VOV4.Jarai -  Lơ 8/10, Kông ang plơi prong Buôn Ma Thuột, tơring čar Daklak hmâo pơsit tơgŭ kơđi, phăt kơđi ngă tui tơlơi pơtrun kom tơbiă ƀơi anih dô̆ hăng Đỗ Thanh Hải, 36 thun, dô̆ ƀơi phường Tân Lợi, plơi prong Buôn Ma Thuột, tơring čar Daklak. Hải hmâo arăng ƀom kiăng pơsir kơ bruă “Ngă lar tưp hyu klin ruă huĭ rơhyư̆t kơ mơnuih” tui Tơlơi pơkă mrô 1, mơta tơlơi 240 Phiăn pơsir kơi. Tui hăng bôh tơhnal pel ĕp mơng kông ang, Đỗ Thanh hải lĕ wai lăng ƀơi Anom bruă sang rơdêh Tiến Oanh, ƀơi mrô 134 Hai Bà Trưng, phường Thắng Lợi, plơi prong Buôn Ma Thuột. Mlăm 10/7, Hải hrom hăng 2 čô mơnuih pơkon đĭ amăng rơdêh 50H-052.70 mơng ƀôn prong Hồ Chí Minh glăi pơ plơi prong Buôn Ma Thuột. Amăng hơdôm hrơi anai ƀôn prong Hồ Chí Minh lĕ kual hmâo klin. Lom pơwot glăi sang rơdêh, Hải ƀu nao pơ̆ anom ia jrao lăi pơthâo tui tơlơi pơkă ôh mơ̆, rô hyu djop anih amăng plơi prong Buôn Ma Thuột hăng bưp lu mơnuih. Tơdơi kơ hmâo bôh tơhnal pơčrang lăng ƀă kơman klin, drơi pô Hải ăt ƀu lăi pơthâo mơn hrơi mông hyu, bưp hlơi ngă bruă hyu huĕt ĕp, pơsit phun than lar tưp mơng khul apăn bruă bưp tơnap. Lom pel ĕp ruah mă, kông ang pơsit Đỗ Thanh Hải hmâo ngă laih 10 čô mơnuih pơkon ƀơi plơi prong ƀă kơman Covid-19. Ƀirô apăn bruă glăk ngă giong hră pơ-ar, pơsir kơđi tui tơlơi phiăn pơkă./.

Siu H’ Prăk: Pô pơblang