VOV4.Jarai -  Mơguah lơ 18/10, tơlơi pơhing mơng Anom wai lăng tơlơi duam ruă tơring čar Daklak brơi thâo, ƀơi plơi prong Buôn Ma Thuột phrâo čih hmâo sa anih klin ngă amăng plơi pla pơ̆ sang čơ phun Tân Hoà (phường Tân Hoà, plơi prong Buôn Ma Thuột) hăng 12 čô mơnuih ƀă kơman Sars-CoV-2. Kiăo tui anun amăng lơ 17/10, ayong P.M.T (48 thun, dô̆ ƀơi jơlan Xô Viết Nghệ Tĩnh, plơi prong Buôn Ma Thuột, pô mă bruă dŭ gơnam tam ƀơi sang čơ phun Tân Hoà) nao pơ̆ Anom ia jrao phường Tân Hoà pơčrang lăng test tañ ƀuh ƀă kơman Sars-CoV-2.

Bôh tơhnal pơčrang lăng hăng Realtime RT-PCR pơsit ƀă kơman klin. Anom wai lăng tơlơi duam ruă tơring čar Daklak hmâo gum hrom hăng Anom ia jrao phường Tân Hoà pơphun hyu huĕt ĕp, mă ia adung pơčrang lăng brơi hơdôm mơnuih hmâo bưp hăng pô ruă. Truh 2 mông mơguah lơ 18/10, khul ia jrao hmâo pơphun mă ia adung, pơčrăng lăng test tañ brơi rơbêh kơ 500 čô mơnuih sĭ mơdrô anet ƀơi sang čơ hăng hơdôm mơnuih bưp giăm hăng ayong T... Rơgao kơ test tañ hmâo dong 11 čô mơnuih ƀă kơman klin, amăng anun hmâo 6 čô mơnuih lĕ pô sang mơng pô ruă hăng 5 čô mơnuih lĕ sĭ mdrô anet ƀơi sang čơ phun anai./.

Siu H’ Prăk: Pô pơblang