VOV4.Jarai -  Khă thun hrăm 2021-2022 hmâo găn rơgao giăm truh ha mơkrah tal 1 thun hrăm, samơ̆ truh ră anai, ăt dô̆ lu mơn čơđai sang hră tơring čar Daklak dô̆ đôm ƀơi hơdôm bôh anih anom pơkon akă dưi pơwot glăi hrăm hră hăng ăt ƀu ƀiă mơn čơđai sang hră ƀơi hơdôm bôh tơring čar pơkon khom hrăm jăng jai ƀơi Daklak.

Kiăng pơhlôm tơlơi dưi hrăm hră mơng čơđai, Gơnong bruă pơtô pơhrăm Daklak glăk ngă gal brơi klă hloh kiăng ƀing čơđai huăi tơ̆i đưn amăng bruă hrăm hră khă dô̆ ƀơi hơpă. Tui hăng Gơnong bruă pơtô pơhrăm Daklak, tơdơi 1 blan yap mơng hrơi čơđai sang hră đơ đam tơring čar sit nik yak mut thun hrăm phrâo, truh ră anai, ăt hmâo mơn 1.270 čô čơđai sang hră hơdôm gưl mơng Daklak akă pơwot glăi hrăm hăng rơbêh kơ 660 čô čơđai sang hră hơdôm anih anom glăk tui hrăm jăng jai ƀơi hơdôm bôh sang hră pơ̆ Daklak. Hăng ƀing čơđai anai Gơnong bruă črâo ba hơdôm bôh sang hră prăp lui tŭ mă, dưm dăp djơ̆ brơi kơ čơđai sang hră, ngă gal brơi ƀing čơđai hrăm hră khă lăng nao raih mơng ataih ƀudah pơtô pơhrăm ƀơi anăp hai./.      

Siu H’ Prăk: Pô pơblang