VOV4.Jarai - Yua bơdjơ̆ nao mơng klin Covid-19, lu blan rơgao hơdôm bôh anom bơwih ƀong gah rơdêh pơgiăng tuai ƀơi Daklak hrŏ trun prăk pơhrui mơng 70-80%, đa ƀu hmâo prăk pơhrui glăi mơtăm lom khom pơdơi jăng jai bruă mă. Ƀơi anăp tơlơi tơnap mơng anom bơwih ƀong, Khul dŭ pơgiăng tuai tơring čar Daklak rơkâo hơdôm ƀirô apăn bruă hrŏ trun prăk mă jia, prăk apah ƀudah pơhrơ̆i prăk tla hnưh, nô̆p prăk hră pơgang gah mơnuih mơnam kơ mơnuih mă bruă kiăng hơdôm bôh anom bơwih ƀong yak rơgao tal tơnap tap ră anai.

Sang bruă bơwih ƀong mơnuih ƀôn sang gah bruă dŭ pơgiăng tuai Hải Cường (ƀơi plơi prong Buôn Ma Thuột) hmâo 8 bôh rơdêh pơgiăng tuai mơng Daklak nao pơ Hà Nội, hăng rơbêh kơ 30 čô mơnuih mă bruă amăng anun hmâo mơnuih mơgăt rơdêh, djru bruă, jŭ yap prăk, dŭ dưm dăp gơnam tam. Ơi Nguyễn Hải Cường – Khua Sang bruă bơwih ƀong mơnuih ƀôn sang gah bruă dŭ pơgiăng tuai Hải Cường brơi thâo, yua kơ klin ruă anun lu blan rơgao tuai đĭ rơdêh hrŏ trun lu, hơdôm bôh rơdêh ƀu đuăi hyu pơgiăng tuai mơng Daklak nao Hà Nội hăng pơwot glăi ngă anom bơwih ƀong lŭp lăp lu. Khă lŭp lăp lu samơ̆ Sang bruă ăt nô̆p djop mơn hơdôm djuai tuh jia, prăk apah ƀudah nô̆p prăk pơgang mơnuih mơnam kơ mơnuih mă bruă tui djơ̆ tơlơi pơkă. Tơdah ƀu dưi djru hmao tlôn thơ amra ƀu dưi bơwih ƀong dong tah.

“Amăng hơdôm hrơi anai, anom bơwih ƀong khom pơ ala glăi prăk lŭp hmâo 100 klăk prăk sa blan. Mrô prăk anai hmâo prăk blan mơnuih mă bruă, apah anih jưh rơdêh, prăk găn nao rai ƀơi jơlan glông, prăk kơmlai sang prăk. Ƀing gơmơi rơkâo ƀirô apăn bruă kah hăng Gơnong bruă jơlan nao rai hăng dŭ pơgiăng, Anom mă jia, hơdôm bôh sang prăk pơhrŏ trun prăk kơmlai, prăk mă jia, prăk apah nao rai... Kơnong kơ hmâo tui anun, ƀing gơmơi mơng dưi gơgrong djă pioh bruă bơwih ƀong pơwot glăi.”

Yua klin Covid-19 ngă glăi, hơdôm bôh anom bơwih ƀong pơgiăng tuai ƀơi Daklak khom pơdơi jăng jai bruă mă ƀudah ngă tui khŏng khŏt

Khul dŭ pơgiăng tuai tơring čar Daklak hmâo 40 bôh anom bơwih ƀong gah dŭ pơgiăng tuai, hăng giăm truh 18.000 bôh rơdêh pơgiăng tuai hăng gơnam tam djop mơta. Tui hăng ơi Phạm Văn Mạnh  - Khua Khul dŭ pơgiăng tuai tơring čar Daklak, yua kơ klin Covid-19 ngă glăi bơdjơ̆ nao prong bruă bơwih ƀong mơng hơdôm bôh anom bơwih ƀong.

Rơđah biă ñu, mrô rơdêh pơgiăng tuai kah hăng rơdêh buýt, taxi leng kơ hrŏ trun sôh mrô rơdêh, tuai pơgiăng ... Prăk pơhrui glăi hơnong ñu mơng hơdôm bôh anom hrŏ trun mơng 70-80%, lom anun abih bang hơdôm bôh anom leng kơ čan prăk mơng ngăn rơnoh tuh pơplai rơdêh pơgiăng. Rơngiao kơ anun, hơdôm bôh anom khom tla prăk blan hăng djru prăk rơngiă bruă mă jăng jai kơ mơnuih apăn bruă, mơnuih mă bruă; prăk pơgang mơnuih mơnam, prăk rơngiă bruă mă; prăk apah nao rai, pơgang jơlan nao rai; prăk tuh jia djop mơta; kơmlai sang prăk...

Ơi Phạm Văn Mạnh lăi pơhing, ƀơi anăp hơdôm tơlơi tơnap phrâo lăi, Khul hmâo ngă hră rơkâo ƀirô apăn bruă kiăng djru brơi hơdôm bôh anom bơwih ƀong amăng hơdôm hrơi klin Covid-19 ngă dleh tơnap.

“Ƀing gơmơi hmâo laih hră pơ-ar rơkâo Ding jum prăk kak hăng ƀirô mă jia pel ĕp ba prăk tuh jia hăng anom bơwih ƀong dưi hrŏ trun mơng 1-2% bơhmu hăng 10% kah hăng tơlơi pơkă hlâo adih; gah sang prăk ƀing gơmơi ăt čang rơmang mơn gơñu pơhrơ̆i brơi ƀu yap kơmlai amăng 12 blan thun 2021; bơ̆ bruă nô̆p prăk gah pơgang mơnuih mơnam, ƀing gơmơi ăt rơkâo mơn Ding jum wai lăng bruă mă, tơhan rơka ruă hăng mơnuih mơnam hmâo tơlơi gum pơhiăp hăng Anom pơgang gah mơnuih mơnam tơring čar rơkâo djru brơi prăk nô̆p pơgang gah mơnuih mơnam kơ mơnuih mă bruă amăng sa thun, hăng amra nô̆p glăi lom anom bơwih ƀong mă glăi bruă.”

Prăk pơhrui glăi mơng ding kơna gah Khul dŭ pơgiăng tơring čar Daklak hrŏ trun 70-80%, đa ƀu hmâo pơhrui glăi ha prăk hơpă ôh

Ơi Lê Đình Minh – Kơ-iăng Khua Gơnong bruă jơlan nao rai hăng dŭ pơgiăng tơring čar Daklak pơsit, ră anai gơnong ruă hmâo mă laih hră pơ-ar rơkâo gum djru mơng Khul dŭ pơgiăng tuai tơring čar Daklak. Gơnong bruă hmâo tum pơƀut laih hơdôm bôh yôm rơkâo đĭ kiăng ba tơbiă rơkâo đĭ hăng Jơnum min mơnuih ƀôn sang tơring čar hăng hơdôm gơnong bruă bơdjơ̆ nao pơhrŏ trun prăk apah ječ kơ hơdôm bôh anom bơwih ƀong, anom mă bruă hrom gah dŭ pơgiăng tuai hăng gơnam tam ƀơi tơring čar.

“Ră anai tui hăng tơlơi rơkâo đĭ mơng Khul dŭ pơgiăng tuai tơring čar Daklak, Jơnum min mơnuih ƀôn sang tơring čar hmâo jao laih Gơnong bruă prăk kak, Gơnong bruă wai lăng mơnuih mă bruă, tơhan rơka ruă hăng mơnuih mơnam, Gơnong bruă jơlan nao rai hăng dŭ pơgiăng, Anom ia jrao, Anom mă jia tơring čar, Sang prăk, Hră pơgang gah mơnuih mơnam... đing nao kơsem min pơtô brơi mơng dêh čar hăng tơlơi sit ƀơi tơring čar kiăng ĕp jơlan djru hơdôm bôh anom bơwih ƀong dŭ pơgiăng tuai gơnam tam amăng hơdôm hrơi pơdơi jăng jai kiăng pơgang, pơgăn klin Covid-19 yak rơgao rơwang tơnap ră anai. Truh kơ hmâo tơlơi tŭ ư hrom jơlan gah kah Jơnum min mơnuih ƀôn sang tơring čar pơsir tui djơ̆ tơlơi pơkă amăng tơlơi phiăn”./.

Tuấn Long: Pô čih – Siu H’ Prăk: Pô pơblang