VOV4.Jarai - Anom mă jia tơring čar Daklak brơi thâo, khă mơng akô̆ thun truh ră anai klin Covid-19 ngă tơnap bơdjơ̆ nao prong bruă bơwih ƀong sĭ mơdrô, khă hnun hai anom mă jia tơring čar pơhrui hmâo mơn rơbêh kơ 2.688 klai prăk, hmâo 63% rơnoh pơkă hlâo kơnuk kơna jao hăng đĭ 14% bơhmu hăng thun hlâo. Tui hăng ơi Ngô Việt Hồng – Kơ-iăng Khua Anom mă jia tơring čar Daklak, bôh than rơnoh pơhrui ngăn drăp đĭ lu lĕ yua kơ anih anom pơhrui mơng hơdôm rơwang bruă apui lơtrik pơkĕ mơng pơ-iă yang hrơi đĭ lu; ƀiêr, tơpai, ia mih djop mơta ăt đĭ lu mơn bơhmu hăng hơdôm thun hlâo; rơngiao kơ anun, mă jia mơng apah lŏn, pơgang dlai klô, anom pơkra gơnam hăng măi pơkra mă... ăt đĭ mơn. Mơng ră anai truh rơnuč thun, Anom mă jia tơring čar Daklak lăng tui dong bruă črâo ba mơng gưl dlông pok pơhai hơdôm bôh yôm pơhrui prăk mă jia; kơtưn gum hrom hăng gong gai hơdôm anih anom pơtrut kơtang bruă pel ĕp; hyu hơduah tơña kiăng pơhrui prăk mă jia, hnư̆h dŏng akă tuh jia ba glăi bôh tơhnal./.               

Siu H’ Prăk: Pô pơblang