VOV4.Jarai - Hơdôm hrơi rơgao, ƀơi tơring čar Daklak hmâo hơdôm tơlơi čơđai djai ia ƀlung biă ñu čơđai sang hră. Tơlơi phrâo anai hloh lom čơtlăm lơ 17/5, ƀơi dơnao ia plơi Ea Lang, să Čư Pui, tơring glông Krông Bông ngă sa čô čơđai djai. Anun lĕ Lương Thị Như Ngọc, 9 thun ƀơi plơi Ea Lang, să Čư̆ Pui, tơring glông Krông Bông, tơring čar Daklak. Adơi Ngọc lĕ čơđai anih 3, Sang hră gưl sa Čư̆ Pui II, să Čư̆ Pui, tơring glông Krông Bông, tơring čar Daklak. Tơlơi djai ia ƀlung truh lom 3 mông čơtlăm lơ 17/5, lom adơi Ngọc hrom hăng ƀing gŏp ñu hyu ngui. Lom ngui, ƀu bưng bor tơkai lê̆ trun amăng dơnao ia hăng djai ia ƀlung. Hlâo kơ anun, lơ 13/5, adơi H’ Hằng Kmăn hăng H’ Nan Mlô, leng kơ tơkeng thun 2008, hrăm hrom sa bôh anih 7A, Sang hră gưl 2 Trần Quốc Toản să Ea R’bin, dô̆ ƀơi să Ea R’bin, nao pơ̆ ia Krông Nô mơnơi djai ia ƀlung. Bơ̆ lom lơ 16/5, ƀơi dơnao ia Drao, să Čư̆ Dliê Mơnông, tơring glông Čư̆ Mgar ăt hmâo tơlơi čơđai djai ia ƀlung mơn anun lĕ adơi Phan Thị Thanh L, 13 thun, hăng Phan Thanh N. 11 thun, wot dua gơñu dô̆ ƀơi thôn 1, să Čư̆ Dliê Mơnông djai. Na nao hmâo tơlơi čơđai djai ia ƀlung lĕ tơlơi pơtă ƀing amĭ ama čơđai, sang anô̆ hăng plơi pla amăng bruă wai lăng čơđai pơhlôm lom bơyan pơdơi prong glăk truh./.  

Siu H’ Prăk: Pô pơblang