VOV4.Jarai - Ƀơi Daklak, tơlơi hơdip hơđong phrâo ƀơ ƀrư̆ pơwot hlăi hăng mơnuih ƀôn sang ƀơi hơdôm kual phun klin ngă lom hơdôm mơnuih ƀă kơman Covid-19 dưi wai lăng, klin ruă phun ñu dưi pơgăn. Lu mơnuih ruă tơdơi kơ pơjrao hmâo pơwot glăi amăng tơlơi kiăng khăp mơng mơnuih ƀôn sang hăng plơi pla. Klin ruă hmâo djru laih djop mơnuih jê̆ giăm hloh hăng lăng yôm hloh hơdôm mông hơđong dô̆ giăm. Tuấn Anh – Pô hyu mă tơlơi pơhing phrâo Gong phun jua pơhiăp dêh čar Việt Nam hmâo tơlơi čih lăi nao kơ tơlơi anai.

Tơdơi giăm hmâo sa blan abih bang sang anô̆ khom dô̆ čơlah hơbit yua kơ ƀă Covid-19, ayong Đỗ Văn Lực ƀơi ƀuôn Čuôr Dăng A, să Čuôr Dăng, tơring glông Čư̆ Mgar mơ-ak biă yua kơ sang anô̆ hmâo pơhlôm tum jơngum. Ayong Lực lăi pơthâo: Amăng tal klin ngă găn să lom akô̆ blan 11, sang anô̆ ñu 5 čô mơnuih lĕ hmâo 4 čô mơnuih ƀă kơman Covid-19. Amăng anun, wot 2 rơkơi bơnai gơñu leng kơ dô̆ čơlah pơjrao ngă tơlơi hơdip  luk puk hĭ. Bơngoh hloh lĕ 2 čô ană anet glăk amăng hnưr thun ƀong huă, hrăm hră ăt ƀă kơman klin mơn. Tơlơi bơngot yua kơ klin ruă lu hơdôm hơpă lĕ tơlơi mưn ƀuh bưng băi suaih ruă, tum jơngum sang anô̆ ăt lu tui anun mơn:

“Tal blung lĕ dô̆ bơngot, yua kơ hlơi hlơi leng kơ djơ̆ klin ruă anun huĭ biă. Tơdơi kơ anun ơi ia jrao bơwih brơi pơsur hơđong pran jua, pơhrăm drơi jăn, ƀong huă klă, tơlơi suaih pral klă lĕ dưi yak rơgao. Sang anô̆ kâo bưng biă lom dưi pơwot glăi tơlơi hơdip kah hăng hlâo”.

Mơnuih ƀôn sang pơwot glăi tơlơi hơdip hơđong phrâo

Ăt hmâo ha tal lĕ amăng hơdôm anih phun klin ngă ƀơi Daklak, ră anai tơlơi hơdip mơng mơnuih ƀôn sang să Čư̆ Pui tơring glông Krông Bông hmâo pơwot glăi kah hăng tơđar. Ơi Y Bran Niê, ƀơi ƀôn Khoá, să Čư̆ Pui, mơ-ak biă lom sang anô̆ hmâo 6/9 čô mơnuih F0, leng kơ dưi pơjrao suaih. Ơi Y Bran NIê brơi thâo: Hrom hăng tơlơi bơngot kơ tơlơi suaih pral hăng tơlơi hơdip, lom abih bang mơnuih amăng sang anô̆ dô̆ čơlah pơjrao dô̆ hmâo tơlơi bơngot kơ đang hmua, yua kơ kơ phê truh hrơi pĕ pơhrui; rơmô kơbao kiăng hmâo mơnuih kiă wai. Ăt gơnang kơ gong gai djru gum, neh wa iâu telephone pơsur tơña bla, ƀing ơi nai ia jrao abih pran jua pơjrao anun djop mơnuih suaih pral pơwot glăi pơ̆ sang pơhlôm. Phun pla, hlô rông ăt dưi djru bơwih brơi tŏng ten mơn:

 “Sang anô̆ hmâo mơnuih djơ̆ F0 ăt bơngot mơn lom rim mơnuih sa anih lăi pơthâo nao rai ƀu thâo. Kâo găn nao pơ̆ anun ƀuh tơlơi bơwih brơi klă, asơi huă djop. Kâo glăi truh pơ̆ anai bưp glăi sang anô̆ mơ-ak biă. Kâo ƀu bơngot hơget dong tah yua kơ djop mơnuih suaih ruă laih, hmâo pran jua glăi kah hăng hlâo hăng nao mă bruă abih laih”.

Mơnuih ƀôn sang kual phun klin ngă pơwot glăi tơlơi hơdip hơđong phrâo

Tơring glông Krông Bông sa amăng hơdôm anih anom čih hmâo lu mơnuih ƀă kơman Covid-19 amăng plơi pla. Khă hnun hai, truh ră anai lu mơnuih suaih ruă, pơwot glăi sang anô̆ mă bruă ngă đang hmua dong. Ơi Nguyễn Ngọc Pháp, Kơ-iăng Khua Jơnum min mơnuih ƀôn sang tơring glông Krông Bông brơi thâo: Ƀơi hơdôm bôh plơi pla, hlâo adih lĕ anih klin ngă phun ră anai ƀu dô̆ hmâo hlơi ƀă kơman klin amăng plơi pla. Tơring glông hmâo pơwot glăi kual mơtah, samơ̆ pran jua kơđiăng, tơlơi pơmin pơgang pơgăn klin ruă ăt dưi pơđĭ tui mơn.

“Grŭp črâo ba tơring glông ăt hmâo ngă tui khop mơn tơlơi črâo ba đing nao kual guang dar, pơdjai kơman, pel ĕp hyu huĕt ĕp hơdôm F1, F2 hăng hmao tlôn ba nao čơlah. Bơ̆ hăng kual guang dar hmâo lăng tui khut khăt yua anun Krông Bông tañ dưi pơgăn klin”.

Hơdôm anung asơi gum djru hăng mơnuih dô̆ čơlah pơgang, pơgăn klin ruă Covid-19

Tui hăng mrô yap mơng gơnong bruă ia jrao tơring čar Daklak yap truh lơ 16/12, đơ đam tơring čar hmâo čih pioh rơbêh kơ 9.700 čô mơnuih ƀă kơman Covid-19, amăng anun rơbêh kơ 7 rơbâo čô mơnuih ruă hmâo pơjrao suaih. Tơring čar đăo gơnang lĕ Covid-19 glăk ƀơ ƀrư̆ dưi wai lăng, hăng hmâo brơi pơdơi sa bôh sang ia jrao pơjrao mơnuih ƀă klin. Lu anih anom amăng tơring čar, yap wot hơdôm kual phun klin ngă, mơnuih ƀôn sang glăk ngă juăt klă hăng hmâo laih tơlơi hơđong phrâo./.

            Tuấn Anh: Čih – Siu H’ Prăk: Pơblang