VOV4.Jarai - Jơnum min mơnuih ƀon sang hơdôm boh să giăm guai tơring čar Daklak, hơmâo să Ia R’vê, Ia Lốp, Ea Bung (tơring glông Ea Súp) hăng să Krông Na (Buôn Đôn) phrâo gum hrŏm hăng hơdôm puih tơhan wai pơgang guai lŏn ia amăng kual pơphun bruă “Abih bang mơnuih djru pơgang klin Covid-19 hăng pơgăn ƀing mut rai dêh čar ča čot”. Tui anun, pô pơ ala brơi grup wai lăng ƀơi 51 ƀut plơi pla gah 4 boh să giăm guai lŏn ia hơmâo čih tơlơi ƀuăn amra ngă tui hơdôm mơta bruă anun lĕ: Hyu pơtô pơblang na nao brơi mơnuih ƀon sang, ding kơna ngă tui tơlơi črâo trun, hơdră bruă mơng Ping gah hăng tơlơi phiăn kơnuk kơna, tơlơi pơkă amăng plơi pla, biă mă ñu lĕ tơlơi phiăn amăng wai pơgang guai lŏn ia, tơlơi pơkă amăng pơgang klin Covid-19. Abih bang mơnuih ƀon sang lêng kơ ƀuăn amra ngă tui tơlơi phiăn guai lŏn ia, ngă tui tơlơi črâo trun amăng pơgang klin Covid-19, ngă tui khut khăt amăng bruă phaih gah ia jrao, hăng anăm tum pơƀut lu mơnuih tui tơlơi pơkă.

Siu Đoan: Pơblang