VOV4.Jarai- Daklak amra gir run jak iâu ƀing mơnuih čơmah kiăng kơ djru brơi ƀing mơnuih ƀun rin dưi čơkă thun phrâo trơi pơđao yâo mơ-ak. Anai lĕ sa amăng hơdôm boh tơhnal hơmâo Jơnum min djop djuai ania mơnuih mơnam Việt Nam tơring čar Daklak lăi pơthâo amăng mông jơnum lăng glăi bruă mă amăng thun 2021, pok pơhai Jơlan hơdră gum hrŏm tŭ ư hrŏm bruă mă amăng thun 2022 pơphun lơ 28/12. Tui hăng hră lăi pơthâo amăng mông Jơnum amăng thun laih rơgao, Jơnum min djop djuai ania mơnuih mơnam Việt Nam djop gưl tơring čar Daklak hơmâo pơtrut bruă pơtô pơblang, pơtrut pơsur mơnuih ƀon sang  ngă tui hơdôm hơdră pơgang klin Covid-19.

Tơring čar Daklak amra gir run kiăng kơ mơnuih ƀon sang, biă ñu mơnuih ƀun rin dưi čơkă thun phrâo yâo mơ-ak

Pơtrut pơsur  hăng pơphun tŭ mă rơnoh prăk rơbêh 35,3 klai prăk, hơdôm gơnam măi mok gah ia jrao hăng hơdôm gơnam arăng djru amăng bruă pơgang klin Covid-19 brơi kơ tơring čar. Yă H’Kim Hoa Byă, Khua anom bruă pơtô ba mơnuih ƀon sang Ping gah tơring čar, Khua Jơnum min djop djuai ania mơnuih mơnam Việt Nam tơring čar Daklak brơi thâo, hơdôm tơlơi tơnap tap yua bơbeč mơng klin Covid-19, pơ anăp anai, Jơnum min djop djuai ania mơnuih mơnam djop gưl tŏ tui jak iâu mơnuih djru kiăng kơ plai ƀiă tơnap tap kơ mơnuih ƀun rin hăng ƀing drơi jăn ƀu hiam. Blung hlâo lĕ gir run kiăng kơ mơnuih ƀon sang, biă mă ñu lĕ mơnuih ƀun rin dưi čơkă thun phrâo yâo mơ-ak.

Siu Đoan: Pơblang