VOV4.Jarai - Tui hăng Khul git gai pơhlôm hlâo kơ ayuh hyiăng ƀu klă ngă amăng tơring čar Daklak, yua bơbeč mơng kơthel mrô 5 hăng bơyan hơjan hlim amăng hơdôm hrơi laih rơgao ngă kơ ia ling dăo lu anih laih dong lŏn tơhlŏm ter hang ia krông ƀơi să Nam Ka-Ea Rbin (tơring glông Lak). Tơring čar hơmâo git gai djop gơnong bruă, gong gai ƀon lan kơtưn dong lơ̆m ngă tui hơdôm hơdră pơhlôm hlâo kơ ayuh hyiăng ƀuh klă ngăn, biă mă ñu lĕ amăng hrơi blan klin Covid-19 glăk dŏ ngă tơnap tap, pơhlôm rơnuk rơnua brơi ană mơnuih hăng gơnam tam dong.

Hơdôm anom bruă, gong gao pel ĕp, kiăo tui lăng, pơhrua hơdôm hơdră pơhlôm hlâo amăng hrơi hơjan hlim brơi djơ̆ hăng tơlơi sit nik tui tơlơi pơtrun 4 mơta ha anih, bă mă ñu lĕ ƀơi hơdôm ring bruă amuñ răm rai lơ̆m ia lip, amuñ ngă lŏn tơhlŏm. Khul git gai pơhlôm hlâo kơ ayuh hyiăng ƀu klă ngă hăng djru ană mơnuih bưp tơlơi truh sat Daklak brơi thâo, tơring čar hơmâo pơkiăo nao 180  grup nao djru kiăng kơ tañ rŭ pơdong glăi anŏ răm rai tơdah hơmâo tơlơi truh sat.

Siu Đoan: Pơblang