VOV4.Jarai - Yua bơbeč mơng klin Covid-19 ngă, lu anom bơwih ƀong bưp tơnap khom pơdơi bruă ngă rai gơnam tam, pơhrŏ trun mrô mơnuih mă bruă, đa lui ruh abih bang, kiăo tui anun lu mơnuih rơngiă bruă mă hăng prăk pơhrui glăi ƀơi tơring čar Daklak. Kiăng hơdôm mơnuih anai plai ƀiă tơnap, Daklak hmâo ngă gal brơi laih kiăng mơnuih mă bruă dưi čơkă mă prăk gum djru rơngiă bruă mă lăp djơ̆.

Djă hră pơ-ar nao pơ̆ Anom bơwih brơi kơ bruă mă tơring čar Daklak kiăng ngă hră pơ-ar rơkâo dưi čơkă mă prăk djru rơngiă bruă, hrom hăng anun hơduah ĕp sa tơhnal bruă mă phrâo, ayong Trương Đức Dũng, ƀơi jơlan Đào Duy Từ, phường Thành Công, plơi prong Buôn Ma Thuột brơi thâo: Hlâo adih ñu mă bruă hăng prăk pơhrui glăi 6 klăk prăk sa blan. Hơdôm anô̆ bơbeč truh ƀu klă mơng tal klin Covid-19 mơng thun 2020 hăng tal klin ngă ră anai ngă laih Sang bruă lui ruh. Ƀơi anăp dưi ĕp hmâo bruă mă phrâo, tơlơi hơdip sang anô̆ amra hluai tui lu biă kơ prăk pơgang gah rơngiă bruă mă mơ̆ pô dưi čơkă mă:

“Amăng hơdôm hrơi klin ngă mơng thun hlâo lĕ anom bơwih ƀong pơphun hmâo gru nam trun tui hăng ƀu dưi gơgrong, anun khom lui hĭ amăng thun anai. Kâo ăt čang rơmang mơn ĕp hmâo bruă mă phrâo hơđong hloh amăng tơlơi hơdip mơda.”

Mơnuih mă bruă ƀơi Anom bơwih hră pơ-ar bruă mă djru mơnuih mă bruă rơngiă bruă mă ngă hră pơ-ar djru prăk rơngiă bruă mă

Ăt rơngiă bruă mă hăng pơwot glăi mơng tơring čar Khánh Hòa, ayong Nguyễn Vụ Bốn, ƀơi thôn 6, să Ea Bhôk, tơring glông Čư̆ Kuiñ, ăt hat hŏt nao ngă hră pơ-ar rơkâo prăk djru rơngiă bruă mă mơn. Ayong Bốn brơi thâo, ñu dưi hmâo mơnuih mă bruă mơng Anom bơwih brơi bruă mă Daklak pơtô brơi tŏng ten kơ hră pơ-ar hăng tañ čơkă mă prăk djru yua kơ rơngiă bruă mă rơbêh kơ 2 klăk prăk amăng sa blan. Ayong Bốn lăi lĕ, khă rơnoh anai ƀiă hloh lu biă bơhmu hăng prăk blan, samơ̆ ăt amra djru brơi mơn sang anô̆ yak rơgao tơlơi tơnap:

“Lom klin ngă akă hmâo bruă mă phrâo lĕ hră pơgang gah rơngiă bruă mă ăt plai ƀiă mơn. Pơ̆ anăp anai kâo ăt kiăng ĕp mơn bruă mă giăm sang, giăm sang anô̆.”

Ơi Nguyễn Văn Cường, Kơ-iăng Khua Anom bơwih brơi bruă mă (Gơnong bruă wai lăng mơnuih mă bruă, tơhan rơka ruă hăng mơnuih mơnam tơring čar Daklak) brơi thâo, amăng 5 blan akô̆ thun 2021, Daklak hmâo laih 3.365 čô mơnuih nô̆p hră rơkâo pơsir prăk djru yua rơngiă bruă mă. Kơnong kơ blan 5 hmâo rơbêh kơ 1 rơbâo pok hră pơ-ar, đĭ 15% bơhmu hăng blan hlâo. Amăng anun, mrô mơnuih mă bruă pơ̆ tơring čar pơkon nô̆p hră rơkâo pơsir prăk rơngiă bruă mă hmâo 70%. Ră anai hmâo giăm truh 3 rơbâo čô mơnuih hmâo tơlơi pơsit djru prăk rơngiă bruă mă hăng mrô prăk rơbêh kơ 45 klai prăk.

Hrom hăng bruă pơsir prăk djru yua rơngiă bruă mă, kiăng djru mơnuih mă bruă hơđong tơlơi hơdip mơda, Anom dô̆ lăi pơthâo klă, lăi pơthâo bruă mă, djru hrăm bruă. Gơnang kơ anun, amăng blan 5 hmâo laih 89 čô mơnuih glăk dưi čơkă mă prăk djru rơngiă bruă mă dưi hrăm bruă tui tơlơi pơkă, hăng prăk djru giăm truh 400 klăk prăk. Anom ăt pơplih phrâo mơn hơdôm bruă lăi pơthâo bruă mă, tô nao rai anom bơwih ƀong kiăng djru mơnuih mă bruă tañ ĕp hmâo bruă mă. Ơi Nguyễn Văn Cường brơi thâo:

“Gah bruă lăi pơthâo bruă mă lom hmâo klin bơbeč truh prong hơdôm bruă mă kah hăng pơphun hơdôm mông bơwih hră pơ-ar bruă mă hơdôm bruă tum pơƀut lu mơnuih lĕ Anom ƀu dưi ngă tui. Anom kơnong kơ đing nao lăi pơthâo tui jơlan telephone Website, facebook yơh lu. Anom hmâo lăi pơthâo hăng anom bơwih ƀong, lăi pơthâo mơnuih mă bruă kiăng arăng tô nao rai tui jơlan telephone ƀudah hră pơ-ar ƀơi anăp.”

Tơlơi gum djru pơsir hơdôm hră pơ-ar djru prăk rơngiă bruă mă hmao tlôn mơng ƀirô apăn bruă anai ƀơi Daklak hmâo djru ƀơ ƀiă laih mơnuih mă bruă rơngiă bruă mă yua bơbeč mơng klin Covid-19 hơđong pran jua, jăng jai yak rơgao tơlơi tơnap dô̆ tơguan bruă mă phrâo./.

Nam Trang: Pô čih – Siu H’ Prăk: Pô pơblang