VOV4.Jarai -  Hơdôm anô̆ bơdjơ̆ nao mơng klin Covid-19 hmâo bơbeč truh ƀu anet bruă bơwih ƀong – mơnuih mơnam tơring čar Daklak. Samơ̆ hăng pran pơsit mơng Ping gah, gong gai, mơnuih ƀôn sang, Daklak hmâo laih hơdôm bôh tơhnal klă amăng bruă pơgang, pơgăn klin. Hơdôm bôh anih anom amăng tơring čar ăt ƀơ ƀrư̆ pơplih mơn kiăng kơ djơ̆ hăng bôh nik pioh hơđong, hơkrŭ glăi bơwih ƀong, pơhlôm hơđong tơlơi hơdip mơnuih mơnam amăng tơlơi phrâo.

Hăng sa amăng hơdôm anih anom hmâo 22 čô mơnuih ƀă kơman Covid-19 ƀơi thôn 6 hăng thôn 7, să Vụ Ƀổn, tơring glông Krông Pač amăng tal 4 klin ngă anai, samơ̆ hăng pran jua ngă tui tơlơi črâo ba mơng Khua dêh čar: “Rim să, phường lĕ sa anih gơgrong bŏng kơjăp, rim grŭp, ƀut, biă ñu grŭp pơgang, pơgăn Covid plơi pla jing phun than ñu”, Ping gah gong gai hăng mơnuih ƀôn sang să Vụ Bổn hmâo tañ laih wai lăng bruă mă, dưi pơgăn klin ruă, ngă gal brơi kơ bruă bơwih ƀong – mơnuih mơnam ƀơi anai pơđi kyar dong. Ơi Lê Viết Nhượng, Khua git gai Ping gah, Khua Grŭp črâo ba pơgang, pơgăn klin Covid-19 să Vụ Bổn, tơring glông Krông Pač, tơring čar Daklak brơi thâo:

“Să hmâo mă laih bruă pơgang, pơgăn klin jing bruă đing nao hlâo. Tơlơi pơmin kơ črâo ba tơhnal bruă dua mơta lĕ pơgang, pơgăn klin rah samơ̆ hrom hăng anun djru rah bruă bơwih ƀong pơđĭ kyar. Amăng hơdôm hrơi rơgao, ngă tui tơlơi črâo ba mơng Khua dêh čar lĕ să hmâo ngă giong bruă Grŭp črâo ba hăng pơdŏng phrâo Anom git gai pơgang, pơgăn klin hăng pơhrua nao dong jơlan gah pơgang, pơgăn klin amăng rơnuk phrâo. Amăng anun hmâo bruă ngă tui tơhnal pơkă dua mơta ngă sa wot, ngă gal brơi kơ mơnuih ƀôn sang bơwih ƀong huă”.

Mơnuih ƀôn sang Daklak bơwih ƀong huă mă bruă klă hăng ngă tui tơpă hơdôm tơlơi pơkă pơgang hlôm hlâo klin kheng

Ƀơi tơring glông Ea Hleo, tơring čar Daklak hmâo čih pioh mơnuih ƀă kơman Sars-CoV-2, amăng anun hmâo lu mơnuih ƀă amăng plơi pla ngă bơdjơ̆ nao bruă bơwih ƀong huă, sĭ mơdrô, tuh pơplai hăng tơlơi hơdip mơnuih ƀôn sang. Mơng tơlơi bơngot blung a, truh ră anai hăng tơlơi gum hrom khŏp mơng glông bruă kơđi čar hrom hăng tơlơi gum djru mơng hơdôm gưl mơnuih ƀôn sang, tơring glông Ea Hleo hmâo gơgrong hlâo dưi wai lăng klin ruă, hrom hăng anun ngă tui ba glăi bôh tơhnal lu tơhnal bruă ba tơbiă pơđĭ kyar bơwih ƀong – mơnuih mơnam 9 blan mơng thun 2021. Truh ră anai, tơring glông hmâo iâu pơthưr laih, ngă pơhư̆č hmâo 21 rơwang bruă tuh pơplai ƀơi tơring glông abih bang ngăn rơnoh pơkă hlâo giăm truh 2.500 klai prăk. Yua anun, hrom hăng bruă pơhlôm pơgang klin ruă, bruă djă pioh hơđong bruă kơđi čar, pơđĭ kyar bơwih ƀong glăk dưi hmâo abih bang glông bruă kơđi čar, mơnuih ƀôn sang hăng anom bơwih ƀong pha ra đing nao. Ơi Vũ Đình Tân, Khua Sang bruă bơwih ƀong pơkĕ apui hăng jua angin Trung Nam – Daklak 1, anom bơwih ƀong hmâo rơwang bruă glăk dưi pok pơhai ƀơi tơring glông Ea Hleo brơi thâo:

“Ră anai, rơwang bruă glăk pơphun lu bruă mơng sang bruă dŭ pơgiăng hăng dưm truă. Hăng bruă pơdŏng lĕ gah sang bruă hmâo gơgrong hlâo pok pơhai ngă tui, biă ñu hơdôm anih juăt hmâo tơlơi truh hmâo pơkra kơjăp hăng ƀê tông abih bang. Yua anun, tơlơi ayuh hyiăng lĕ ƀu hmâo bơdjơ̆ nao bruă man pơdŏng hăng dưm truă. Kơnong kơ hmâo tơlơi lĕ, ră anai, ƀơi anăp tơlơi klin ruă tui anai gah sang bruă hmâo gơgrong hlâo lăi pơthâo hăng ƀing juăt bruă dêh čar tač rơngiao ngă hră pơ-ar gah Việt Nam tañ hăng ngă tui dô̆ čơlah, pơhlôm hơdôm tơlơi pơkă mơng Kơnuk kơna ba tơbiă. Hrom hrom hăng anun, hăng mơnuih apăn bruă, mơnuih mă bruă mơng Sang bruă ƀơi anih man pơdŏng dưm truă lĕ abih bang dưi lăi pơthâo abih lĕ nao pơ̆ anih pơdŏng hăng glăi pơ̆ rơnưh mơng pô leng kơ lăi pơthâo gah ia jrao...”.

Tui hăng ơi Phạm Minh Tấn, Kơ-iăng Khua git gai Ping gah tơring čar Daklak: Klin Covid-19 ngă bơdjơ̆ nao sat prong biă hăng tơlơi hơdip mơnuih ƀôn sang ăt kah hăng tơlơi pơđĭ kyar hrom mơng abih bang mơnuih mơnam, amăng anun hmâo tơring čar Daklak. Khă hnun hai, hăng pran pơsit prong mơng abih bang Ping gah, abih bang mơnuih ƀôn sang, truh ră anai tơlơi klin ngă ƀơi tơring čar hmâo, glăk dưi wai lăng hăng pơtrut kơdun hĭ. Hơdôm tơhnal ba tơbiă bơwih ƀong – mơnuih mơnam 9 blan phrâo rơgao ăt đĭ mơn bơhmu hăng thun 2020. Đĭ kyar bơwih ƀong mơng tơring čar 9 blan hmâo 5,28%. Abih bang ngăn drăp kơnuk kơna pơhrui glăi him lăng hmâo 5.500 klai prăk, dưm dưm hăng 74,5% pơkă hlâo Khul pơ ala mơnuih ƀôn sang tơring čar jao, đĭ 3% bơhmu hăng thun hlâo. Khă hnun hai, kiăng ngă tui truh kih hơdôm bruă mă amăng thun 2021 tui Tơlơi pơtrun pơsit mơng Ping gah tơring čar hmâo ba tơbiă, pơ̆ anăp anai, hơdôm gưl ping gah, gong gai, khul grŭp; hơdôm ƀirô, anom bruă plơi pla amăng tơring čar ăt lăng tui mơn tơlơi hmâo sit, ba tơbiă hơdôm bruă pơsir, pơphun ngă tui thâo pơplih tañ, ba glăi bôh tơhnal hăng pran jua pơsit prong, pơkĕ hrom bruă pơgang, pơgăn klin hăng pơđĭ kyar bơwih ƀong – mơnuih mơnam, pơhlôm rơnuk rơnua plơi pla lŏn ia. Ơi Phạm Minh Tấn, Kơ-iăng Khua git gai Ping gah tơring čar Daklak lăi rơđah:

“Klin Covid-19 bơdjơ̆ nao giăm hmâo 2 thun bơbeč truh prong biă pơđĭ kyar bơwih ƀong – mơnuih mơnam, samơ̆ ƀing ta ăt lăng phun mơn tơlơi dưi, bôh tŭ yua lăp djơ̆ kơ mơnuih ƀôn sang hăng ngă tui djơ̆ na nao tơlơi črâo ba mơng Ping gah, mơng Gong gai kơnuk kơna lĕ ngă tui dua mơta bruă lĕ, đing nao pơđĭ kyar bơwih ƀong – mơnuih mơnam, pơhlôm rah pơgang, pơgăn klin Covid-19 hăng djop tơlơi bơwih ƀong sĭ mơdrô pơkon. Ƀu lui raih, ƀu kơđiăng kiăng ngă hiưm hơpă gal brơi klă hloh pioh ƀing ta đing nao hơdôm ngăn rơnoh kiăng hơđong bruă kơđi čar, pơđĭ kyar bơwih ƀong – mơnuih mơnam, pơhlôm rơnuk rơnua plơi pla lŏn ia, pơdŏng glông bruă kơđi čar amăng đơ đam tơring čar”.

Hăng pran pơsit ngă tui truh kih “dua mơta bruă” kơ pơgang, pơgăn klin Covid-19 ba glăi bôh tơhnal hăng ngă giong hơdôm bruă pơkă pơđĭ kyar bơwih ƀong – mơnuih mơnam amăng thun 2021, Ping gah, gong gai mơnuih ƀôn sang djop djuai ania tơring čar Daklak glăk gơgrong hlâo ƀơ ƀrư̆ pơplih tui pran jua Tơlơi pơtrun pơsit mă yua Tơlơi pơkă jăng jai “Ngă juăt pơhlôm, pơplih tañ, wai lăng ba glăi bôh tơhnal klin Covid-19”./.

Hương Lý: Čih – Siu H’ Prăk: Pơblang