VOV4.Jarai -  Čơtlăm lơ 14/9, Jơnum min mơnuih ƀôn sang tơring čar Daklak hmâo mă yua laih hră pơ-ar črâo ba bruă pơphun pơtô pơhrăm amăng tơlơi klin Covid-19 ngă tơnap. Kiăo tui anun, hăng anih anom dưi pơsit “kual mơtah”, gưl 2, gưl 3 hăng hơdôm anih anom pơtô pơhrăm pơkon pơphun pơtô pơhrăm ƀơi sang hră hăng nai pơtô, čơđai sang hră khom ƀơi kual mơtah; gưl sa pơtô pơhrăm hăng hơdră lăng nao rai mơng ataih, pơdah rŭp hăng jao tơlơi hrăm. Kơnong hăng čơđai sang hră anih sa, anih 2 đing nao hlâo pơphun pơtô pơhrăm tui glông pơdah rŭp hăng ƀu hmâo pel ĕp glăi tơlơi hrăm, pơsit tui rim blan amăng hơdôm hrơi anai, lom čơđai nao hrăm glăi pơ̆ sang hră khom lok glăi hlâo kơ pel ĕp, pơsit tui rim blan. Kơnong kơ gưl čơđai anet pơdơi hrăm hră truh kơ hmâo tơlơi lăi pơthâo phrâo. Gơnong bruă pơtô pơhrăm tơring čar Daklak pơtă hơdôm bôh sang hră, lom pok pơhai hơdôm hơdră pơphun pơtô pơhrăm khom lăi pơthâo hăng pơtô brơi čơđai sang hră, amĭ ama čơđai sang hră hơdôm tơlơi pơhing rơđah kơ phun than, gơnam mă yua pơtô pơhrăm; hơdră jao bruă pơhrăm; bôh yôm tơlơi hrăm; jơlan gah pel ĕp, pơsit hăng tơlơi pơkă hrăm hră hăng rim hơdră pơtô pơhrăm./.

Siu H’ Prăk: Pô pơblang