VOV4.Jarai -  Dong mơng blan 10 truh ră anai, tơring čar Daklak čih hmâo mrô ƀă Covid-19 đĭ lu hăng jing sa amăng hơdôm anih “hang tơngia” hloh kơ klin Covid-19 mơng đơ đam dêh čar. Ƀơi anăp tơlơi klin ngă tơnap, bruă pơgang, pơgăn ƀơi Daklak hmâo pơdah laih tơlơi akă ƀu dưi ngă, biă ñu mơnuih mă bruă, bôh thâo pơčrang lăng hăng rơnoh tlâ̆o vaccine. Tơring čar glăk hơkrŭ đĭ pơsir hơdôm tơlơi akă gal hăng ngă hơdư̆ rơnoh đĭ tui mrô mơnuih ƀă klin.

Tơring čar Daklak amăng tal 4 mơng klin Covid-19 hmâo čih pioh hmâo mrô mơnuih ƀă klin đĭ lu biă hăng rơbêh kơ hơdôm rơbâo čô mơnuih ƀă kơman Covid-19 hơdôm hrơi rơgao. Amăng anun plơi prong Buôn Ma Thuột hmâo rơbêh kơ 1000 čô mơnuih ƀă kơman. Amăng mrô 600 čô mơnuih phrâo ƀă kơman mơng 2 rơwang hrơi tơjuh rơgao, truh kơ 90% mrô mơnuih ƀă klin amăng plơi pla, đĭ tui rơnoh klin ngă ƀơi plơi prong truh rơnoh 4. Ơi Vũ Văn Hưng, Khua Jơnum min mơnuih ƀôn sang plơi prong Buôn Ma Thuột brơi thâo, Covid-19 ƀơi plơi prong ră anai tơnap hyu huĕt ĕp ba glăi bôh tơhnal biă:

“Ră anai mrô mơnuih ƀă klin amăng plơi pla ƀu rơđah ôh mơng ñu lar tưp mơ̆, biă ñu tơlơi anai bôh than phun mơng mơnuih glăi mơng kual klin ngă ƀu lăi pơthâo hăng ƀu ngă tui djơ̆ tơlơi dô̆ čơlah ƀơi sang. Ră anai ngă tui bruă hyu huĕt ĕp F1 lĕ tơnap biă yua kơ mrô ñu lu. Khă hnun hai, plơi prong ăt pơdŏng mơn 21 grŭp să, phường hyu huĕt ĕp, laih anun hmâo grŭp hyu huĕt ĕp mơng plơi prong dong. Laih anun Anom kơsem min klin ruă Dăp Kơdư ăt djru mơn kơ sa grŭp kiăng hyu huĕt ĕp, pơphun test abih bang amăng plơi prong”.

Khul ơi ia jrao test tañ brơi kơ mơnuih ƀôn sang ƀơi plơi prong Buôn Ma Thuột

Mrô mơnuih ruă đĭ lu lom anun mrô tlâ̆o vaccine amăng đơ đam tơring čar Daklak ră anai ƀiă biă pơhmu hăng amăng đơ đam dêh čar. Yap truh akô̆ blan 11, mrô mơnuih dưi tlâ̆o pơgang ară tal sa hmâo 58,6% hăng djop 2 ară lĕ 9,11%. Mrô tlâ̆o vaccine pơgang ƀiă ngă đĭ lu tơlơi lar hyu amăng plơi pla ăt kah hăng đĭ tui rơnoh bruă pơjrao kơ mơnuih ruă.

Ơi Trịnh Quang Trí, Khua Anom wai lăng tơlơi duam ruă tơring čar Daklak (CDC) brơi thâo: Truh lơ 30/10, tơring čar Daklak hmâo čơkă mă 1 klăk liều vaccine pơgang Covid-19 mơng dêh čar ta. Tơdah tlâ̆o abih mrô vaccine anai amra djop brơi 72% mrô mơnuih dưi tlâ̆o ară tal sa hăng rơnoh tlâ̆o pơgang ăt phrâo dưi hmâo tơring čar pơtrut tañ mơn.

“Hơdôm bôh sang ia jrao să, phường ră anai tlâ̆o pơgang hmâo 200-300 ară kơ sa anom bruă gah să sa hrơi. Yua anun đơ đam tơring čar lĕ rơnoh hơnong ñu sa hrơi năng ai ñu 40.000. Abih bang mrô vaccine tlâ̆o pơgang pơđut hlâo kơ lơ 5/11. Hrom hrom hăng anun, pơkă hlâo amăng blan 11/2021 amra tŭ mă hơdôm tal vaccine pơkon. Kơnong plơi prong Buôn Ma Thuột, pơkôl abih bang mơnuih ƀôn sang mơng 18 thun hăng hloh kơ anun amra dưi tlâ̆o ƀiă biă mă ñu sa ară vaccine pơgang Covid-19 hlâo kơ lơ 15/11/2021”.

Tañ tlâ̆o vaccine djop kơ abih bang mơnuih ƀôn sang lĕ jơlan tŭ yua hloh pioh pơgang, pơgăn klin Covid-19

Tơring čar Daklak hmâo čih pioh rơbêh kơ 5000 čô mơnuih ƀă Covid-19, amăng anun hmâo ha mơkrah mrô mơnuih glăk dô̆ pơjrao. Lăp đing nao, 10 hrơi jê̆ hăng anai, mrô mơnuih ƀă klin amăng sa hrơi ƀơi Daklak ƀơi rơnoh 3 mrô, mrô mơnuih ƀă klin amăng plơi pla lu hăng lu anih klin ngă tơnap. Tui hăng ơi Nay Phi La, Khua Gơnong bruă ia jrao tơring čar Daklak, tơdah klin ăt ƀu hrŏ trun mơn amăng hơdôm hrơi pơ̆ anăp thơ, tơring čar amra khom run pran kơ bruă pơjrao brơi F0, hăng amra kiăng truh tơlơi gum djru.

“Khom pơgăn mơtăm mơng tal sa hăng tal 2 ƀơi anai amra tơnap tao kơ mơnuih mă bruă gum hrom hơkrŭ klă hăng gơnong bruă ia jrao tơring čar Daklak hmâo năng ai ñu 30 čô ơi ia jrao, jing ƀu djop brơi kơ bruă mă thơ, hluai tui anun khom iâu dong tơlơi gum djru mơng dêh čar ăt kah hăng Sang ia jrao Chợ Rẫy hăng lom mơnuih ƀă klin lu lĕ gơnong bruă ia jrao pơdŏng kơčăo bruă rơkâo glăi anih anom Sang ia jrao yua pơjrao mơnuih djơ̆ klin mơng Sang ia jrao ƀôn prong Hồ Chí Minh, Sang ia jrao Bình Dương tơdơi kơ ngă giong bruă pơwot glăi kiăng pơhlôm hlâo kơ tơlơi sat hloh amra truh mơng tơring čar”.

Mrô mơnuih ruă đĭ tañ Daklak khom kơtưn hơdôm kual pơjrao mơnuih djơ̆ klin Covid-19

Amăng tal hyu pel ĕp, djru gum tơring čar Daklak pơgăn klin lom lơ 27/10 phrâo rơgao, Grŭp hyu mă bruă mơng Sang ia jrao Chợ Rẫy lăi pơthâo bruă mă, tơlơi găn rơgao pơjrao hăng mơnuih ruă klin Covid-19. Tui hăng Nai prin tha, Ơi ia jrao Nguyễn Tri Thức, Khua Sang ia jrao Chợ Rẫy, Daklak kiăng hơdư̆ tơlơi lar tưp bơrơkua amăng kual pơjrao, dô̆ čơlah hơbit; hrŏ trun ƀiă mơnuih ruă kraih; Pơhlôm tơlơi suaih pral, mơnuih mă bruă gah ia jrao hăng hơdră iâu pơhrui gum hrom mơng khul grŭp kiăng djru bruă mă sui hrơi hăng klin Covid-19:

“Ƀing gơmơi rơkâo kơtưn bôh thâo pơčrang lăng. Dua lĕ hăng rơnoh đĭ lu khom pơmin nao anih anom pơjrao klin ruă Sang ia jrao pioh pơjrao mơnuih djơ̆ klin đĭ lu năng ai ñu mơng 4 truh 5 rơbâo bôh sưng, laih anun ƀing gơmơi gum pơhiăp kơ Sang ia jrao juăt hyu mă bruă hiư̆m ñu, laih anun bruă dô̆ čơlah F1 hiưm ñu kiăng bĕ lar tưp bơrơkua hăng hmâo hơdôm tơlơi pơtă kiăng Ding jum ia jrao hăng Kơnuk kơna kơtưn mrô vaccine pioh tlâ̆o pơgang kơ mơnuih ƀôn sang tơring čar Daklak”.

Tơring čar Daklak glăk tañ pok pơhai hơdôm bruă kiăng amăng ƀrư̆ pơgang hăng pơgăn klin Covid-19 gluh đĭ amăng plơi pla. Hrom hăng bruă mă mơng gong gai, hơdôm gưl, gơnong buă bơdjơ̆ nao, rim mơnuih ƀôn sang khom ngă tui hơdôm bruă pơgang, pơgăn klin djơ̆ hăng pran jua “rim mơnuih ƀôn sang lĕ sa ling tơhan” ƀơi “tơdron blah” pơgăn klin kiăng tañ wai lăng klin ruă hăng pơwot glăi tơlơi hơdip “hơđong phrâo”./.

            Nam Trang: Či – Siu H’ Prăk: Pơblang