VOV4.Jarai -  Tơdơi kơ thâo hmâo ƀut mơnuih ƀă kơman Sars-CoV-2 amăng să Quảng Tín, tơring glông Dak R’lấp, Kơ-iăng Khua Jơnum min mơnuih ƀôn sang tơring čar Daknông Tôn Thị Ngọc Hạnh hmâo kĭ tơlơi pơsit mă yua sa dua bruă ječ amăng pơgang, pơgăn klin Covid-19 amăng tơring čar. Kiăo tui anun, tơring čar Daknông pơsit guang dar đơ đam tơring glông Dak R’lấp mơng 12 mông lơ 7/9 hăng mă yua tơpă hơdôm bruă tui Tơlơi črâo ba mrô 16. Rơkâo mơnuih ƀôn sang dô̆ pơ̆ sang, kơnong kơ tơbiă gah rơngiao amăng tơlơi kiăng biă mă kah. Pơdơi jăng jai abih bang hơdôm bruă mă amăng plơi pla. Hơdư̆ đut hlah bruă mă mơng hơdôm bôh rơdêh mă yua kơ pô, pơhlôm mă hluh gah bruă pơgiăng gơnam tam. Tui hăng tơlơi lăi pơthâo glăi mơng Grŭp črâo ba pơgang, pơgăn klin ruă ƀơi mơnuih mơng tơring glông Dak R'lấp, mơng lơ 5/9 tơdơi kơ hrơi ƀuh pô ruă ƀă kơman blung a ƀơi să Quảng Tín, truh mơguah lơ 7/9, đơ đam tơring glông hmâo čih pioh 52 čô mơnuih ƀă kơman Sars-CoV-2 amăng anun lu ñu ƀơi 2 bôh ƀôn Bu Dzách, Bu Bir gah să Quảng Tín. Ră anai Gơnong bruă ia jrao glăk pel ĕp, hyu huĕt mă, mă ia adung pơčrang brơi rơbêh kơ 6.200 čô mơnuih bơdjơ̆ nao, bưp giăm kiăng ruah tơbiă hơdôm mơnuih ƀă kơman mơng plơi pla./.

Siu H’ Prăk: Pô pơblang