VOV4.Jarai - Dong mơng akô̆ thun truh ră anai, Khul mơnuih ngă đang hmua tơring čar Daknông hmâo djru mơnuih ƀôn sang can prăk pioh pơđĭ kyar bruă tơjŭ pla hăng rông hlô. Mrô prăk brơi čan dưi mă mơng Keh prăk djru mơnuih ngă đang hmua mơng Khul mơnuih ngă đang hmua tơring čar hăng abih bang prăk mă yua rơbêh kơ 1 klai 300 klăk prăk. Mơng prăk čan, Khul mơnuih ngă đang hmua tơring čar pơsir brơi kơ 11 bôh sang anô̆ ƀơi să Dak Ndrot, tơring glông Dak Mil čan 500 klăk prăk pioh yua rông be; 11 bôh sang anô̆ ƀơi să Trường Xuân, tơring glông Dak Song čan 300 klăk prăk yua pơplih pơkra hăng bơwih brơi phun kơ phê; 10 bôh sang anô̆ ƀơi tơring kual Dak Mâm, tơring glông Krông Nô čan 500 klăk prăk yua pơplih pơkra hăng bơwih brơi kơ phê. Abih bang hơdôm bôh sang anô̆ mơnuih ƀôn sang leng kơ mă yua prăk čan ba glăi bôh tơhnal, djơ̆ bôh than pơkă. Pơ̆ anăp anai, Khul mơnuih ngă đang hmua tơring čar lăng tui dong bruă mă yua prăk čan, djru hơdôm bôh sang anô̆ ngă đang hmua bơwih ƀong huă ba glăi bôh than./. 

Siu H’ Prăk: Pô pơblang