thâo pơčeh phrâo yua kơ tơlơi dưi hrŏm; tơlơipơtrun mơng Khul apăn bruă Ping gah tơring čar  kiăng kơ hrưn đĭ thâo rơgơi amăng mơnuih apăn bruă Ping gah amăng rơnuk phrâo hăng sui thun pơ anăp dong….

Siu Đoan: Pơblang