VOV4.Jarai - Hrom hăng lu anih anom amăng đơ đam dêh čar ta, klin Covid-19 glăk bơdjơ̆ nao sat biă hơdôm bruă bơwih ƀong, mơnuih mơnam ƀơi tơring čar Daklak. Kiăng kơ djơ̆ hăng rơnuk klin ngă, pơđĭ tui bôh tơhnal bơwih ƀong, sĭ mơdrô ăt kah hăng hơdôm bruă mă hrom, wot mơnuih ƀôn sang, anom bơwih ƀong hăng gong gai tơring čar glăk pơtrut kơtang mă yua măi mok, anăp nao pơplih mrô. Bruă pơplih yak blung a glăk ba glăi hơdôm bôh tơhnal klă tui djơ̆ pran jua ngă tui dua mơta, pơgang rah klin hăng pơđĭ kyar rah bruă bơwih ƀong, mơnuih mơnam.

Sang bruă bơwih ƀong mơnuih ƀôn sang dŭ pơgiăng An Phước lĕ sa amăng hơdôm bôh anom dŭ pơgiăng prong ƀơi plơi prong Buôn Ma Thuột, tơring čar Daklak hăng năng ai ñu 80 bôh rơdêh dŭ pơgiăng gơnam mă mơng đang hmua nao pơ̆ hơdôm bôh tơring čar, ƀôn prong hăng ba nao sĭ kơ dêh čar tač rơngiao. Ơi Phạm Đông Thanh, Khua Sang bruă brơi thâo, klin Covid-19 hmâo mơng akô̆ thun 2020 truh ră anai bơdjơ̆ nao prong biă bruă mă mơng sang bruă. Hơdôm thun hlâo kơ hmâo klin, hơnong ñu rim thun sang bruă pơgiăng hyu năng ai ñu hmâo 300.000 tơn gơnam tam mă mơng đang hmua, samơ̆ ră mrô gơnam tam hmâo trun năng ai ñu 20%, kơmlai ăt hrŏ trun mơn. Kiăng djơ̆ hăng rơnuk klin ngă anai, Sang bruă hmâo gơgrong hlâo pơtrut kơtang laih mă yua măi mok kiăng ĕp rah bơnah gum hrom, bơwih ƀong, kĭ pơkôl hră pơ-ar, hăng črâo ba git gai ba glăi bôh tơhnal rah:

“Pơplih mrô lĕ glông jơlan yôm phăn kiăng pơđĭ tui bôh tơhnal bơwih ƀong huă, sĭ mơdrô mơng anom, biă ñu lĕ amăng rơnuk klin ngă ră anai. Hăng anom, abih bang hơdôm hră pơ-ar ƀudah hơdôm bruă mă hăng gum hrom lĕ hơdai nao email, đa lĕ hơdôm hră pơ-ar pơkă nua, hră pơsit leng kơ ngă tui glông email sôh. Prăk lĕ hơdai nao internet banking. Yap wot tơlơi git gai hai ăt mă yua internet mơn, bơhmu tu ñu hơdôm glông facebook ƀudah amăng internet čih pha ra brơi ha jăn kơ anom bơwih ƀong. Hluai tui hơdôm tơlơi anun kiăng kơ hơdư̆ ƀiă bưp nao rai.”

Mă yua bôh thâo măi mok, anăp nao pơplih mrô glăk dưi hmâo anom bơwih ƀong hăng hơdôm gưl gong gai tơring čar Daklak pok pơhai klă

Ơi Lương Văn Minh, Kơ-iăng Khua Khul anom bơwih ƀong tơring čar Daklak brơi thâo, đơ đam tơring čar hmâo giăm truh kơ 18.000 bôh anom bơwih ƀong. Klin Covid-19 hmâo bơdjơ̆ nao ƀu klă laih bruă mă mơng hơdôm bôh anom bơwih ƀong hăng bruă mă yua măi mok, pơplih mrô dưi lăng lĕ jơlan nao khom ngă kiăng hơdôm bôh anom dưi gơgrong, pơđĭ kyar amăng hơdôm hrơi anai. Lu anom bơwih ƀong amăng tơring čar ăt hmâo gơgrong hlâo pơplih phrâo mơn hăng yak blung a truh kih. Gah Khul ăt glăk pơdŏng klă mơng Anom tô nao rai pơplih mrô anom bơwih ƀong kiăng djru ding kơna amăng khul:

“Khul bơwih ƀong tơring čar ăt glăk pơtrut pơdŏng mơn Anom tô nao rai pơplih mrô anom bơwih ƀong. Jơlan pơ̆ anăp khom ngă tui tơlơi tô nao rai hăng pơplih mrô kơ anom bơwih ƀong. Hluai tui anun, hơdôm bôh anom sĭ gơnam tui jơlan online, laih anun ngă juăt hăng măi mok amăng rơwang klin ngă tui anai.”

Gum hrom hăng mơnuih ƀôn sang, anom bơwih ƀong amăng tơlơi klin ngă glêh tơnap, hơdôm gưl, hơdôm gơnong bruă ƀơi tơring čar Daklak ăt glăk pơtrut kơtang ngă tui mơn hơdôm bruă mă yua măi mok, pơplih mrô. Ơi Ngô Việt Hồng, Kơ-iăng Khua Anom mă jia tơring čar Daklak brơi thâo, hơdôm bôh tơhnal yak blung a klă biă. Ră anai abih bang anom bơwih ƀong ƀơi tơring čar hmâo pok pơhai ngă hră lăi pơthâo hăng nô̆p prăk tuh jia điện tử. Tơring čar ăt glăk pơtruh kơtang mơn pok pơhai pơhrui prăk tuh jia, prăk apăh amăng ngă hră pơ-ar lŏn drŏn, rơdêh thut, ô tô tui jơlan điện tử:

“Rơgao kơ bruă ngă tui hơdôm bruă bơwih amăng điện tử, lăi pơdah rơđah ƀơi glông măi mok pôr pơhing, kơdŏng rah klin ba glăi bôh tơhnal rah, hrŏ trun rah tơlơi ƀu tơphă kơ mơnuih nô̆p prăk tuh jia hăng mơnuih mă bruă hyu mă prăk tuh jia. Dua lĕ, gah sui thun, bruă lăi pơdah, rơđah abih bang mrô pơhrui, mrô nô̆p, sa dua bruă điện tử tui anun sit ñu klă hloh.”

Ơi Nguyễn Tuấn Hà, Kơ-iăng Khua Jơnum min mơnuih ƀôn sang tơring čar Daklak brơi thâo, amăng hơdôm hrơi klin ngă glêh tơnap, bruă pơplih mrô hăng tơring čar lĕ kiăng biă. Blan 3/2021, Ping gah tơring čar Daklak hmâo pel ĕp laih Tơlơi pơtrun pơsit kơ pơplih mrô tơring čar Daklak mơng thun 2021-2025, pơsit jơlan gah anăp nao truh thun 2030. Amăng anun, ƀơi anăp, tơring čar amra pioh năng ai ñu 300 klai prăk tuh pơplai kơ bruă pơplih mrô, pơsit pran jua pơjing yak pơplih kơtang tĭt amăng pơđĭ kyar bơwih ƀong mơnuih mơnam tơring čar:

“Pơsit pơplih mrô jing bruă yôm phăn amăng rơnuk yua măi mok tal 4, jing tơhnal pioh Daklak hmao tlôn, nao hrom hăng dưi yak đĭ gah bruă mă yua bôh thâo măi mok amăng djop mơta tơlơi hơdip mơnuih mơnam. Khua Ping gah tơring čar, Jơnum min mơnuih ƀôn sang tơring čar pơsit pran jua ruah pơplih mrô kiăng pơplih abih bang hơdôm hơdră wai lăng djop mơta hơdôm bruă bơwih ƀong mơnuih mơnam tơring čar.”

Klin Covid-19 glăk bơdjơ̆ nao sat truh djop mơta mơng tơlơi hơdip mơda. Bruă mă yua hơdră phrâo măi mok, anăp nao pơplih mrô lĕ jơlan gah ƀu tlaih ôh hăng tơring čar Daklak glăk brơi ƀuh tơlơi gơgrong hlâo, klă mơng pô kiăng ngă klă dua mơta bruă pơgang rah klin hăng pơđĭ kyar rah bruă bơwih ƀong, mơnuih mơnam./.

            Công Bắc: Pô čih – Siu H’ Prăk: Pô pơblang