VOV4.Jarai - Ƀrô djơ̆ tal hơdor glăi 131 thun hrơi tơkeng Khua mir sir Hồ Chí Minh, mơguah lơ 19/5, ƀơi să Dak Nia, plơi prong Gia Nghĩa, Jơnum min mơnuih ƀôn sang tơring čar Daknông pơphun ngă lơphet pok phun “Tết pla kyâu hơdor na nao kơ Wa Hồ” hăng pla phun kyâu mă tơ-ui thun 2021.

Amăng mông ngă lơphet, Khua tơring čar Daknông iâu pơthưr rim mơnuih apăn bruă, mơnuih mă bruă čar, ling tơhan hăng mơnuih ƀôn sang pla ƀiă biă mă ñu 1 phun kyâu mơtah, anăp nao klă pla kyâu tui tơlơi pơtô mơng Wa Hồ kiăng pơhlôm anih anom dô̆, kơtưn ia mơtah kơ plơi prong. Tơdơi kơ ngă lơphet pok phun, 350 ƀĕ phun kyâu pang hăng kyâu trôl dlai dưi pla ƀơi kual đang hmua mă yua bôh thâo phrâo, să Dak Nia, plơi prong Gia Nghĩa. Amăng tal anai, hơdôm anih anom amăng tơring čar ăt pơphun pla mơn năng ai ñu 51.000 ƀĕ phun kyâu. Ơi Lê Trọng Yên, Kơ-iăng Khua Jơnum min mơnuih ƀôn sang tơring čar Daknông brơi thâo, ƀơi tơring čar Daknông dlai klô jai hrơi jai rai tui wot kual hăng anô̆ klă mơng dlai klô. Jơnum min mơnuih ƀôn sang tơring čar čang rơmang hơdôm bôh ƀirô, jơnum gơnong bruă, khul grŭp hăng mơnuih ƀôn sang thâo pơmin ƀiă kơ bruă pơgang anih anom dô̆, pla klă phun kyâu, pơgang, pơđĭ tui klă anih anom dô̆, dlai klô./.

Siu H’ Prăk: Pô pơblang