VOV4.Jarai - Tal pơplông mă ƀăng gưl 3 thun 2021, tơring čar Daknông hmâo 7000 čô mơnuih rơkâo pơplông. Hrom hăng bruă dưm dăp dong hơdôm anih pơplông, anom pơplông pơhlôm hlâo, Gơnong bruă pơtô pơhrăm tơring čar Daknông iâu pơhrui hmâo giăm truh 1.000 čô mơnuih wai lăng čơđai pơplông.

Amăng anun hmâo mơnuih apăn bruă, mơnuih mă bruă gah gơnong bruă: pơtô pơhrăm, khul ling tơhan, kông ang hăng ia jrao gum hrom. Ră anai Gơnong bruă pơtô pơhrăm hmâo lăi pơthâo tơlơi pơkă, pơhrăm brơi mơnuih wai lăng čơđai pơplông. Ƀing čơđai nao pơplông dưi ngă gal klă hloh kơ anih anom pơplông kiăng pơkrem hrơi mông nao rai, bĕ đuăi hyu ataih. Ƀơi hơdôm anih anom pơplông, bruă pel ĕp glăi, pơhrua nao dong anô̆ dô̆ kơƀah, pơkra glăi anih anom răm rai dưi hmâo gơnong bruă pơtô pơhrăm ngă tui klă, pơhlôm hơdôm tơlơi pơkă kơ tơlơi ba tơbiă gơnam tam anih anom, pơhlôm rơnuk rơnua hơđong pơphun tal pơplông. Biă ñu, ƀơi anăp tơlơi klin Covid-19 glăk ngă tơnap, Gơnong bruă pơtô pơhrăm tơring čar Daknông hmâo črâo ba laih hơdôm anih anom pơtô pơhrăm wai lăng kơjăp čơđai sang hră nao pơplông mă ƀăng gưl 3, pơtă čơđai hăng mơnuih mơng sang anô̆ čơđai tâ̆o hloh anăm tơbiă mơng tơring čar pô, biă ñu nao pơ̆ hơdôm kual klin ngă./.      

Siu H’ Prăk: Pô pơblang