VOV4.Jarai - Lơ 18/5, Ƀirô git gai khul ling tơhan tơring čar Daknông hmâo pơphun kuai mă tơlang tơleh 7 čô ling tơhan pơsăn drơi ƀơi thôn 8, să Quảng Tân, tơring glông Tuy Đức, tơring čar Daknông. Amăng mrô 7 bôh pơsat dưi tum pơƀut, 3 bôh pơsat dô̆ čơđeh tơlang, 4 bôh pơsăt dô̆ mơn gơnam mă yua kah hăng: Jao, thong, bôh nut ao... Tui hăng ƀing ling tơhan hơđăp hmâo ha tal bơblah ƀơi kual anai, anai lĕ tơlang tơleh ƀing ling tơhan pơsăn drơi gah Trung đoàn 205 hăng Trung đoàn 271 (Ƀirô pơtrun bruă kual Ngŏ hơđăp) pơsăn drơi amăng rơwang thun 1973-1974. Kual dưi ĕp ƀuh hơdôm pơsat ling tơhan anai hlâo adih dưi hmâo ling tơhan pơanăn lĕ kơdư “čơlah dua” yua kơ hmâo hrom sa kơdư mơ̆ tơhan ta hăng ayăt blah sua mă rim bơnah sa mơkrah. Ƀơi kual anai, hlâo adih khul tơhan hmâo ĕp ƀuh 20 bôh pơsat tơhan pơsăn drơi. Ră anai khul hyu ĕp tơlang tơleh pok prong dong kual hyu hơduah ĕp./.

Siu H’ Prăk: Pô pơblang