VOV4.Jarai - Kiăng djop brơi gơnam blơi prăp mơng mơnuih ƀôn sang amăng tal rơnuč thun 2021 hăng Tết tui phiăn juăt Thun Rơmung 2022, ră anai hmâo laih 10 bôh anom bơwih ƀong prong ƀơi tơring čar Daklak pơkôl djă pioh gơnam či kiăng hăng abih bang nua ñu 270 klai prăk. Hơdôm mơta gơnam hơđong biă ñu: braih, mơnong un, mơnong mơnŭ bip, bôh mơnŭ bip, ia rơmă, ƀôt ngok hăng djop mơta gơnam tam ƀong huă, añăm hla rok hơbơi pơtơi bôh troh, ia jâu, ia xăng, ƀañ kĕo mưt. Hơdôm hrơi ngă tui hơđong nua rơbêh kơ 2 blan, mơng lơ 15/12/2021 – 28/2/2022. Amăng hơdôm hrơi klin Covid-19 ngă tơnap sui hrơi, Gơnong bruă sĭ mơdrô Daklak rơkâo hơdôm anom bơwih ƀong, anom mă bruă hrom, sang anô̆ bơwih ƀong sĭ mơdrô djă pioh rah gơnam tam, pơhlôm rah bruă pơgang pơgăn klin lom bơwih ƀong sĭ mơdrô tui tơlơi pơkă. Ră anai, gơnam tam djop klă yơh kơ mơnuih ƀôn sang blơi yua hăng pơkă hlâo djop brơi amăng tal Tết. Gơnong bruă sĭ mơdrô ăt lăi pơthâo mơn kơ Jơnum min mơnuih ƀôn sang tơring čar Daklak pel ĕp, pơsit Kơčăo bruă ngă tui jơlan hơdră hơđong nua gơnam či kiăng tal rơnuč thun 2021 hăng Tết tui phiăn juăt Nhâm Dần 2022./.

Siu H’ Prăk: Pơblang