VOV4.Jarai - Hơdôm hrơi rơgao, ƀơi tơring čar Daklak hmâo čih pioh 82 mơta tơlơi iâu tư̆ hnưh prăk apui mơng mơnuih ƀôn sang, ƀudah rơkâo pơsit pel ĕp bruă dŏp mă apui... Bruă iâu na nao hmâo hơdôm tơlơi iâu tư̆ hnưh hăng pơhuĭ pơdjai apui ngă lu mơnuih hual kơdual. Ƀirô apăn bruă pơgang tơlơi anai lăi pơtă mơnuih ƀôn sang kơđiăng hăng hơdôm mrô iâu lăi mă ča kiăng bĕ tơlơi plư̆ pleč.

Ơi Trần Văn Nho – dô̆ ƀơi sang mrô 447 jơlan Lê Duẩn, phường Ea Tam, plơi prong Buôn Ma Thuột, brơi thâo, blan 6 phrâo rơgao, ñu hmâo mă mrô ƀu thâo mơng hơpă iâu rơkâo ñu tla prăk apui rơbêh kơ 370 rơbâo prăk. Yua kơ hmâo tla laih prăk apui anun ñu đing đăo, hăng iâu nao pơ̆ anom phun apui lơtrik kiăng pơsit tŏng lĕ, thâo anun hă sa hơdră plư pleč:

“Gơñu lăi sang anô̆ kâo glăk dŏng hnưh prăk apui lơtrik hăng rơkâo tla prăk hlâo kơ 4 mông čơtlăm kiăng huăi hmâo pơdjai apui. Kâo tơña lĕ ră anai tla prăk hiưm hơpă lĕ, gơñu lăi tơdơi kơ hmâo mă tơlơi pơhing lăi pơthâo lĕ mut jơlan link kiăng lăi pơdah mrô mơnuih blơi yua apui laih anun amra hmâo tơlơi pơtô brơi tla prăk. Kâo ƀuh đing đăo hmâo tơlơi hơget thơ anun pơdjai hĭ telephone. Laih anun kâo iâu kơ Phun akha wai lăng bruă apui lơtrik tui mrô 19001909 kiăng lăi pơthâo lĕ pô djă măi lăi anun tơlơi arăng plư pleč”.

Hơdôm mrô telephone hmâo iâu kơ mơnuih ƀôn sang Daklak pioh plư pleč

Ăt hmâo mă tơlơi iâu mơng telephone rơkâo prăk apui mơn, ơi Trương Văn Sơn, ƀơi thôn 11, să Hoà Phú, plơi prong Buôn Ma Thuột, lăi pơblang:

“Sang anô̆ kâo lăi hrom lĕ ăt hmâo mơn blan akă hmâo tla prăk apui, ăt hmâo mơn mrô telephone iâu nao lăi pơtă hlâo lĕ nao pơ̆ sang bruă tla prăk apui. Tơdơi kơ sang anô̆ hmâo tla prăk apui laih, samơ̆ glăi hmư̆ iâu tư̆ hnưh prăk apui dong, lăng ƀuh mrô telephone anun hling hlang. Sang anô̆ ăt rơkâo mơn hăng sang bruă lĕ hmâo tla prăk apui laih hiưm dô̆ iâu tư̆ hnưh prăk apui tui anun”.

Mơnuih ƀôn sang khom kơđiăng lom hmư̆ mrô telephone iâu ta ƀu thâo mơng hơpă

Tui hăng tơlơi čih pioh mơng Anom wai lăng mơnuih blơi yua apui lơtrik kual Tŏng Krah dêh čar ta, mơng blan 5 truh ră anai, ƀơi tơring čar Daklak hmâo laih 82 čô mơnuih ƀôn sang hmâo čơkă mă mrô telephone iâu hling hlang, pơanăn mă mơnuih mă bruă gah apui lơtrik rơkâo tla prăk apui; ƀudah mơnuih mơng anom bruă kông ang glăk pel ĕp tơlơi pơhing mơnuih yua apui dŏp mă apui... Mơnuih iâu telephone rơkâo tla prăk ƀudah pơsit tơlơi pơhing mơtăm tơdah ƀu tla thơ amra pơdjai apui lơtrik. Sa dua čô mơnuih dô̆ pơtô brơi mơnuih blơi yua apui ngă tui hơdôm bruă mut jơlan link mơ-ĭt tui glông lăi pơhing.

Rơgao kơ pơsit, Sang bruă apui lơtrik Daklak pơsit anai lĕ leng kơ hơdôm mrô iâu plư pleč, amăng anun hmâo lu mrô ƀu djơ̆ mơng Việt Nam ôh. Hơdôm mrô iâu anai kiăng plư pleč mơnuih blơi yua apui, mă tŭ tơlơi pơhing mơng pô yua apui kiăng mă tŭ prăk amăng telephone, mrô prăk amăng sang prăk... Pơtă mơnuih ƀôn sang khom kơđiăng lom hmâo mă mrô iâu tư̆ hnư̆h prăk apui kiăng bĕ tơlơi plư pleč, ơi Hà Văn Chương – Kơ-iăng Khua Sang bruă apui lơtrik Daklak, lăi rơđah:

“Sang bruă apui lơtrik Daklak pơtă kơ mơnuih blơi yua apui: sa lĕ kơnong tla prăk tui hơdôm glông hmâo sit ƀudah hơdôm khul grŭp pơhrui brơi kah hăng hmâo ngă laih mơng hơdôm blan hlâo kơ anun. Dua lĕ mơnuih blơi yua apui tâ̆o hloh kơđiăng lom lăi pơthâo drơi pô kơ hơdôm mơnuih ta ƀu thâo hlâo rơđah. 3 lĕ hơdôm tơlơi pơhing blơi sĭ apui thơ, kơnong kơ tŭ mă tui hơdôm glông jơlan phun mơng apui lơtrik mơng hlâo truh kơ ră anai ƀu djơ̆ tui jơlan telephone; tơdah hlơi kiăng djru thơ, pô blơi yua apui iâu kơ Anom bơwih brơi kơ mơnuih blơi yua mrô 19001909 kiăng anom apui lơtrik djru brơi.”

Hơdôm hrơi rơgao, hơdră hyu plư pleč tui jơlan telephone hmâo pơphun laih ƀơi lu plơi pla amăng dêh čar ta. Hơdôm mrô iâu lăi mă ča anai dưi ngă tui hăng sim djah, ƀudah hơdôm gru rŭp mă yua automatic. Anai lĕ bruă plư pleč hăng hơdră bôh thâo phrâo măi mok hăng akă dưi pơsir pơđut ôh. Yua anun, mơnuih ƀôn sang khom pơđĭ tui tơlơi kơđiăng ƀơi anăp hơdôm mrô iâu tư̆ hnưh, rơkâo pơsit bruă pel ĕp..., ƀu djơ̆ kơnong kơ prăk apui ôh mơ̆ hơdôm hră pơkă nua măi mok pơkon kiăng bĕ arăng dŏp mă kông ngăn./.

Siu H’ Prăk: Pô pơblang