VOV4.Jarai - Ngă tui tơlơi Črâo ba mơng Ping gah tơring čar Daklak, mơng thun 2004 truh ră anai 1.194 ƀirô, khul grŭp ƀơi Daklak hmâo ngă adơi ayong hăng 758 bôh ƀôn djuai ania ƀiă. Tơdơi giăm hmâo 17 thun kĕ phĭ hrom, hăng hơdôm jơlan hơdră djru gum sit nik, ƀô̆ mơta hơdôm bôh plơi pla jai hrơi jai pơplih phrâo, tơlơi hơdip mơda mơnuih ƀôn sang dưi pơđĭ tui, mrô sang anô̆ ƀun rin hrŏ trun. Pô hyu mă tơlơi pơhing phrâo Tuấn Long hmâo tơlơi čih kơ bôh yôm anun mơng Sang bruă apui lơtrik Daklak hăng Ƀirô Gong phun jua pơhiăp dêh čar Việt Nam dô̆ mă bruă ƀơi Dăp Kơdư pioh kơ hơdôm bôh plơi ngă adơi ayong.

Ƀing gơmơi hrom hăng mơnuih apăn bruă, mơnuih mă bruă Sang bruă apui lơtrik Daklak nao tơña bla ƀôn ngă adơi ayong ƀôn M’briu, tơring glông Ea Kar. Tal anai, mơnuih amăng khul sang bruă ƀơk brơi bơnal gôm adung mơbah, ia pơdjai kơman, gơnam ƀong huă, hăng lăi pơhing hơdôm bruă pơgang, pơgăn klin Covid-19 kơ neh wa. Hrom hăng anun, khua pơ ala Grŭp khua mua Sang bruă ăt ƀơk brơi mơn dua drơi rơmô pioh djuai hmâo nua 40 klăk prăk kơ dua bôh sang anô̆ ƀun rin ƀơi ƀôn.

Ơi Y Suk Niê – Khua git gai grŭp Ping gah ƀôn M’briu lăi pơthâo, hơdôm thun hlâo adih tơlơi hơdip mơnuih ƀôn sang amăng ƀôn dô̆ lu tơnap tap, mrô sang anô̆ ƀun rin ƀơi rơnoh dlông, dưi hmâo tơlơi lăng ba tuh pơplai mơng Ping gah hăng Kơnuk kơna, tơlơi gum djru mơng anom ngă adơi ayong, ră anai mrô anai hrŏ trun ƀơi rơnoh 5%. Amăng tal klin Covid-19 lom rơnuč blan 9/2021, ƀôn hmâo čơkă 146 čô mơnuih hyu mă bruă pơ̆ anih ataih pơ̆ hơdôm tơring čar, ƀôn prong gah dơnung dêh čar glăi bĕ klin, hơdôm gưl gơnong bruă plơi pla hăng Sang bruă apui lơtrik Daklak hmâo nao gum djru ba laih.

“Sang bruă apui lơtrik Daklak ngă adơi ayong hăng ƀôn M’briu mơng thun 2004 hăng hmâo lu jơlan hơdră gum djru. Sang bruă lăng ba tơña bla na nao, ƀơk brơi gơnam tam amăng hơdôm tal trung thu, lơphet, tết; djru brơi neh wa gah sang dô̆, braih huă lom kơƀah braih huă giăm bơyan tơjŭ pla ƀudah ƀơk brơi rơmô kơ sang anô̆ ƀun rin. Ƀơ ƀrư̆ mrô sang anô̆ ƀun rin amăng ƀôn hrŏ trun. Tal klin anai gơñu rai ƀơk brơi bơnal gôm adung mơbah, ia jrao pơdjai kơman; lăi pơhing kơ neh wa pơgang pơgăn klin ƀudah ngă tui hơdôm bruă 5 mơta pơgang klin mơng Ding jum ia jrao, gôm adung mơbah, ƀu tum pơƀut lu mơnuih. Neh wa ngă tui klă anun truh ră anai akă hmâo hlơi F0 ôh”.

Mơnuih mut phung Sang bruă apui lơtrik Daklak ƀơk gơnam tam gum djru neh wa pơgang pơgăn klin

Ƀôn M’briu, tơring glông Ea Kar ră anai hmâo 268 bôh sang anô̆ hăng rơbêh kơ 1.300 čô mơnuih, rơbêh kơ 95% lĕ djuai ania Êđê. Ơi Trần Văn Thuận – Khua Sang bruă apui lơtrik Daklak brơi thâo, tui hăng Tơlơi črâo ba mơng Ping gah tơring čar Daklak, thun 2004 sang bruă hmâo ngă adơi ayong hăng ƀôn M’briu. Kiăng djru ƀôn ngă adơi ayong, rim thun amăng hơdôm tal ngă lơphet, tết, sang bruă pơphun hyu tơña bla, pơtrut pơsur, ƀơk gơnam tam kơ sang anô̆ ƀun rin, sang anô̆ gah hơdră bruă; pơdŏng hơdôm jơlan hơdră rơđah djru neh wa pơđĭ kyar bơwih ƀong, hrŏ trun ƀun rin.

“Tui hăng jơlan hơdră ngă adơi ayong rim thun anom hmâo ba tơbiă hơdôm kơčăo bruă mă rim thun bruă hơđong mơnuih mơnam hăng lăng ba hơdôm sang anô̆ gah hơdră bruă, sang anô̆ tơnap tap, kiăng pơđĭ kyar bơwih ƀong. Hăng ƀôn M’briu hơdôm tơlơi tơnap mơ̆ ră anai ƀơi ƀôn lĕ anom thâo hmâo ba tơbiă hơdôm jơlan hơdră kiăng djru sit nik hăng mơnuih ƀôn sang amăng ƀôn kah hăng pơdŏng ƀôn tâ̆o yâu”.

Mơnuih pơ ala kơ Khua git gai Sang bruă apui lơtrik Daklak ƀơk rơmô kơ sang anô̆ ƀun rin ƀơi ƀôn M’briu

Ƀôn B’hôk, să Yang Tao, tơring glông Lak ăt ngă adơi ayong mơn hăng Ƀirô Gong phun jua pơhiăp dêh čar Việt Nam pơdŏng ƀơi kual Dăp Kơdư (VOV-Tây Nguyên) mơng thun 2004. Ƀôn ră anai hmâo giăm truh 270 bôh sang anô̆ hăng rơbêh kơ 1.000 čô mơnuih, biă ñu lĕ djuai ania Bơnông. Tui hăng ơi Y Mor Kuăn – Khua ƀôn B’hôk, mơng hrơi ngă adơi ayong hăng VOV – Tây Nguyên leng kơ gum hrom, djru ba neh wa amăng ƀôn. Hrom hăng tơña bla, ƀơk gơnam tam amăng hơdôm tal ngă lơphet, tết, VOV – Tây Nguyên hmâo pơsur hơdôm bôh anom bơwih ƀong pơdŏng 5 bôh sang khăp păp hmâo nua 400 klăk prăk kơ hơdôm sang anô̆ ƀun rin, sang anô̆ gah hơdră bruă. Lom klin Covid-19 gluh đĭ amăng rơnuč blan 2021, ƀôn hmâo čơkă giăm truh 200 čô mơnuih nao bơwih ƀong huă pơ̆ anih ataih pơwot glăi bĕ klin, amăng mrô anai hmâo lu mơnuih ƀă kơman klin, laih anun ha bôh ƀôn hmâo arăng guang dar, mơnuih pơ ala mơng VOV – Tây Nguyên hmâo nao gum djru laih gum ba neh wa.

“Ƀôn B’hôk hmâo arăng guang dar 14 hrơi, ƀu dưi nao mă bruă, kơƀah djop mơta. Anom ngă adơi ayong lĕ VOV – Tây Nguyên nao ƀơk brơi rim sang anô̆ 10 kg braih, sa get čai ia rơmă, 1 anung ƀôt ngok, ia măm, akan krô; hrom hăng bơnal gôm adung mơbah, ia jrao pơdjai kơman... Neh wa mơ-ak biă. Hmâo dong gơnam ƀong huă pioh dô̆ čơlah pơgang, pơgăn klin, neh wa hơđong pran jua yak rơgao rơwang tơnap tap dô̆ čơlah”.

Mơnuih pơ ala kơ khul mut phung VOV – Tây Nguyên ƀơk gơnam kiăng yua hloh kơ ƀôn B’hôk hmâo arăng guang dar

Vũ Nam Trang, pô hyu mă tơlơi pơhing phrâo VOV – Tây Nguyên brơi thâo, amăng tal klin ngă thun 2021, hrom hăng gum hơgôp lĕ Grŭp mut phung ƀirô dô̆ pơsur ƀing thâo tơngia djru gơnong bruă ia jrao Daklak rơbêh kơ 200 klăk prăk blơi gơnam mă yua, măi mok, ia jrao gun pioh kơ bruă pơgang, pơgăn klin; ƀơk giăm truh 5 tơn gơnam ƀong huă kơ neh wa ƀơi ƀôn ngă adơi ayong ƀôn B’hôk amăng hơdôm hrơi guang dar.

“Hăng bruă mă lĕ mơnuih hyu mă tơlơi pơhing phrâo ƀing gơmơi ngă tui bruă iâu pơthưr ƀing thâo khăp păp, thâo tơngiao hăng djru wot pran jua pô kiăng djru neh wa kual asuek, ataih, kual hmâo arăng guang dar yua kơ klin Covid-19. Ăt bưng mơn ƀing thâo tơngia gơñu amra gum hrom khul mơnuih mă tơlơi pơhing phrâo ƀing gơmơi kiăng nao tơl anih anom hơdôm kual guang dar, kual asuek, ataih kiăng ƀơk gơnam tam brơi kơ mơnuih ƀôn sang bơdjơ̆ nao yua kơ klin Covid-19”.

Khua pơ ala kơ khua git gai VOV – Tây Nguyên ƀơk gơnam tết kơ neh wa ngă adơi ayong ƀôn B’hôk

Giăm truh 17 thun rơgao, hăng tơlơi gum djru mơng Sang bruă apui lơtrik Daklak hăng VOV- Tây Nguyên, dua bôh ƀôn ngă adơi ayong M’briu hăng B’hôk hmâo laih hơdôm tơlơi pơplih rơđah rơđông, tơlơi hơdip ƀơ ƀrư̆ dưi pơđĭ tui, biă ñu amăng hơdôm hrơi klin Covid-19 ngă./.

Tuấn Long: Čih – Siu H’ Prăk: Pơblang