VOV4.Jarai -  Amăng rơwang hrơi tơjuh rơgao, ƀơi kual Dăp Kơdư (biă ñu lĕ 2 bôh tơring čar Daklak hăng Kontum) hmâo čih pioh na nao lu mơnuih ƀă kơman Covid-19, amăng anun lăp đing nao hloh lĕ hơdôm ƀut mơnuih ƀă gah rơngiao kơ plơi pla. Ƀơi anăp tơlơi anai gong gai hăng khul gơgrong bruă anai hmâo kơtưn wai lăng kiăng pơgăn jơlan lar tưp. Grŭp ơi ia jrao mơng Sang ia jrao Chợ Rẫy ăt hmâo nao laih pơ̆ Daklak pioh djru pơgăn klin Covid-19.

Ƀơi tơring čar Kontum tơdơi kơ hmâo hơdôm pluh čô mơnuih ƀă kơman klin Sars-CoV-2 amăng plơi pla, mơng rơwang hrơi tơjuh hlâo, khul gơgrong bruă mơng tơring čar hmâo pơphun guang dar klin ngă prong, hyu huĕt ĕp hơdôm mơnuih F1, F2, F3 kiăng pơgăn jơlan lar tưp Covid-19 amăng plơi pla hăng ƀơi hơdôm kual dô̆ čơlah hơbit. Tơdơi kơ anun, Jơnum min mơnuih ƀôn sang tơring čar Kontum hmâo pơphun jơnum lăng nao rai mơng ataih hăng 10 bôh tơring glông, plơi prong hăng 102 bôh să, phường, tơring kual mơng tơring čar. Pơhiăp črâo ba amăng mông jơnum ječ anai, ơi Lê Ngọc Tuấn, Khua Jơnum min mơnuih ƀôn sang tơring čar Kontum rơkâo hơdôm anih anom ngă tui klă guang dar kual klin ngă, hrom hăng anun ngă tui klă bruă wai lăng jơlan lar tưp Covid-19 amăng plơi pla hăng ƀơi hơdôm kual dô̆ čơlah hơbit:

“Hơdôm kual dô̆ čơlah hơbit lĕ hmâo lu mơnuih, amra lar tưp bơrơkua amăng kual dô̆ čơlah. Khul wai lăng kual dô̆ čơlah khom kơtưn lăng tui kual dô̆ čơlah hơbit, kual dô̆ čơlah pơjrao. Dô̆ čơlah ƀơi sang ngă tui Grŭp Covid plơi pla, wot glông bruă kơđi čar lăng tui. Tơdah ƀuh hlơi dô̆ čơlah ƀơi sang ngă tui tơpă lĕ rơkâo ba nao pơ̆ anih dô̆ čơlah hơbit”.

Sa kual lăng tui tơlơi suaih pral mơnuih mơnam tơdơi kơ dô̆ čơlah hơbit ƀơi phường Lê Lợi, plơi prong Kontum

Amăng mông Jơnum lăi pơthâo bruă mă tơlơi pơhing blan 10 phrâo rơgao, dưi hmâo grŭp pơtô bruă Ping gah tơring čar Kontum, ơi Nguyễn Đình Cầu, Kơ-iăng Khua Anom bruă Jơnum min mơnuih ƀôn sang tơring čar Kontum brơi thâo, tơring čar djă pioh dong anih gak wai lăng klin ruă ƀơi hơdôm ară jơlan prong mut amăng tơring čar. Anai lĕ hơdôm anih gak wai lăng klin ƀu djơ̆ anih gak wai lăng bruă nao rai ƀơi jơlan glông ôh anun tơring čar amra ƀu lui lơi ôh. Bôh nik brơi ƀuh, khul gơgrong bruă hmâo ƀuh sa dua čô mơnuih ƀă kơman Sars-CoV-2 ƀơi Anih gak wai lăng mrô sa Sao Mai, plơi prong Kontum hăng Anih dô̆ Gak pel ĕp klin mrô 2 jơlan čun čue Lò Xo, tơring glông Đăk Glei ƀơi jơlan Hồ Chí Minh. Hăng tơlơi lar tưp Covid-19 amăng hơdôm kual dô̆ čơlah hăng gah rơngiao plơi pla, ơi Nguyễn Đình Cầu, Kơ-iăng Khua Anom bruă Jơnum min mơnuih ƀôn sang tơring čar Kontum brơi thâo:

“Tơdơi dô̆ čơlah hơbit 14 hrơi lĕ ƀơi kual dô̆ čơlah lu mơnuih nao pơčrang lăng 3 wot leng kơ ƀu ƀuh kơman klin sôh. Samơ̆ hmâo hơdôm mơnuih glăi dua, tlâo hrơi tơdơi; pă, rơma hrơi tơdơi kah mơng pơphun ƀuh ƀă kơman klin. Tơlơi anai ba tơbiă sa tơlơi anun lĕ hơdôm hrơi ñu pơđom amăng drơi, laih anun tơbiă gah rơngiao amra ƀu thâo ôh lar tưp bơrơkua nao rai dong mơn hă. Tơlơi tal dua lĕ tơdơi kơ nao dô̆ čơlah hơbit glăi dô̆ čơlah pơ̆ sang akă ngă tui djơ̆ tơlơi pơkă, ƀu tơpă pioh lar tưp hyu amăng mơnuih mơnam. Bruă mơ̆ lăng tui mơng hơdôm Grŭp Covid plơi pla ngă akă ƀu pơhlôm bruă jao”.

Grŭp hyu mă bruă mơng  Sang ia jrao Chợ Rẫy pel ĕp ƀơi Anom pơjrao ječ hơkrŭ glăi pran jua pơgăn ruă măi Sang ia jrao prong Vùng Tây Nguyên

Ƀơi anăp tơlơi mơnuih ƀôn sang abih hrơi dô̆ čơlah hơbit glăi ngă tui dô̆ čơlah, lăng tui tơlơi suaih pral ƀơi sang kah mơng thâo ƀă kơman Sars-CoV-2 ba truh lar tư̆p klin ruă amăng plơi pla, sa dua bôh tơring glông, plơi prong amăng tơring čar Kontum pơtrut pơsur mơnuih ƀôn sang rŏng rơkâo dô̆ glăi ƀơi kual dô̆ čơlah hơbit hmâo 7 hrơi dong.

Ƀơi tơring čar Daklak, rơwang hrơi tơjuh rơgao jing laih “anih hang tơngia” hloh kơ Covid-19, lom hmâo na nao hơdôm ƀut mơnuih ƀă kơman klin amăng mơnuih mơnam, biă ñu ƀơi plơi prong Buôn Ma Thuột. Djơ̆ anô̆ ñu hmâo sa hrơi čih hmâo 174 čô mơnuih ƀă Covid-19, anai lĕ mrô mơnuih ƀă kơman lu hloh yap mơng hlâo truh ră anai yap mơng klin ngă tal 4 gluh đĭ. Amăng anun, hmâo hơdôm pluh čô mơnuih amăng plơi pla, lu biă ñu hơdôm bôh tơring glông Čư Mgar, Krông Ƀuk, plơi prong Buôn Hồ hăng plơi prong Buôn Ma Thuột.

Ƀơi anăp tơlơi anun, rơwang hrơi tơjuh rơgao, grŭp ơi ia jrao mơng Sang ia jrao Chợ Rẫy hmâo rai laih pơ̆ Daklak kiăng djru pơgăn klin Covid-19. Amăng mơguah hrơi blung a lom rai pơ̆ Daklak, grŭp ơi ia jrao mơng Sang ia jrao Chợ Rẫy hmâo laih mông mă bruă hăng khua mua hăng khul ơi ia jrao mơng Sang ia jrao prong Kual Tây Nguyên. Ơi ia jrao Nguyễn Đại Phong, Khua Sang ia jrao prong Vùng Tây Nguyên brơi thâo: Hơdôm tơlơi gum pơhiăp mơng Grŭp hyu mă bruă kơ bruă ruah tơbiă, dô̆ čơlah hăng pơjrao mơnuih ruă amra djru Sang ia jrao ngă giong hloh amăng bruă pơjrao mơnuih ƀă Covid-19:

“Grŭp ia jrao Sang ia jrao Chợ Rẫy gơñu hmâo lu tơlơi găn rơgao amăng bruă pơjrao mơnuih ƀă Covid-19 ƀơi ƀôn prong Hồ Chí Minh ăt kah hăng ƀơi kual Dơnung dêh čar, kual Tŏng krah dêh čar ră anai rai pơ̆ anai arăng hmâo djru kơ Sang ia jrao prong Vùng Tây Nguyên dưi ƀuh abih bang hơdôm anô̆ tlaih lui mơ̆ sang ia jrao ƀu đing nao. Tơlơi yôm phăn gơñu amra djru brơi Sang ia jrao bruă pơjrao hăng abih bang hơdôm gơnam mă yua măi mok ăt kah hăng gơnam kơƀah gơñu amra gum pơhiăp djru gum mơng Sang ia jrao Chợ Rẫy ăt kah hăng Ding jum ia jrao mơn”.

Rơwang hrơi tơjuh rơgao, grŭp ơi ia jrao mơng Sang ia jrao Chợ Rẫy hmâo pơphun pel ĕp hơdôm bôh sang ia jrao pơjrao mơnuih djơ̆ klin, kual pơjrao, kual dô̆ čơlah; gum pơhiăp kơ tơring čar amăng bruă pơpha tal pơjrao, ba mơnuih ruă pơjrao; gum hrom hơdôm bruă jơnum hăng Grŭp črâo ba pơgang, pơgăn klin Covid-19 tơring čar Daklak; jơnum lăng nao rai mơng ataih hăng khul ia jrao hăng khua mơng tơring čar, hơdôm anom ia jrao... Hăng ră anai, ƀing ơi ia jrao, nai ia jrao mơng Sang ia jrao Chợ Rẫy dô̆ glăi hmâo sa wot hrơi tơjuh dong kiăng djru tơring čar Daklak amăng bruă pơgang, pơgăn klin hăng bơwih brơi, pơjrao mơnuih ruă ƀă Covid-19./.

            VOV Tây Nguyên: Čih – Siu H’ Prăk: Pơblang