VOV4.Jarai - Tơdơi kơ 2 hrơi mă bruă, tom brơi (13/8), tal jơnum lok 2 Khul pơ ala mơnuih ƀôn sang tơring čar Daklak tal 10, rơwang bruă 2021-2026 hmâo pơđut laih. Lu jơlan gah yôm phăn pơsir kiăng pơđĭ kyar – bơwih ƀong mơnuih mơnam, pơhlôm rơnuk rơnua pơgang lŏn ia 6 blan rơnuč thun 2021 hăng 5 thun pơ̆ anăp hmâo bơkơtuai hăng pel ĕp.

Amăng tal jơnum anai, Khul pơ ala mơnuih ƀôn sang tơring čar Daklak hmâo pel ĕp, bơkơtuai hăng lăng glăi 18 mơta Tơlơi pơtrun pơsit, amăng anun hmâo sa dua tơlơi pơtrun pơsit đing nao: Tơlơi pơtrun pơsit Kơčăo bruă pơđĭ kyar bơwih ƀong – mơnuih mơnam, pơhlôm pơgang lŏn ia – rơnuk rơnua plơi pla tơring čar Daklak 5 thun, rơwang mơng thun 2021-2025; Tơlơi pơtrun pơsit Pơkă tơlơi phiăn, tơhnal ba tơbiă hăng pơđĭ rơnoh pơpha ngăn drăp tuh pơplai bruă hrom mơng ngăn drăp tơring čar Daklak, rơwang mơng thun 2021-2025; Tơlơi pơtrun pơsit kơ mă yua Tơlơi pơkă ngă tui tal jơnum mơng Khul pơ ala mơnuih ƀôn sang tơring čar tal 10, rơwang bruă mơng thun 2021-2026. Gah bruă mă phun pơtrut pơđĭ kyar bơwih ƀong mơnuih mơnam tơring čar amăng hơdôm blan dô̆ glăi mơng thun anai, ƀing khua pơ ala rơkâo Jơnum min mơnuih ƀông sang tơring čar lăng ba dong git gai hơdôm bruă pơhlôm ba glăi bôh tơhnal amăng tơlơi klin Covid-19 ngă tơnap./.

Siu H’ Prăk: Pô pơblang