VOV4.Jarai - Amăng 2 hrơi mơng lơ 17-18/7, Daklak hơmâo dong lu mơnuih ƀă virus Sars-Cov2. Yua kơ hŭi kơƀah gơnam ƀong huă, gơnam yua amăng hơdôm hrơi pơ anăp lơ̆m ngă tui tơlơi črâo trun mrô 15 mơng Kơnuk kơna, lu mơnuih ƀon sang amăng plơi prong Buôn Ma Thuột luh nao blơi gơnam tam, ngă kơ lu gơnam ƀơi sang čơ đĭ nua hăng kơƀah. Ơi Đoàn Ngọc Thượng, Kơ-iăng khua Jơnum min mơnuih ƀon sang plơi prong Buôn Ma Thuột brơi thâo: plơi prong ăt pơjing akŏ bruă kah pha djop gơnam ƀong huă hăng gơnam yua brơi mơnuih ƀon sang. Hrŏm hăng anun, plơi prong ăt prap lui akŏ bruă yua hŭi hơmâo tơlơi tơnap, kiăng kơ hơmâo gơnam yua tơdah klin kơtang pơhlôm brơi mơnuih ƀon sang hơmâo gơnam blơi, ƀu hŭi kơƀah ôh. Kiăng kơ djơ̆ hăng tơlơi kiăng mơng mơnuih ƀon sang, sang sĭ mơdrô prong Co.opmart Buôn Ma Thuột hơmâo akŏ bruă djă pioh lui gơnam ƀong huă: Braih, mitôm, ƀun phơ krô; ngok hra, ia măm, gơnam ƀong dưm amăng ƀuăt hăng gơnam dưm amăng hrĭp rơ-ơ̆ djop mơta. Laih dong pơhlôm brơi gơnam yua mơtah hơdjă: mơnong, akan, añăm tam djop mơta.

Anom bruă wai lăng sĭ mơdrô Daklak pơtrut kơtang bruă pel ĕp bruă đĭ nua gơnam

Anom wai lăng anih anom sĭ mơdrô Daklak ngă hră pơsir sa bôh anom sĭ mơdrô Bách Hoá Xanh ƀơi jơlan Ngô Quyền, phường Tân An, plơi prong Buôn Ma Thuột yua ngă soh bruă sĭ gơnam ƀu hmâo pơkă nua hăng sĭ nua pơmă hloh kơ rơnoh pơkă soh hăng tơlơi pơkă amăng bơyan klin ngă. Khul apăn bruă hmâo ngă hră pioh pơsir tui tơlơi pơkă. Hơdôm hrơi anai, ƀơi anih sĭ mơdrô hmâo lu mơnuih ƀôn sang glăk blơi gơnam tam ba glăi djă lui kiăng pơgang, pơgăn klin Covid-19, yua kơ tơlơi pơmin huĭ kơƀah gơnam amăng hơdôm hrơi dô̆ čơlah mơnuih mơnam tui tơlơi črâo ba mrô 15 mơng kơnuk kơna. Anom wai lăng anih anom sĭ mơdrô tơring čar Daklak hmâo mă yua laih hră pơ-ar rơkâo hơdôm anom bruă kơtưn pel ĕp, lăng tui ƀu pioh hmâo tơlơi djă kŏng, đĭ nua hăng hơdôm gơnam kiăng yua ôh./.

Siu Đoan- Siu H’Prăk: Pơblang