VOV4.Jarai -  Lơ 21/9/2021, Kơnuk kơna dêh čar Italia lăi pơthâo tơlơi pơsit gum djru pơhrua nao dong 796 rơbâo liều vaccine AstraZeneca kơ Việt Nam hluai tui hơdră COVAX kiăng djru Việt Nam bŏng glăi hăng klin Covid-19. Tơlơi pơsit phrâo hloh anai pơđĭ tui mrô vaccine mơ̆ Italia djru kơ Việt Nam lĕ 1 klăk 600 rơbâo liều, ngă brơi Việt Nam jing sa amăng hơdôm bơnah đing nao hlâo čơkă mă vaccine prong hloh mơng Italia ƀơi đơ đam rŏng lŏn tơnah. Italia ăt lĕ sa amăng hơdôm ding kơna Khul pơlir hơbit kual Mi Kô̆ (EU) djru prong hloh kơ Việt Nam tui hơdră COVAX. Anai lĕ tơlơi gum djru yôm phăn hăng hmao tlôn, pơdah pran jua gum hrom hơbit mơng Kơnuk kơna hăng mơnuih ƀôn sang Italia pioh kơ Việt Nam amăng rơwang tơnap tap. Hlâo kơ anun, lơ 14/9/2021, Việt Nam hmâo tŭ mă 812.060 liều vaccine mơng Italia djru kơ bruă tlâ̆o vaccine pơgang Covid-19./.

Siu H’ Prăk: Pô pơblang