VOV4.Jarai - Hơdôm bôh tơring čar kual Dăp Kơdư lăi hrom hăng Daklak lăi ha jăn hmâo hơjan sui laih. Khă hnun hai ƀơi să Ea Siên, plơi prong Buôn Hồ, tơring čar Daklak ăt akă hmâo hơjan mơn, ring bruă hnoh ia thu ngă giăm truh 2.000 ektar đang hmua bơbeč truh prong hăng rơbêh kơ 1.400 bôh sang anô̆ mơnuih ƀôn sang kơƀah ia yua amăng sang dô̆.

Đang kơ phê prong rơbêh kơ 1 ektar glăk amăng hơdôm thun blan hmao bôh mơng sang anô̆ ơi Hứa Văn Quân, să Ea Siên, plơi prong Buôn Hồ glăk bŏng glăi hăng tơlơi kơƀah ia prong. Kơ phê glăk amăng rơwang rông bôh prong djơ̆ ñu lĕ mơtah hlê̆ hnun, samơ̆ pung kơ gliu hla dong, bôh mơda krô hĭ hăng hlung trun. Ơi Hứa Văn Quân brơi thâo, tơdah amăng hơdôm hrơi pơ̆ anăp ƀu hmâo hơjan thơ, đang kơ phê ƀu hmâo ia pruih hă, amra rơngiă pưh tơngan ƀu tlaih ôh.

“Hơdôm hrơi anai kah hăng hơdôm thun hlâo adih ƀu kơƀah ia, kơ phê bôh ñu prong biă, samơ̆ yua kơ kơƀah ia anun bôh ñu ƀu prong kah hăng hơdôm thun hlâo adih. Phang khô̆t dô̆ ngă than kơ phê krô gliu, bôh mơda hlung trun lu, đa lĕ hmâo lu phun djai laih”.

Mơnuih ƀôn sang să Ea Siên glăk dô̆ tơguan ia hơjan rim mông kiăng bŏng glăi hăng phang khô̆t

Tui hăng anun, đang kơ phê pla plah kơtor klai prong 1,4 ektar mơng sang anô̆ yă Siu H’ Niê, ƀơi thôn 2B, să Ea Siên, plơi prong Buôn Hồ ăt glăk bŏng glăi mơn hăng phang khô̆t prong. Yă Siu H’ Niê lăi pơthâo, thun hlâo đang  anai pơhrui glăi rơbêh kơ 4 tơn kơ phê asar krô, 5 tơn kơtor, samơ̆ thun anai phang khô̆t ngă kơ phê krô khiă hla, kơtor pla plah lĕ djai hĭ. Prăk pơhrui glăi mơng sang anô̆ yă Siu H’ Niê biă ñu hluai tui kơ 1,4 ektar lŏn anai, hnun mơn, phang khô̆t ngă răm rai abih.

“Pơ-iă hang tui anai kơtor djai abih laih, thun hlâo pơhrui hmâo 20 klăk prăk lĕ thun anai rơngiă pưh tơngan, bơ̆ đang kơ phê ăt glăk gliu hla, hlung bôh mơn. Ia bơnư̆ lĕ thu khô̆t abih laih. Tơdah hơdôm hrơi dong ƀu hmâo hơjan prong hă amra hrŏ trun lu biă. Phang khô̆t kơtang ngă răm rai prong đơi.”

Hơdôm rơtuh ektar đang kơtor phrâo pla mơng mơnuih ƀôn sang să Ea Siên, plơi prong Buôn Hồ djai krô yua ƀu hmâo ia hơjan    

Mrô yap mơng Jơnum min mơnuih ƀôn sang să Ea Siên brơi ƀuh, bơyan phang thun 2021, đơ đam să hmâo giăm truh 2.000 ektar phun pla djop mơta; amăng anun hmâo 1.500 ektar phun pla sui thun lĕ kơ phê, tiu, mắc ca, bôh ƀrô yuan; dô̆ glăi rơbêh kơ 500 ektar phun pla ƀiă hrơi anun lĕ: pơdai, kơtor, rơtă hăng kơñĭt.

Tui hăng ơi Nguyễn Quốc Cường – Khua Jơnum min mơnuih ƀôn sang să Ea Siên, tơlơi phang khô̆t ƀơi să hmâo sui thun hăng anai laih, biă ñu amăng hơdôm hrơi phang prong. Khă hnun hai, bruă phang khô̆t truh amăng krah bơyan hơjan kah hăng ră anai lĕ ƀu ƀuh ôh. Ơi Cường lăi pơthâo, yua kơ lŏn ƀơi anai pha ra anun ia phun ƀơi să ƀu lu, ia yua kơ đang hmua hăng amăng sang anô̆ biă ñu hluai tui dua ring bruă hnoh ia Ea Mích, Ea Blang hăng hơdôm bôh dơnao ia, ia krông čroh hnoh. Bruă akă hmâo hơjan prong ngă laih hơdôm ring bruă hnoh ia, dơnao ia ƀudah ia krông čroh hnoh thu ia. Hloh kơ anun dong, hơdôm ring bruă hnoh ia lĕ dơnao Ea Mích hăng Ea Blang lu thun rơgao akă dưi kuăi huĕt, pơkra glăi anun bruă kŏng ia ƀu djơ̆ hăng rơnoh pơkă blung a ba truh kơƀah ia prong hloh. Phang khô̆t truh ƀu djơ̆ kơnong kơ ngă răm rai giăm truh 2.000 ektar đang hmua ôh mơ̆, ñu dô̆ ngă rơbêh kơ 7.500 čô mơnuih ƀơi să kơƀah ia yua amăng sang prong dong.

“Phang khô̆t truh ƀơi să ngă tơnap laih kơ bruă pruih pơđoh kơ đang hmua hăng ia yua amăng sang anô̆. Gah ia yua lĕ Jơnum min mơnuih ƀôn sang să hmâo ba tơbiă kơ plơi prong Buôn Hồ pơdŏng ring bruă pơđoh ia hơbit ƀô̆p mơng dơnao ia Krông Ƀuk Hạ nao pơ̆ thôn 2A pioh pơsir ia yua kơ mơnuih ƀôn sang ƀơi hơdôm bôh plơi; gah ia yua kơ đang hmua lĕ plơi prong ăt lăi pơthâo mơn hơdôm bruă kuăi huĕt, pơkra glăi ƀudah pơkra ming dua ring bruă hnoh ia Ea Bích hăng Ea Blang ƀudah pơdŏng dong hơdôm ring bruă hnoh ia pơkon pioh kơ bruă pruih pơđoh ia ƀơi să”.

Phang khô̆t ƀơi sa dua bit anih amăng krah bơyan hơjan pơdah ayuh hyiăng jai hrơi jai ƀu klă, tơnap him lăng hlâo ƀơi Dăp Kơdư./.

            Tuấn Long: Pô čih – Siu H’ Prăk: Pô pơblang