VOV4.Jarai -  Tơring čar Daknông ră anai hmâo giăm truh 11.000 ektar đang hmua pla añăm pơtăm, hơbơi pơtơi, bôh troh djop mơta, hăng abih bang hmâo năng ai ñu 176.000 tơn. Tui hăng mrô yap mơng Gơnong bruă đang hmua tơring čar dong mơng ră anai truh blan 11 hmâo năng ai ñu 43.000 tơn añăm pơtăm, hơbơi pơtơi, bôh troh, sầu riêng hăng bôh ƀơr mơng neh wa kiăng sĭ, yap him lăng năng ai ñu 900 tơn rim hrơi.

Khă hnun hai, yua kơ bơdjơ̆ nao mơng klin ruă Covid-19 anun bruă sĭ gơnam mơng neh wa bưp lu tơlơi tơnap. Lu đang sang akă dưi ĕp hmâo jơlan pioh sĭ gơnam mă mơng đang hmua ăt ƀu dưi lăi pơthâo mơn hăng arăng. Anom pơđĭ kyar bruă đang hmua tơring čar Daknông brơi thâo, ră anai gơnong bruă đang hmua tơring čar Daknông hmâo pơdŏng laih grŭp gum djru, tô nao rai djru mơnuih ƀôn sang sĭ gơnam djop mơta mơng tơring čar. Kiăo tui anun, rơbêh kơ 3 rơwang hrơi tơjuh hăng anai rơbêh kơ 4.000 tơn añăm pơtăm bôh troh djop mơta, 4.000 tơn bôh sầu riêng hăng rơbêh kơ 3.000 tơn bôh ƀơr dưi hmâo gơnong bruă đang hmua mơng tơring čar tô nao rai sĭ mơdrô./.

Siu H’ Prăk: Pô pơblang