VOV4.Jarai - Mơguah lơ 30/7, tơring čar Daklak čơkă jum giăm truh 900 čô mơnuih mơng tơring čar Đồng Nai glăi. Anai lĕ tal tŭ jum mơnuih sit nik blung a mơng Daklak. Rơgao kơ test tañ, hmâo 4 čô mơnuih ƀă kơman Sars-CoV-2, hơdôm bruă glăk ngă tui kiăng thâo mơnuih ƀă kơman klin. Giăm truh 900 čô mơnuih mă bruă ƀơi Đồng Nai anai rơngiă bruă mă yua kơ klin Covid-19 gluh đĭ hăng hmâo tơlơi čang rơmang đĭ rơdêh thut pơwot glăi Daklak. Hơdôm mơnuih anai hmâo rơkâo laih hăng anom apăn bruă tơring čar Đồng Nai hăng kơnong kơ dưi glăi lom hmâo test tañ ƀu ƀuh kơman klin kiăng pơhlôm ƀơi jơlan glăi.

Giăm hmâo 900 čô mơnuih mă bruă glăi truh pơ̆ tơdrông toa 14, jơlan 14 hăng dưi hmâo Tơhan wai lăng bruă nao rai Daklak čơkă, ba glăi kiăng ngă hră pơ-ar či kiăng hloh

Tơdơi kơ anun, Gơnong bruă jơlan nao rai dŭ pơgiăng hăng hơdôm khul mơnuih apăn bruă rơnuk rơnua, hơđong, ƀing ơi ia jrao mơng tơring čar Đồng Nai pơjing grŭp kiăo tui tlôn ƀơi jơlan glăi giăm truh 400km. Tui anun, anai lĕ tal blung a tơring čar Daklak sit nik pơphun tŭ jum mơnuih mơng anih klin ngă glăi. Hlâo kơ anun, tơring čar ăt čih hmâo mơn mrô mơnuih lu lin ƀơi ƀôn prong Hồ Chí Minh, Bình Dương hăng hơdôm bôh tơring čar kual Dơnung rŏng pơwot glăi mă pô abih bang đĭ rơdêh thut./.

Siu H’ Prăk: Pô pơblang