VOV4.Jarai - Amăng bơyan blan bơrơmi thun anai lĕ hrơi mông yôm phăn hăng lu ƀing čơđai anet amăng anih pơčlah pơƀut hăng kual guang dar pioh pơgang klin Covid-19 ƀơi tơring čar Daklak. Ƀu ƀuh dik dak atông hơgor suang rơñia grai ƀudah hơdôm mông ngui ngor hrŏm hăng neh Hằng, met Cuội, ƀing čơđai ăt mưn pơđao amăng pran jua lơ̆m hơmâo arăng ƀơk brơi gơnam hăng đing nao lu lin mơng hơdôm khul grup hăng ƀing mơnuih apăn bruă, nai ia jrao ƀơi anai.

Tŭ mă anung gơnam djru mơng hơdôm anom bruă djru jao tơl sang, adơi H Sa Muel Adrơng, dŏ ƀơi ƀuôn Pưk Prong, să Ea Ning, tơring glông Čư̆ Kuin brơi thâo, anai lĕ bơyan blan bơrơmi yôm phăn hloh hăng ñu pô dong mơng hlâo anun. Amăng hơdôm hrơi anai hlâo adih, ñu hăng ƀing adơi ñu hok mơ-ak djă hyu apui kơđen amăng mơmŏt mlăm ngui bơyan blan bơrơmi amăng nao pơ sang gru grua plơi pla lơ̆m anun hơmâo ƀing hlăk ai pơphun ngui adôh suang, lăng met Cuội, neh Hằng. Thun anai yua kơ klin Covid-19 ngă tơnap tap, ƀuôn Pưk Prong khŏm guang dar pioh pơgang klin yua anun amăng plơi pla et uai. Samơ̆, ƀing adơi amai lêng kơ hok mơ-ak mơn yua kơ hơmâo arăng ƀơk brơi anung gơnam ngui amăng bơyan blan bơrơmi ƀrô hrơi ngui ngor mơ-ak kiăng kơ 2 adơi amai ñu hơmâo ƀañ ƀong ngui amăng sang.

“Kâo hok mơ-ak biă mă lơ̆m tŭ mă gơnam djru mơng ƀing ayong, ƀing amai, kâo amra hrŏm hăng adơi kâo ngui bơyan blan bơrơmi mơ-ak mơ-ai. Kâo bơni biă mă kơ ƀing amai, ƀing ayong amăng Khul grup amăng tơring čar hăng Sang gru grua hlăk ai čơđai anet Daklak hơmâo ƀơk gơnam brơi ƀing gơmơi”.

Prap lui anung gơnam ƀơk brơi ƀing čơđai

Ƀơi hơdôm anih pơjrao brơi mơnuih ƀă klin mrô 1 amăng tơring čar Daklak hơdôm hrơi anai dik dak mơ-ak mơn. Hrŏm hăng bruă khăm pơjrao brơi mơnuih ruă kă, ƀing apăn bruă, nai ia jrao ƀơi anai ăt pơ ala brơi hơdôm khul grup nao tơl sang kiăng kơ ƀơk brơi gơnam amăng bơyan blan bơrơmi brơi ƀing čơđai anet glăk dŏ pơjrao yua ƀă klin Covid-19. Ơi ia jrao chuyên khoa 2 Phạm Thị Tuyết Nhung, Kơ-iăng khua sang ia jrao pơjrao brơi mơnuih ƀă klin mrô 1 brơi thâo, ƀơi anai glăk pơjrao brơi giăm 500 čô mơnuih ƀă klin, amăng anun hơmâo 117 čô čơđai, čơđai anet hloh lĕ rơbêh 1 blan đôč. Ră anai, ƀing gơñu lêng kơ suaih pral hăng pơjrao tañ suaih soh. Hơdôm hrơi laih rơgao, sang ia jrao hơmâo tơlơi đing nao mơng djop khul grup, anom bruă, hluai tui ƀing apăn bruă, nai ia jrao amăng sang ia jrao kiăng kơ hyu ƀơk brơi gơnam kơ ƀing čơđai. Ơi ia jrao Phạm Thị Tuyết Nhung brơi thâo anai lĕ bruă yôm phăn biă mă, kiăng pơ alum pran jua ƀing čơđai, yua anun ngă kơ ƀing gơñu hơđong amăng pran jua, mơ-ak mơ-ai, ngă kơ bruă pơjrao tañ ƀiă dong hăng drơi jăn dưi pơgang klin kiăng tañ glăi pơ sang.

“Ƀing čơđai arăng ba rai pơ anai ƀu djơ̆ kơnong kiăng pơjrao tơlơi ruă kă đôč ôh mơ̆ ăt hơmâo arăng pơtô brơi kơ bruă ngă hiưm pă kiăng ƀing gơñu thâo gir run găn rơgao tơnap tap mơng tơlơi dju djuam duam ruă kiăng kơ tañ glăi pơ sang anŏ. Amăng bơyan blan bơrơmi anai sang ia jrao ăt hơmâo ƀing čơmah nao ƀơk gơnam, ƀing gơñu hok mơ-ak biă mă, bruă anai amra ngă kơ ƀing gơñu hơmâo pran găn rơgao tơnap tap mơng dju djuam duam ruă kiăng kơ tañ glăi sang plơi pla, sang anŏ”.

Gơnam arăng jao ƀing apăn bruă amăng anih pơčlah pơƀut kiăng kơ ba nao tơl tơngan ƀing čơđai

Ƀơi anăp kơ tơlơi tơnap tap mơng klin Covid-19, lu plơi pla amăng tơring čar Daklak glăk pơčlah mơnuih mơnam, guang dar pioh pơgang klin. Hăng tơlơi čang rơmang kiăng kơ ƀing čơđai hơmâo sa bơyan blan bơrơmi mơ-ak mơ-ai hăng lu tơlơi hiam klă, djop gưl hlăk ai amăng tơring čar hơmâo gum hrŏm hăng hơdôm anom bruă hăng ƀing mơnuih čơmah pơphun jơlan hơdră bơyan blan bơrơmi hăng anăn “Apui kơđen jă bơngač ba glăi tơlơi hiam klă pơgi kơdih - djru brơi ƀing čơđai anet, gum tơngan hrŏm pơgang hĭ klin”. Ayong Trần Doãn Tới, Kơ-iăng Khua khul hlăk ai tơring čar Daklak brơi thâo, jơlan hơdră anai amra mơ-it nao anung gơnam, ƀañ ƀong, prăk djru hrăm hră, apui kơđen, ia tơsâo rơmô hăng gơnam yua amăng hrăm hră. Samơ̆ tui tơlơi sit nik ƀơi djop plơi pla ră anai, khul grup hlăk ai amra pơphun hơdôm bruă brơi lăp djơ̆ hăng tơlơi sit nik kiăng kơ hmao tlôn djru hăng pơ alum pran ƀing čơđai amăng bơyan blan bơrơmi anai. Kơnong hăng gưl tơring čar, Khul hlăk ai amăng tơring čar hơmâo gum hrŏm hăng ƀing mơnuih čơmah amra jao 500 anung gơnam tơl tơngan ƀing čơđai sang anŏ tơnap tap, hăng ƀing čơđai glăk dŏ pơjrao ƀudah glăk pơčlah pơƀut, guang dar pioh pơgang klin Covid-19.

“Hăng hơdôm anom bruă ƀơi hơdôm kual mơtah, kơñĭ, mraih khŏm hluai tui tơlơi sit nik kiăng kơ ngă hiưm pă kiăng kơ ƀing čơđai tơnap tap, ƀing čơđai amăng kual guang dar, ƀing čơđai drit druai, drơi jăn ƀu klă ƀu hiam dưi čơkă bơyan blan bơrơmi mơ-ak mơ-ai amăng hrơi blan ƀu dưi pơƀut lu mơnuih. Hăng gưl tơring čar hơmâo Khul apăn bruă hlăk ai tơring čar pơphun ngui ngor ƀơi sang ia jrao pơjrao brơi mơnuih ƀă klin kah hăng hơdôm sang ia jrao amăng kual kiăng kơ pơphun mông ngui bơyan blan bơrơmi brơi kơ ƀing čơđai anet”.

Hơdôm gơnam mah anet đôč samơ̆ yôm phăn biă mă ƀơk brơi ƀing čơđai amăng bơyan blan bơrơmi anai

Sa bơyan blan bơrơmi phara hăng hơdôm thun hlâo anun, yua bơbeč mơng klin Covid-19, lu čơđai amăng tơring čar Daklak hrŏm hăng đơ đam dêh čar ƀu dưi pơphun tŭiw apui kơđen hyu ngui, ƀong ƀan hrŏm ƀudah suang rơñia grai. Samơ̆, hăng tơlơi đing nao mơng gong gai hăng djop khul grup, ƀing čơđai dưi čơkă bơyan blan bơrơmi mơ-ai mơ-ai hăng lu tơlơi yôm phăn pơkŏn hăng tŭ mă hơdôm gơnam ƀơk brơi hơmâo tlôn hăng sit nik.

Siu Đoan: Pơblang