VOV4.Jarai - Ruah khua pơ ala mơnuih ƀôn sang tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 jing bruă kơđi čar yôm phăn. Ƀơi Daknông, Jơnum min ruah khua tơring čar glăk đing nao črâo ba hơdôm ƀirô, anom bruă, plơi pla prăp lui klă pơhlôm djơ̆ rơnoh bruă, tơpă hăng pơkă mơng tơlơi phiăn.

Gơnang kơ ngă klă bruă lăi pơhing ruah khua pơ ala mơnuih ƀôn sang dêh čar ta tal 15 hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 mơ̆ lu mơnuih ruah khua ƀơi kual asuĕk, ataih, kual tơnap tap mơng tơring čar Daknông hmâo lu hloh bruă gơgrong hăng tơlơi dưi mơng drơi pô. Mơnuih ruah khua H’ Plơ ƀơi ƀôn Sa Pa, să Thuận An, tơring glông Dak Mil, brơi thâo, neh wwa lăng tui na nao hơdôm yak pơphun bruă bơkơtuai hăng hơdôm tơlơi pơhing hơdôm mơnuih dưi lăi pơthâo tơbiă anăn kơ khua pơ ala mơnuih ƀôn sang dêh čar, Jơnum min pơ ala mơnuih ƀôn sang hơdôm gưl.

“Ƀing gơmơi čang rơmang hơdôm mơnuih dưi hmâo mơnuih ƀôn sang ruah, gơñu amra ba glăi abih bôh thâo mơng pô pioh pơtrut pơsur ngă brơi plơi pla đĭ kyar, djru lŏn ia jai hrơi jai pơđĭ kyar, mơnuih ƀôn sang jai hrơi jai pơdrong asah, tơlơi bơwih ƀong jai hrơi jai hơđong”.

Jơnum min djop djuai ania mơnuih mơnam dêh čar tơring čar Daknông pơphun Jơnum bơkơtuai tal 2   

Tui hăng yă Nguyễn Thị Thu Hường, Khua Gơnong bruă tơring čar, Khua čih pioh mơng Jơnum min ruah khua tơring čar Daknông brơi thâo, truh mông anai, bruă prăp lui kơ bruă ruah khua pơ ala mơnuih ƀôn sang dêh čar ta tal 15 hăng Khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026 ƀơi tơring čar Daknông hmâo pok pơhai hmao tlôn laih, djơ̆ tơlơi pơkă amăng tơlơi phiăn, rơnoh bruă hrơi mông tui kơčăo bruă mơng Khul apăn bruă ruah khua dêh čar hăng Jơnum min ruah khua hơdôm gưl. Đơ đam tơring čar hmâo pơdŏng laih 2 Grŭp ruah khua pơ ala mơnuih ƀôn sang dêh čar hăng 14 Grŭp ruah khua pơ ala Jơnum min pơ ala mơnuih ƀôn sang tơring čar, 8 Jơnum min ruah khua Jơnum min pơ ala mơnuih ƀôn sang gưl tơring glông, 71 Grŭp ruah khua Jơnum min pơ ala mơnuih ƀôn sang să. Tơdơi kơ Jơnum bơkơtuai tal 2, tơring čar Daknông lăi pơthâo 11 čô mơnuih tơbiă anăm kơ khua pơ ala mơnuih bôn sang dêh čar tal 15, 96 čô mơnuih tơbiă anăn kơ khua pơ ala Jơnum min pơ ala mơnuih ƀôn sang tơring čar, 507 čô mơnuih tơbiă anăn kơ khua pơ ala Jơnum min pơ ala mơnuih ƀôn sang tơring glông, 3.244 čô mơnuih tơbiă anăn kơ khua pơ ala Jơnum min pơ ala mơnuih ƀôn sang gưl să, rơwang bruă 2021-2026.

“Ră anai Grŭp črâo ba mơng tơring čar ăt kah hăng Jơnum min ruah khua tơring čar hmâo črâo ba laih kơ hơdôm bôh tơring glông, hơdôm bôh să tui črăn bruă mơng pô pok pơhai pơdŏng hơdôm grŭp ruah khua. Kiăo tui anun să amra rơkâo brơi tơring glông pơsit hơdôm kual plĕ hră hăng pơdŏng hơdôm grŭp plĕ hră. Gah bruă pel ĕp anih anom gơnam tam ăt kah hăng pơsit prăk mă yua hăng hơdôm bruă pơkon lĕ, ƀing gơmơi hmâo pơphô brơi kơ Jơnum min ruah khua tơring čar črâo ba hơdôm anih anom kiăo tui tơlơi phiăn ăt kah hăng hơdôm tơlơi pơtô ba mơnuih kơnuk kơna, pơtô ba mơng tơring čar kiăng pơphun tui djơ̆ glông jơlan mơng bruă ruah khua”.

Hrom hăng anun, Jơnum min apăn bruă Jơnum min djop djuai ania mơnuih mơnam dêh čar hơdôm gưl gum hrom, prăp lui djop hơdôm tơlơi kiăng pioh pơphun bruă bưp mơnuih ruah khua, pơsur ruah khua mơng ƀing tơbiă anăn kơ khua pơ ala mơnuih ƀôn sang dêh čar tal 15 hăng khua pơ ala Jơnum min pơ ala mơnuih ƀôn sang tơring čar rơwang bruă 2021-2026. Jơnum min mơnuih ƀôn sang gưl să pel ĕp, pơhrua nao dong mơnuih ruah khua pơplih anih dô̆, hơdôm tơlơi pơkă mơng tơlơi phiăn. Ơi Nguyễn Phú Nghĩ, Kơ-iăng Khua Jơnum min djop djuai ania mơnuih mơnam dêh čar tơring čar Daknông brơi thâo, Jơnum bơkơtuai ƀơi hơdôm gưl mơng tơring čar pơphun pơdah rơđah, tơpă, djơ̆ akô̆ tlôn, hrơi mông tui tơlơi phiăn pơkă hăng leng kơ dưi čơkă mă tơlơi tŭ ư prong hloh mơng mơnuih ruah khua.

“Tơlơi lăi pơthâo khua pơ ala pơphun ƀơi ƀirô, anom bruă hăng mă tơlơi gum pơhiăp mơnuih ruah khua anih mă bruă hăng gum pơhiăp grŭp khua git gai pơhư prong ngă tui tơpă. Hơdôm mơnuih tơbiă anăn dưi ba tơbiă tơlơi đăo gơnang prong pơdah lom tơbiă anăn grŭp khua mua hmâo ruah mơnuih djơ̆ pran, djơ̆ tơhnal kiăng ba tơbiă mơnuih tơbiă anăn kơ khua pơ ala mơnuih ƀôn sang dêh čar hăng Jơnum min pơ ala mơnuih bôn sang hơdôm gưl. Gah tơhnal pơkă khua pơ ala lĕ dlông biă, gah bôh thâo bruă mă, thun tơkeng, dô̆ hlăk ai leng kơ pơhlôm djơ̆ tơlơi kiăng hăng pơhlôm pơ ala kơ tơlơi dưi hăng čang rơmang djơ̆ phiăn mơng mơnuih ƀôn sang”.

Amăng mông pel ĕp, lăng tui bruă prăp lui ruah khua lơ 23/3, ơi Phùng Khánh Tài, Kơ-iăng Khua Jơnum min djop djuai ania mơnuih mơnam dêh čar Việt Nam rơkâo tơring čar Daknông khom ngă klă dong bruă lăi pơhing kơ ruah khua pơhlôm ha amăng plĕ, pơlir hơbit hăng ba glăi bôh tơhnal. Jơnum min djop djuai ania mơnuih mơnam tơring čar khom ngă tui klă bruă prăp lui kơ jơnum bơkơtuai tal 3 pioh ruah mă, čih anăn sit nik mơnuih djop tơhnal pơkă tơbiă anăn kơ khua pơ ala mơnuih ƀôn sang dêh čar hăng khua pơ ala Jơnum min pơ ala mơnuih ƀôn sang hơdôm gưl rơwang bruă 2021-2026, hrom hăng anun khom ngă klă bruă pơhrăm kơ ding kơna Jơnum min ruah khua hơdôm gưl.

“Kâo rơkâo tơring čar ngă klă bruă pơsir hră pơ-ar ƀom kiơng mơng mơnuih ƀôn sang. Pel ĕp glăi dong mơnuih gum hrom tơbiă anăn kơ khua pơ ala mơnuih ƀôn sang dêh čar ăt kah hăng khua pơ ala Jơnum min pơ ala mơnuih ƀôn sang hơdôm gưl, biă ñu lĕ hơdôm tơlơi gah gru grua bruă kơđi čar, hơdôm tơlơi kơđi čar ră anai pơkĕ hăng hơdôm tơlơi mơnuih lăi nao amăng hơdôm mông jơnum bưp mơnuih ƀôn lan. Kâo pơmin anai lĕ glông jơlan yôm phăn pioh hmâo gru than hluai tui anun hmâo hơdôm tơlơi pel ĕp lom kiăng. Ƀing gơmơi rơkâo tơring čar thâo kơjăp tơlơi mơnuih ƀôn sang biă ñu lĕ anih anom hmâo hơdôm tơlơi ƀu mơ-ak amăng pran jua ƀom kiơng lu mơnuih, tơlơi lŏn dron, rơhuông adai dlai klô ƀudah hơdôm tơlơi bơdjơ̆ nao tơlơi đăo. Tơring čar khom đing nao pha ra kiăng pơsir, bĕ pioh hmâo ƀing kơdŏng glăi kơnuk kơna nao mă tŭ hơdôm hrơi mông tañ bơdjơ̆ nao gơñu ngă bơdjơ̆ nao bruă ruah khua”.

Ră anai bruă prăp lui kơ Hrơi jơnum ngui abih bang mơnuih ƀôn sang glăk dưi hmâo tơring čar Daknông pok pơhai ha amăng plĕ, pơhlôm djơ̆ tơlơi pơkă glông hơdră, tơlơi pơkă hăng rơnoh hrơi mông. Tơhnal ba tơbiă mơng tơring čar lĕ ruah sa wot dong djop mrô hăng dưi ruah ƀing khua pơ ala sit nik mơbruă, lăp djơ̆ khua pơ ala kơ pran run đĭ, tơlơi čang rơmang hăng tơlơi dưi ngă pô mơng mơnuih ƀôn sang./.

            Tuấn Anh: Pô čih – Siu H’ Prăk: Pô pơblang