VOV4.Jarai - Hơdôm hrơi rơgao, hơdôm tơlơi akă gal amăng bruă test tañ Covid-19 hăng pơsit hră tŭ yap ƀu hmâo kơman klin kơ mơnuih ƀôn sang găn nao rai hơdôm anih dô̆ gak ĕp klin tơring čar, ngă lu mơnuih ƀôn sang ƀơi Daklak bưp tơnap. Gơñu khom đuăi hyu yŭ ngŏ kiăng ĕp anih anom pơčrang lăng, lu mơnuih ƀu dưi ngă khom pơwot glăi sôh. Tơlơi hơdip mơda, bruă mă kiăo tui anun ăt luk puk tui mơn.

Suă pran hơnong tơdơi kơ yak tơbiă mơng kual lăi pơthâo tơlơi suaih pral mơng Sang ia jrao plơi prong Buôn Ma Thuột, tơring čar Daklak, amai Trần Thị Tuyết, ƀơi Lâm Hà, tơring čar Lâm Đồng brơi thâo, lơ 5/7 ñu hăng gơyut ñu đĭ rơdêh thut nao pơ̆ Gialai kiăng čuă mơnuih juăt. Lom đuăi pơwot glăi Daklak kiăng glăi pơ̆ Lâm Đồng lĕ hmư̆ hing tơring čar Lâm Đồng rơkâo abih bang djop mơnuih mut amăng tơring čar khom hmâo hră pơčrang lăng kơman Sars-CoV-2 ƀu ƀuh ƀă kơman. Ñu hăt hŏt nao pơ̆ sang ia jrao plơi prong kiăng test tañ, samơ̆ lom truh pơ̆ sang ia jrao arăng lăi glăi lĕ sang ia jrao pơdơi jăng jai bruă pơčrang lăng kơman anai. Ƀu dưi pơčrang lăng, ƀu hmâo hră pơsit rô nao rai črăn jơlan pơwot glăi pơ̆ sang pô amai Tuyết khom dô̆ pơhrư̆i glăi dong.

 “Ƀing gơmơi glăk dô̆ đôm ƀơi anai hăng ƀu thâo ngă hiưm hơpă kiăng dưi mut amăng tơring čar Lâm Đồng. Tơdah kah hăng ră anai pơwot glăi Pleiku pơčrang lăng giong pơwot glăi, đuăi rơdêh rơngiă ƀiă biă mă ñu mơng 15-16 mông tui anun tơnap kơ mơnuih ƀôn sang biă. Ăt čang rơmang mơn grŭp gơnong bruă djru brơi hiưm hơpă kiăng dưi rô nao rai gêh gal ƀiă”.

Tơdơi kơ dua hrơi lăi pơthâo pơčrang lăng tañ Covid-19 anom pel ĕp tơlơi duam ruă Sang ia jrao Hoàn Hảo khom pơdơi yua kơ Gơnong bruă ia jrao tơring čar Daklak akă pơsit brơi  

Bơ̆ ayong Trần Anh Kiệt, pô mơgăt rơdêh mơng Buôn Ma Thuột - Ƀôn prong Hồ Chí Minh khom puêr akô̆ rơdêh glăi pơ̆ sang, khom pơdơi đuăi rơdêh hơdôm hrơi yua kơ ƀu dưi ĕp anih pioh test tañ Covid-19.

 “Hơdôm hrơi ăt test mơn, samơ̆ hră test anun abih hrơi pơkă laih, arăng iâu khom test anun kah mơng dưi nao, ƀu hmâo hră anun pô nao pơ̆ hơpă leng kơ ƀu dưi sôh, nao pơ̆ anun arăng ăt kiăng pô pơwot glăi mơn.”

Ơi Nguyễn Ngọc Thịnh, Kơ-iăng Khua Sang ia jrao prong plơi prong Buôn Ma Thuột brơi thâo, yua kơ tơlơi kiăng test tañ Covid-19 mơng mơnuih ƀôn sang đĭ lu tañ, lom anun gơnam mă yua pơčrang lăng tañ mơng sang ia jrao hmâo rơnoh, ƀu djop tơlơi kiăng mơnuih ƀôn sang anun Sang ia jrao khom pơdơi jăng jai bruă anai.           

 “Ră anai khom rơkâo tơlơi gum pơhiăp mơng Gơnong bruă, sa lĕ blơi djơ̆ tui tơlơi pơkă anun lĕ khom juă nua, dua lĕ rơkâo pơdơi jăng jai juă nua hăng mrô hơdôm anun tui kâo pơkă lăng hlâo, mrô mơnuih nao rơkâo pơdơi rơkâo blơi. Ră anai tơlơi kiăng mơnuih ƀôn sang ăt kah hăng anom bơwih ƀong lu rơgao đơi.”

Hrom hăng Sang ia jrao prong plơi prong Buôn Ma Thuột, ƀơi tơring čar Daklak dô̆ hmâo 2 bôh anom dong ngă tui bruă test tañ Covid-19 anun lĕ Sang ia jrao Nhi Đức Tâm hăng Anom pel ĕp tơlơi ruă Sang ia jrao Hoàn Hảo. Khă hnun hai, yua kơ akă dưi hmâo tơlơi tŭ ư mơng Gong bruă ia jrao, anun tơdơi kơ 2 hrơi lăi pơthâo pơčrang lăng tañ Covid-19, 2 anom anai ăt hmâo pơdơi jăng jai mơn tơlơi anai. Tui anun, truh ră anai, Daklak ăt lui lơi hong mơn bruă pơčrang lăng tañ Covid-19. Mơnuih ƀôn sang kiăng nao pơ̆ tơring čar rơkâo khom hmâo bôh tơhnal pơčrang lăng kơman Sars-CoV-2 khom dô̆ tơguan. Tơlơi hơdip mơda, bruă mă khom gơnang tui hră pơ-ar pơčrang kơman klin.

Tui hăng ơi Trịnh Quang Trí, Khua Anom wai lăng tơlơi duam ruă tơring čar Daklak hră čih bôh tơhnal test tañ Covid-19 kơnong kơ dưi pơsit brơi sa čô mơnuih hmâo ƀudah ƀu hmâo ƀă kơman klin ƀơi hrơi mông mă ia khak pơčrang lăng. Ñu ƀu hmâo nua sui hrơi blan ôh, ăt ƀu pơhlôm mơn pô anai ƀu ƀă kơman pơgi kơdih anai. Yua anun khom jŭ yap glăi bruă pel ĕp hră pơsit bôh tơhnal pơčrang lăng tañ Covid-19 kah hăng hră yua pioh rô nao rai hăng mă bruă yua kơ tơlơi anai pơjing pran pơgô̆ gah prăk mă yua hăng mơnuih mă bruă, lom anun bôh tơhnal ba glăi ƀu prong.

 “Ră anai ta pơphun ngă hiưm hơpă pioh mơnuih ƀôn sang glăi arăng nao pơ̆ sang ia jrao kiăng lăi pơthâo kiăng ta thâo. Bơ̆ ră anai mơ̆ nao pơčrang lăng test tañ kơnong kơ hăng mơnuih mơgăt rơdêh taxi, rơdêh đuăi jơlan ataih đôč ƀu rơngiă prăk brơi kơ arăng, anô̆ anun ngă gal brơi kơ mơnuih ƀôn sang, mơng ngă gal brơi pơgang pơgăn klin.”

Tui hăng ơi Nay Phi La, Khua Gơnong bruă ia jrao tơring čar Daklak, tơdah sa čô mơnuih glăk hmâo tơlơi ruă amăng drơi jăn, pơčrang lăng ƀu ƀuh kơman klin, samơ̆ tơdơi kơ anun hơbin gơñu amra ngă tưp hyu kơman kơ pô pơkon. Yua anun gah tơlơi kơsem min, bôh tơhnal pơčrang lăng ƀu ƀuh kơman kiăng nao rai ƀơi hơdôm anih anom ƀu hmâo nua pơkă lu hrơi khă hră anai tŭ yua mơng 2 truh kơ 3 hrơi. Tơlơi anai kiăng lăi, tơlơi pơsit pơčrang lăng ƀu ƀuh kơman klin ƀu hmâo nua lu hrơi amăng pơgang pơgăn Covid-19, samơ̆ glăk ba glăi lu tơlơi tơnap kơ gơnong bruă ia jrao hăng mơnuih ƀôn sang, ngă kaih bruă rô nao rai dŭ pơgiăng gơnam tam, ngă tơnap kơ bruă bơwih ƀong ƀơi hơdôm bôh tơring čar./.

            Nam Trang: Pô čih – Siu H’ Prăk: Pô pơblang