VOV4.Jarai - Hơdôm anom bruă apui lơtrik tơring čar Daklak hơmâo pơgiong laih bruă pơkra ming tô glăi apui lơtri brơi giăm 16.500 boh sang anŏ amăng hơdôm tơring glông Ea Kar, M’Drak, Ea H’Leo. Hlâo anun, yua kơthel mrô 5, hơjan ngă angĭn pưh kơtang ngă lu gong apui lơtrik joh, tơ̆I hrĕ, răm rai ƀơi hơdôm trạm biến áp amăng hơdôm tơring glông anai.

Anom bruă apui lơtrik Ea Kar tô glăi hrĕ apui lơtrik

Sit biă ñu, ƀơi kual kơplah wah Ea Kar hăng M’Drak, hơjan kơtang ngă lŏn tơhlŏm, phun kyâo joh ngă tơ̆i hrĕ apui lơtrik kơtuai jơlan 471F18, ngă 11.600 boh sang anŏ amăng dua boh tơring glông anai ƀu hơmâo apui lơtrik yua. Hơdôm anih răm rai hăng kơčong čư̆, tơnap nao rai hăng pơkra ming. Samơ̆, Anom bruă apui lơtrik Ea Kar hơmâo ječ ameč pơkiăo nao mơnuih mă bruă nao pơkra ming amăng akŏ rơwang hrơi tơjuh anai mơtăm.

Anom bruă apui lơtrik Ea H’Leo plih hĭ gong hăng dưm truă trạm biến áp phrâo

Kar kăi tui anun, ƀơi kual yua Anom bruă apui lơtrik Ea H’leo wai lăng, kruaih angĭn nă joh sa gong apui lơtrik hăng răm rai ƀơi trạm biến áp ngă giăm 5.000 boh sang anŏ ƀu hơmâo apui lơtrik yua. Bruă pơkra ming hơmâo anom bruă anai pơgiong amăng hrơi anun mơtăm. Sa, dua boh plơi pla pơkŏn, hơdôm anom bruă apui lơtrik Daklak ăt pơkiăo nao mơnuih dŏ wai, tañ pơkra ming tơdah angĭn ngă tơ̆i hrĕ, biă mă ñu hơdôm kual guai dar, pơčlah mơnuih pioh pơgang klin Covid-19.

Siu Đoan: Pơblang