VOV4.Jarai - Ƀơi plơi prong Buôn Ma Thuột, tơring čar Daklak ră anai hmâo sa kual sang măi hăng dua ƀut sang măi năng ai ñu hmâo 4.000 čô mơnuih glăk dô̆ mă bruă. Ƀơi anăp tơlơi ngă dlêh tơnap mơng klin Covid-19, hơdôm sang bruă, sang măi hmâo hăng glăk hmâo pok pơhai lu jơlan gah pơgang, pơgăn klin tui tơlơi črâo ba mơng dêh čar ta ăt kah hăng tơring čar kiăng pơhlôm klă kơ mơnuih mă bruă ăt kah hăng bruă pơkra rai gơnam tam sĭ mơdrô mơn.

Sang bruă pơkra pơsơi Đông Nam Á ƀơi Kual Sang măi Hoà Phú, plơi prong Buôn Ma Thuột, tơring čar Daklak hmâo rơbêh kơ 600 čô mơnuih apăn bruă, mơnuih mă bruă glăk dô̆ mă bruă. Yă Lê Thị Tuyết Hạ - Kơ-iăng Khua Sang bruă lăi pơthâo, pơkra gơnam sĭ mơdrô mơng anom pơkĕ hăng pơhlôm klă pơgang, pơgăn klin, anun pơkă 5 mơta pơgang klin dưi lăi pơthâo hăng ngă tui tơpă truh rim grŭp, khul pơkra gơnam tam.    

 “Tal blung a lĕ ngă tui tơlơi pơkă, 5 mơta pơgang klin mơng Ding jum ia jrao. Hrom hăng anun sang bruă ăt rơkâo mơn abih bang djop mơnuih mut tơbiă sang bruă khom lăi pơthâo tơlơi suaih pral, găn nao anih pơdjai kơman; pơpha sa grŭp pioh bưp tuai hăng tŭ mă hră pơkă nua gơnam hră pơ-ar kiăng bĕ hơdôm mơnuih mơng ataih nao bưp mơnuih amăng sang bruă. Rơngiao kơ anun, ƀing gơmơi dô̆ ngă tui bruă dô̆ čơlah pơpha mông dô̆ găk mă bruă ƀơi anih ngă hră pơ-ar; anih ƀong huă lu mơnuih pơkra pơnăng găn ... kiăng pơhlôm pơgang pơgăn klin ba glăi bôh tơhnal hăng pơhlôm bruă mă.”

Kual dô̆ čơlah mơng Anom bơwih ƀong ƀơi ƀut sang măi Tân An 1

Bơ̆ Sang bruă bơwih ƀong mơnuih ƀôn sang Xuân Hòa măi mok pơkra gơnam tam ƀơi Ƀut sang măi Tân An 1, phường Tân Lợi, plơi prong Buôn Ma Thuột ră anai hmâo giăm truh 100 čô mơnuih mă bruă. Ngă tui bruă pơgang, pơgăn klin tơpă, sang bruă hmâo pơdŏng laih anih pơdjai kơman ƀơi bah amăng war mut tơbiă; pơpha mơnuih dô̆ gak pơplih mông mă bruă ngă tui tơlơi pơkă lăng pơ-iă drơi jăn, rơkâo djop mơnuih mut tơbiă sang bruă rao tơngan pơdjai kơman, pơtô brơi bruă lăi pơthâo tơlơi suaih pral, pơpha brơi hăng pơđar gôm adung mơbah; pơdŏng kual dô̆ čơlah pơhlôm hlâo hăng rim hrơi pruih jrao pơdjai kơman abih bang kual sang măi. Yă Trần Thị Thanh Hoa – Khua anom wai lăng mơnuih mă bruă Sang bruă Xuân Hòa brơi thâo, rim mơnuih mă bruă mơng anom ăt dưi lăi pơthâo djop hơdôm tơlơi pơkă pơgang pơgăn klin lom pơwot glăi hăng sang anô̆ hăng rô nao rai amăng plơi pla.

 “Ƀing gơmơi rơkâo abih bang mơnuih mă bruă măng sang bruă lom abih mông mă bruă tâ̆o hloh glăi tơpă pơ̆ sang mơtăm, bĕ bưp hăng lu mơnuih amăng hơdôm hrơi anai, kơnong kơ tơbiă mơng sang lom hmâo bruă kiăng biă mă kah, kiăng pơhlôm tơlơi suaih pral, djă pioh rơnoh bruă mă.”

Djop mơnuih mut tơbiă hơdôm kual, ƀut sang măi ƀơi plơi prong Buôn Ma Thuột leng kơ ngă tui bruă pơdjai kơman ƀơi anih pơdjai kơman

Ƀơi plơi prong Buôn Ma Thuột, tơring čar Daklak ră anai hmâo 106 bôh anom bơwih ƀong mă bruă ƀơi 2 kual – ƀut sang măi hơbit, hăng năng ai ñu 4000 čô mơnuih mă bruă.

Tui hăng ơi Đoàn Ngọc Thượng – Kơ-iăng Khua Jơnum min mơnuih ƀôn sang plơi prong Buôn Ma Thuột, ƀơi anăp anô̆ pơplih tơnap him lăng mơng klin Covid-19, biă ñu klin hmâo tưp mut laih ƀơi sa dua kual, ƀut sang măi pơ̆ lu anih anom amăng đơ đam dêh čar ta, ngă răm rai prong biă, Jơnum min mơnuih ƀôn sang plơi prong hmâo rơkâo laih hơdôm bôh anom bơwih ƀong ƀơi anai pơphun bruă pơgang, pơgăn klin ƀơi rơnoh prong hloh. Pơdŏng grŭp hyu pel ĕp wai lăng abih bang hơdôm bôh anom bơwih ƀong, tơdah ƀuh anom hơpă ngă soh bruă pơgang pơgăn klin amra pơsir tơpă. Mơng anun, gơgrong hlâo bŏng glăi hăng pran pơsit prong hloh, pơhlôm ngă tui “tơhnal pơkă dua mơta” pơđĭ kyar rah bơwih ƀong – mơnuih mơnam, pơgang pơgăn klin ba glăi bôh tơhnal rah.

 “Kiăng ngă klă bruă pơgang, pơgăn klin Covid-19 ba glăi bôh tơhnal pơ̆ anăp anai ƀơi hơdôm kual, ƀut sang măi lĕ, blung hlâo khom ngă klă bruă lăi pơhing kiăng hơdôm bôh anom bơwih ƀong ngă tui djop hơdôm bruă pơgang, pơgăn klin tui tơlơi pơtô ba mơng Ding jum ia jrao. Wai lăng klă mrô mơnuih glăk dô̆ mă bruă amăng hơdôm bôh sang bruă. Jơnum min mơnuih ƀôn sang plơi prong ăt amra amăng ƀrư̆ mơn rơkâo hơdôm bôh sang măi pơpha anih dô̆, pơdơi pơdă, mă bruă ƀơi anai kơ mơnuih mă bruă tơdah hmâo djop tơlơi pơkă; pel ĕp na nao hơdôm rơdêh pơgiăng, biă ñu ƀing mơgăt rơdêh ƀơi hơdôm kual klin ngă pơwot glăi ngă tui bruă pơgiăng gơnam tam ƀơi hơdôm bôh anom bơwih ƀong”.

Tal gluh đĭ klin Covid-19 tal 4 anai, Daklak hmâo čih pioh 5 čô mơnuih ƀă kơman Sars-CoV-2, amăng anun hmâo 4 čô mơnuih pơjrao suaih laih hăng dưi tơbiă mơng sang ia jrao. Plơi prong ăt hmâo brơi dô̆ čơlah laih mơn hăng rơbêh kơ 200 čô mơnuih F1, dô̆ čơlah ƀơi sang rơbêh kơ 20.500 čô mơnuih. Kiăng plai ƀiă đut hlah klin lar tưp hyu, mơng mlăm tom brơi truh ră anai, hơdôm ƀirô apăn bruă hmâo đing nao abih bang khul kiăng hyu hơduah ĕp mơnuih bơdjơ̆ nao, guang dar kual hăng pơčrang lăng hơdôm mơnuih bơdjơ̆ nao pô ƀă kơman. Bruă pơhlôm tơlơi hơdip mơda kơ hơdôm bôh sang anô̆ mơnuih ƀôn sang guang dar ăt dưi ngă tui klă mơn./.

            Tuấn Long: Pô čih – Siu H’ Prăk: Pô pơblang