VOV4.Jarai - Gum djru ƀơ ƀiă kơ mơnuih ƀôn sang ƀôn prong Hồ Chí Minh lom dô̆ čơlah pơgăn klin tui tơlơi črâo ba mrô 16 mơng Khua dêh čar, hơdôm “Tal pơgiăng khăp păp” mơng hơdôm khul grŭp, mơnuih ƀơi Daklak hmâo nao gum djru. Hơdôm pluh tơn gơnam tam pơgiăng nao hăng glăk pơgiăng nao pơ̆ kual Dơnung dêh čar, khă Daklak ăt glăk gơgrong bŏng glăi klin Covid-19 hai.

Hmư̆ hing Khul ia jrao kyâu bơrơkal mriah plơi prong Buôn Ma Thuột glăk gum hrom hăng Khul đah kơmơi Kông ang tơring čar Daklak hăng ƀing thâo tơngiă pơphun “Tal rơdêh pơgiăng khăp păp” kiăng pơgiăng añăm pơtăm, hơbơi pơtơi nao djru mơnuih ƀôn sang ƀôn prong Hồ Chí Minh amăng hơdôm hrơi dô̆ čơlah abih bang mơnuih mơnam, amai Lê Thị Thanh Tâm, pô anom sĭ mơdrô gơnam Lợi Tâm, plơi prong Buôn Ma Thuột, hmâo lăi pơthâo laih hăng gơyut gơyâu kiăng gum hrom. Amai Tâm lăi pơthâo: lăng Sài Gòn kơdưh kơdrop tui anun mơ̆ hmâo klin ngă, ñu ƀuh pran jua ñu hyơ hyor biă, kiăng gum djru:

“Ƀuh ƀôn prong Hồ Chí Minh glăk bưp tơnap anun kâo gum hrom hăng Khul ia jrao mriah pioh djru gum neh wa ƀôn prong Hồ Chí Minh kiăng yak rơgao bơyan klin ngă tơnap tap anai. Čang rơmang ƀôn prong Hồ Chí Minh tañ yak rơgao tal klin ngă anai pioh pơwot glăi hơdip hơđong kah hăng hlâo adih”.

Tal rơdêh pơgiăng añăm pơtăm khăp păp mơng mơnuih Daklak nao pơ̆ ƀôn prong Hồ Chí Minh

Amai Tống Thị Tươi ƀơi phường Tân Lợi, plơi prong Buôn Ma Thuột – pô gum hrom klă amăng bruă pơsur ƀing thâo tơngia gum hrom hăng hơdôm “Tal rơdêh khăp păp” tô Daklak hăng ƀôn prong Hồ Chí Minh gum hrom, abih bang añăm pơtăm, hơbơi pơtơi, bôh troh dưi gum pơgôp mơ-ĭt kơ ƀôn prong Hồ Chí Minh leng kơ dưi hmâo khul Kông ang tơring čar hăng ƀing thâo tơngia nao tơl đang hmua pĕ añăm pơtăm, hơbơi pơtơi, bôh troh ƀơi Buôn Ma Thuột blơi ba glăi. Añăm pơtăm mơ-ĭt nao pơ̆ kual klin ngă prong, djru rah mơnuih ƀôn sang ƀôn prong plai ƀiă gun bruă, laih anun djru ba hyu rah añăm pơtăm lu mơta ƀơi Daklak:

“10 hrơi hlâo kâo ƀuh klin ruă tui anai neh wa ƀu hmâo ba hyu sĭ. Tơdơi kơ ƀuh tơlơi klin ruă mơng ƀôn prong Hồ Chí Minh tơnap tap đơi anun adơi ayong ƀing gơmơi bơčrông sai nao pơ̆ anun djru neh wa dưi sĭ rah añăm pơtăm, laih anun dưi ba truh añăm pơtăm anai truh ƀơi hơdôm anih glăk kiăng hăng lom anai lĕ ƀôn prong Hồ Chí Minh glăk gơgrong pô pơgăn klin. Tal rơdêh anai lĕ tal rơdêh lok 2 hăng ƀing gơmơi amra hmâo tal rơdêh lok 3.”

Yă Nguyễn Thị Lý, Kơ-iăng Khua Khul ia jrao kyâu bơrơkal mriah plơi prong Buôn Ma Thuột brơi thâo, tơdơi kơ Khul ia jrao kyâu bơrơkal mriah plơi prong gum hrom Khul đah kơmơi Kông ang tơring čar Daklak pơphun jơlan hơdră “Tal rơdêh khăp păp” anăp nao kual klin ngă prong mơtăm, wot dua bôh anom hmâo čơkă mă tơlơi gum djru prong biă mơng hơdôm mơnuih thâo tơngiă. Truh ră anai, jơlan hơdră “Tal rơdêh khăp păp” hmâo pơgiăng nao laih giăm truh 50 tơn añăm pơtăm, hơbơi pơtơi, bôh troh, hơdôm rơbâo bôh mơnŭ bip hăng kơ phê pơgiăng nao pơ̆ ƀôn prong Hồ Chí Minh, hăng abih bang mrô prăk giăm truh 400 klăk prăk. Bruă pơhlôm kơ mơnuih mơgăt rơdêh lom pơgiăng añăm pơtăm ăt dưi đing nao mơn, pơhlôm pơgang pơgăn klin kheng.

“Kiăng pơhlôm kơ mơnuih mơgăt rơdêh nao pơ̆ kual klin ngă lĕ Khul ia jrao kyâu bơrơkal mriah plơi prong gum hrom hăng Anom ia jrao ƀôn prong pơsir test tañ kơ mơnuih mơgăt rơdêh. Tơdơi kơ ƀing mơgăt rơdêh pơgiăng gơnam mơng ƀôn prong Hồ Chí Minh glăi mơtăm anom ia jrao test glăi tañ dong kơ mơnuih mơgăt rơdêh kiăng ƀing gơñu hơđong pran jua pơwot glăi tơlơi hơdip mơda kah hăng tơđar.”

Amăng krah hơdôm hrơi đơ đam dêh čar, biă ñu ƀôn prong Hồ Chí Minh, glăk gơgrong pô kơdŏng glăi hăng Covid-19, hơdôm tal gơnam tam khăp păp mơng Daklak ƀu djơ̆ kơnong kơ tơlơi gum djru gơnam tam đô̆č ôh. Ñu dô̆ jing pran jua gum hrom, jing bôh pơhiăp gum hrom hơbit yak rơgao tơlơi tơnap, pơtrut kơdun glăi klin ruă./.

            Nam Trang: Pô čih – Siu H’ Prăk: Pô pơblang