VOV4.Jarai - Kiăng klă kơ bruă ruah khua pơ ala mơnuih ƀôn sang dêh čar ta tal 15 hăng Khul pơ ala mơnuih ƀôn sang hơdôm gưl rơwang bruă 2021-2026, Sang bruă apui lơtrik Daklak hmâo hăng glăk pok pơhai hơdôm jơlan gah pơkĕ apui lơtrik hơđong, pơhlôm, na nao truh rim anih anom amăng hơdôm hrơi pơphun ruah khua. Tui hăng ơi Trần Tấn Phụng – Kơ-iăng Khua Sang bruă apui lơtrik tơring čar Daklak, hlâo kơ tal ruah khua mơtăm, Sang bruă hmâo črâo ba hơdôm bôh anom apui lơtrik, đing nao pel ĕp pơhlôm glông hrĕ apui ƀơi abih bang hơdôm anih anom ruah khua kiăng pơhlôm mă yua apui lơtrik pơhlôm, đăo gơnang. Sang bruă ăt ba tơbiă mơn bruă mă yua apui pha ra, hăng abih bang mơnuih mă bruă dô̆ gak wai glông hrĕ apui, prăp lui măi pơkĕ apui pơhlôm hlâo kiăng pơsir lom hmâo tơlơi truh.

Tal ruah khua pơ ala mơnuih ƀôn sang dêh čar tal 15 hăng Khul pơ ala mơnuih ƀôn sang hơdôm gưl rơwang bruă 2021-2026 ƀơi Daklak, hmâo rơbêh kơ 1 klăk 200 rơbâo čô mơnuih nao ruah khua ƀơi 1.849 grŭp ruah khua, amăng anun hmâo 8 grŭp ƀơi hơdôm bôh să guai lŏn ia amra ngă tui bruă ruah khua tañ amăng lơ 22/5, dô̆ glăi 1.841 grŭp amra plĕ hră amăng lơ 23/5./.      

Siu H’ Prăk: Pô pơblang