VOV4.Jarai -  Hơdôm hrơi jê̆ hăng anai, ƀơi tơring čar Daklak ƀuh na nao hơdôm ƀut mơnuih ƀă kơman Covid-19 amăng plơi pla. Bŏng glăi hăng tơlơi pơplih klin ngă tơnap, Daklak hmâo hruă laih tơlơi pơkă, kơtưn lăi pơhing pơsur mơnuih ƀôn sang pơđĭ tui tơlơi pơmin pơgang, pơgăn klin. Hrom hăng anun pơđĭ tui bôh thâo tŭ mă – pơjrao mơnuih ruă Covid-19 ƀơi Sang ia jrao prong Krông Ƀuk truh kơ 2 wot, prăp lui hmâo dong anih anom dô̆ čơlah hơbit prong ƀơi Buôn Ma Thuột, djop anih brơi năng ai ñu 1.300 čô mơnuih.

Tơdơi giăm hmâo 2 rơwang hrơi tơjuh pơtrun rơnoh dô̆ čơlah mơnuih mơnam tui Tơlơi črâo ba mrô 16 trun ngă tui tơlơi črâo ba mrô 15 mơng Khua dêh čar, plơi prong Buôn Ma Thuột, tơring čar Daklak hmâo hruă kơjăp pơwot glăi laih tơlơi pơkă dô̆ čơlah pơgang, pơgăn klin. Kơnong kơ 13 hrơi, hmâo 4 ƀut mơnuih lar tưp amăng plơi pla hăng giăm truh 50 čô mơnuih phrâo ƀă, ƀu djơ̆ ngă plơi prong Buôn Ma Thuột pơwot glăi hăng tơlơi črâo ba mrô 16 đôč ôh mơ̆ hrom hăng anun pơphun pơčrang lăng tañ amăng đơ đam plơi prong, hăng giăm truh 102 rơbâo bôh sang anô̆ mơnuih ƀôn sang. Ơi Vũ Văn Hưng, Khua Jơnum min mơnuih ƀôn sang plơi prong Buôn Ma Thuột brơi thâo, hmâo 70 grŭp pơčrang lăng dưi pơdŏng, hăng amra pel ĕp amăng hơdôm hrơi mơng lơ 27/8. Hrom hăng anun, tal dô̆ čơlah khut khăt hloh mơ̆ plơi prong pơphun, amra pơhlôm bruă pơčrang lăng tañ, hơđong, thâo krăn F0 glăk hmâo amăng plơi prong:

“Ngă tui tơlơi črâo ba mrô 16 lĕ kom ƀu brơi hlơi tơbiă ƀơi jơlan, rơngiao kơ mơnuih mă bruă hrom. Hăng sit yơh, 1/9 amra ƀu hmâo tum pơƀut mut thun hrăm phrâo, pơdơi abih bang hơdôm bruă hrăm hră. Nao sang čơ amra hmâo hơdôm khul grŭp, đah kơmơi, hlăk ai amra nao sang čơ brơi mơnuih ƀôn sang nao pơ̆ rim grŭp mơnuih ƀôn sang, plơi pla. Đơ đam plơi prong amra pơčrang lăng tui gru pơgôp mơng abih bang hơdôm bôh sang anô̆, amăng hơdôm rơwang mơng 5-7 hrơi amra giong”.

Sa kual phrâo hmâo guang dar ƀơi să Čư̆ Eƀua – plơi prong Buôn Ma Thuột

Amăng 2 rơwang hrơi tơjuh, Covid-19 ƀơi Daklak pơplih lăp bơngŏt biă. Ƀu djơ̆ kơnong kơ plơi prong Buôn Ma Thuột lu mơnuih mơ̆ hơdôm bôh să ƀiă mơnuih, kah hăng să Čư̆ Bao (plơi prong Buôn Hồ), să Čư̆ Nĕ (tơring glông Krông Ƀuk) hăng să Ea Nam (tơring glông Ea Hleo) ăt hmâo mơn ƀut mơnuih lar tưp amăng mơnuih mơnam, hăng rơbêh kơ 150 čô mơnuih ƀă kơman.

Anô̆ hrŭp ƀơi hơdôm ƀut mơnuih lar tưp anai leng kơ bơdjơ̆ nao bruă mă mơng hơdôm bôh anom bơwih ƀong hmâo rô nao rai hăng hơdôm bôh tơring čar, ƀôn prong glăk hmâo klin Covid-19 gluh đĭ kơtang. Lom hyu huĕt ĕp brơi ƀuh, glăk hmâo ƀu ƀiă mơnuih ƀu hmâo thâo amăng lăng tui mơnuih mơgăt rơdêh, rơdêh, tô nao rai tơlơi pơhing kơplah wah hơdôm tơring čar hăng kơplah wah hơdôm khul mơnuih bơdjơ̆ nao. Kah hăng ƀơi plơi prong Buôn Hồ, tơdơi kơ giăm hmâo 1 rơwang hrơi tơjuh pơphun hmâo 57 čô mơnuih ƀă, bruă hyu huĕt ĕp ăt pơdơi ƀơi sa bôh anom mơn, yua kơ ƀu hmâo tơlơi pơhing kơ pô mơgăt rơdêh nao dŭ gơnam ƀơi anom anai hơdôm hrơi blung a blan 8. Thiếu tá Trần Ngọc Tú – Khua Grŭp tơhan wai lăng bruă rô nao rai ƀơi jơlan glông mrô 1, Anom tơhan polih Kông ang tơring čar Daklak, hrom hăng hơdôm khul apăn bruă mă bruă ƀơi Anom wai lăng tơdrông toa 110, wai lăng mơnuih, rơdêh mơng pơngŏ rai pơ̆ tơring čar brơi thâo, ră anai bruă tơnap hyu huĕt ĕp hmâo pơsir laih gơnang kơ hơdră pơčrang mrô QR hluai tui telephone rơnuk anai.

“Lom anun akă hmâo hơdră bôh thâo anun. Ră anai hmâo pơčrang lăng mrô QR abih. Rơdêh truh lĕ leng kơ rơkâo pơčrang lăng mrô QR, gah ia jrao rah, gah Ding jum kông ang rah. Lom pơčrang lăng thơ hmâo djop hơdôm tơlơi pơhing lăi nao”.

Hră kak pơsit amra hmâo klin Covid-19 glông să ƀơi Daklak 

Ƀơi anăp pơplih tơnap mơng klin ruă, jơnum Grŭp črâo bruă pơgang, pơgăn klin Covid-19 tơring čar Daklak, ơi Phạm Ngọc Nghị, Khua Jơnum min mơnuih ƀôn sang tơring čar lăi lĕ, ăt dô̆ mơn tơlơi ƀu đing nao mơng mơnuih ƀôn sang hăng mơng khul apăn bruă. Hrom hăng tơlơi rơkâo hruă kơjăp tơlơi pơkă, kơtưn lăi pơhing pơsur mơnuih ƀôn sang pơđĭ tui tơlơi pơmin pơgang, pơgăn, hơdôm anih anom amăng tơring car khom prăp lui kơ hơdôm tơlơi tơnap hloh amra hmâo kiăng hmâo jơlan gah rơđah, hmao tlôn. Ƀơi anăp, Daklak amra pơđĭ tui bôh thâo tŭ mă – pơjrao mơnuih ruă Covid-19 ƀơi Sang ia jrao prong Krông Ƀuk mơng 100 bôh sưng truh kơ 200 bôh sưng; prăp lui dong 2 anih anom dô̆ čơlah hơbit prong ƀơi Buôn Ma Thuột, djop anih kơ 1.300 čô mơnuih. Hăng tui ơi Phạm Ngọc Nghị, bôh thâo pơjrao Covid-19 ƀơi tơring čar ăt kah hăng khom pơđĭ tui mơn:

“Rơkâo Sang ia jrao prong kual khom prăp lui dong 5000 bôh sưng, yua kơ ƀing ta dô̆ djru kơ hơdôm bôh tơring čar Dăp Kơdư dong. Khom prăp lui anih anom gơnam tam hlâo. Bơ̆ tơdơi anai, lom hmâo mơnuih ruă thơ ta amra kơtưn dong mơnuih mă bruă. Amăng pơjrao lĕ gir run kiăng mơnuih ruă truh tal 2 lĕ tơbiă mơng sang ia jrao laih. Bơ̆ kiăng nao pơ̆ tal 3 kơnong kơ lom kiăng biă mă đôč”.

Tui hăng Anom wai lăng tơlơi duam ruă tơring čar Daklak, ƀơi tơring čar hmâo 1 bôh tơring glông gah kual “pơhlôm klin”. 8 bôh tơring glông amăng kual kơñĭ – kual amra hmâo klin; 3 bôh tơring glông, 1 plơi prong hăng plơi prong Buôn Ma Thuột, jing kual kơnĭ jă hloh – amra hmâo klin ngă lu, hăng tơring glông Krông Ƀuk ƀơi kual mriah – amra hmâo klin ngă prong. Amăng črăn pơkă phrâo pơgăn Covid-19, Buôn Ma Thuột hăng Krông Ƀuk hmâo dô̆ čơlah khut khăt mơng čơtlăm lơ 26/8. Bruă pơčrang lăng abih bang ăt pơphun pok pơhai mơn. Amăng anun, Buôn Ma Thuột pơphun pơčrang lăng đơ đam plơi prong hăng tơring glông Ea Kar pơphun pơčrang lăng ƀơi abih bang hơdôm bôh plơi pla djuai ania ƀiă. Mơnuih ƀôn sang Daklak čang rơmang hơdôm tơlơi gir run phrâo amra tañ ruah tơbiă F0 hmâo amăng plơi prong, pơđut bruă tơbiă rai hơdôm ƀut mơnuih lar tưp prong, djru pơgăn ba glăi bôh tơhnal hăng klin Covid-19./.

Siu H’ Prăk: Pô pơblang